Read idege EHE ỌKPỤKPỤ 31 Bible Online

EHE ỌKPỤKPỤ 31 - idege bible

EHE ỌKPỤKPỤ 31

¹Ọọwa lẹ, Amkpaa-à byi iMosisi yẹkẹẹ,

²“M̀ chụ iBesalẹlụ ọnyị nya Uri lẹ. Adịda ọgbahị nya iBesalẹlụ ọọwa-à ri iHuu o-bwu imwawụ nya iJuda lẹ.

³M̀ ya ọngịrị[20] nyam hụ ta iBesalẹlụ ọwẹ bala ọ-ya ẹla ọjẹjẹ bala irya ọ-kpa họ ụma nya ịbańg ọnyị myị ọnyị wuu họọ,

⁴nyọka họ ụma nya ang datị-datị lokpoko ịgọm bala okpoko onyoowuru bala oje ọnyọmịla,

⁵bala ọ-ka be ajwọ ịnyịịla-ịnyịịla, wụlaa nya ịjang bala ọ-jẹ kọ ekeji bala ụma nya ụkụrwọ datị-datị ọhọhọ.

⁶M̀ chụ Oholiyabụ ọnyị nya Ahisamakị bwu imwawụ nya ịDan kọ ka họ ụkụrwọ ta iBesalẹlụ lẹ. M̀ ya irya ha alụkụrwọ ịkịla wuu ịnyịnyị chajị kị ka jẹ-ẹ̀ họ ang myị ang ọlẹ kam bying kị ka họ lẹ.

⁷Ang ịlẹ kị ka họ wuu ri Ọdụ nyam am Amkpaa bala Akpa nya Iro tụ ọnụ nyamwụ bala ang-abwọ ịkịla nya ọdụ ọwẹ wuu,

⁸bala itebwuru bala ang-abwọ nyamwụ bala ang ọ-ya itinika rịrị ọlẹ kị họ lokpoko ịgọm-ịgọm kem bala ang-abwọ nyamwụ bala ogidi okiliya nya ịtangare.

⁹Ang ịkịla ri ogidi okiliya ọ-rụ ila bala ang-abwọ nyamwụ wuu bala ẹja ọtabwọ bala ang ọ-ya ẹja rịrị.

¹⁰Ang ịkịla ri ịwụrụ nya angịkiliya ịnyịịla-ịnyịịla ịlẹ ká Erọn bala anyị nyamwụ ka kụrụ ụka kị ka kịla iya ham.

¹¹Ị ka họ ida ọlịgọgọ bala ịtangare ochoru kwọkwọ ọ-la Ẹga Ọlịgọgọ. Ị ka họ ang myị ang ịwẹ wuu kpẹẹkpẹẹ jaabwọ kam dang ehile.”

¹²Ọọwa, Amkpaa-à byi iMosisi yẹkẹẹ,

¹³“Byi ala Isirẹlụ ịịlẹ yẹkẹẹ, ‘Anụ ka kpịtịya nya Ẹnụtụrụ Ọhịnyọ Lụkụrwọ ọlẹ kam hunọ. Ọwẹ ri ang-ẹjẹẹ ẹ-ẹpwarịrị nyam bala anụ gbe oyi myị oyi nyori am Amkpaa huunu nya angịnyị nya ịlọm lẹ.

¹⁴Anụ ka kpịtịya nya Ẹnụtụrụ Ọhịnyọ Lụkụrwọ chajị ọ ri ẹnụ ọlịgọgọ hanụ. Ị ka nwụ ọng myị ọng ọlẹ kọ bịrị ehile ọwẹ. Ọngọlẹ kọ họ ụkụrwọ ẹnẹwẹ aalẹ, ị ka boo deeji hi ẹpwụ nya angịnyị nyam.

¹⁵Ẹ-ẹpwụ nya ụtụrụ ịrwọnyẹ ānụ ka họ ụkụrwọ ọnyị myị ọnyị wuu lẹ. Ẹnụtụrụ ọharwiye ri Ẹnụtụrụ Ọhịnyọ Lụkụrwọ ham am Amkpaa. Ị ka nwụ ọng myị ọng ọlẹ kọ họ ụkụrwọ Ẹnụtụrụ Ọhịnyọ Lụkụrwọ.

¹⁶Aloyi ọnyị myị ọnyị nya ala Isirẹlụ ka kpịtịya nya Ẹnụtụrụ Ọhịnyọ Lụkụrwọ ọwẹ nya ang-ẹjẹẹ nya iro pyịyọọ.

¹⁷Ọwẹ ka ri ang-ẹjẹẹ ọpyịyọọ ẹ-ẹpwarịrị nyam bala ala Isirẹlụ, chajị am Amkpaa họ uhye-ọgba bala odehe ẹ-ẹpwụ nya ẹnụtụrụ ịrwọnyẹ gbẹgbịlẹ. Ẹnụtụrụ ọharwiye lẹ, m̄ mwụ ịnyọ la ụkụrwọ ọhọhọ lẹlẹ.’ ”

¹⁸Ụka ká Ohe Oluhye ya ẹla ta iMosisi ọ-ọgbọdọ nya ịSayịnayị kpá lẹ, ọ ya ajwọ ịpapịla imiiye ịlẹ kọọwa lịlọmwụ da ehile ba ha iMosisi lẹlẹ.