Read idege EHE ỌKPỤKPỤ 32 Bible Online

EHE ỌKPỤKPỤ 32 - idege bible

EHE ỌKPỤKPỤ 32

¹Ụka ká ala Isirẹlụ yẹ ká iMosisi hụ tata lụmẹ u-uhye nya ọgbọdọ lẹ, ị tụ gbiriri ka guru Erọn lẹ, ị byoo yẹkẹẹ, “Yẹ mẹ, iMosisi ọlẹ kọ gbahị kpehe bwu ọpyị nya Ijipiti lẹẹ, áhị jẹ ang ọlẹ kọ họ tọọ ọ-ọgbọdọ kaka. Lẹẹlẹ, họ ojiga[21] ọhẹ hahị ọlẹ kọ ka kpahị ụgbẹyị mẹ.”

²Ọọwa, Erọn à wẹ byaa yẹkẹẹ, “Anụ gba ang i-gu arụ nya ịhụ bala anyị alẹng bala anyị anyang nyanụ ịwẹ kanụ kpa wam mẹ.”

³Ọọwa, ịwa wuu à gba ang i-gu arụ nyaa kpa wẹ Erọn lẹlẹ.

⁴Ọọwa, ọ ye ang i-gu arụ lẹ, ọ yaa wulo ju awụlẹ wuu, ya me ụgba nya ẹna lẹlẹ. Ọọwa lẹ, angịnyị wuu à yẹkẹẹ, “Ẹhẹẹ, anụ ala Isirẹlụ, anụ yẹ mẹ, ohe nyahị ọlẹ kọ gbahị kpehe bwu ọpyị nya Ijipiti à lẹẹ lẹlẹ oo!”

⁵Ụka ká Erọn yẹ ọhọhọ nyaa, ọ me ogidi rịrị ị-ịlahị nya ụgba nya ẹna ọọwa. Lẹ, ọ dọna ya je angịnyị yẹkẹẹ, “Ijuju oleeri ọlẹ ọhụhụ nyọka chị ihi ju Amkpaa ka ji.”

⁶Ụka ká ahị ọọnamwụ pyẹ, angịnyị kpa iyo wẹ kaka kịla iya ọ-rụ ila bala ịnya ọhọlawụlẹ. Ọọwa, ị hụhụ ri ang bala ọ-nwa ere lẹ, ị gba gu ụya ọ-họ ta awụlẹ lẹlẹ.

⁷Ọọwa, Amkpaa-à byi iMosisi yẹkẹẹ, “Hireji tịrẹkpẹ lagaga mẹ, chajị angịnyị nyang ịlẹ ká gba kpehe bwu Ijipiti họ ang onyobyi bam lẹ.

⁸Ị nyẹẹkpẹ da ụgbẹyị ọlẹ kam daa ehile kị ka ba jẹ ahyaahị lẹ. Ị họ ukpeku nya ẹna ha ịlaa kpụ ị gbịgba bala ọ-kịla iya họọ lẹ. Ị dọmwụ lalẹẹ ya ẹna ọwẹ nyaa ri ohe ọlẹ kịị nyị gbaa kpehe bwu Ijipiti lẹ.

⁹M̀ jẹ jaabwọ ká angịlẹ la egbeju-ọngịrị lụmẹ kaka ba.

¹⁰Aa bahim kam ju agbama taa, chajị kam taa ayịreji mẹ. Ahụ tị lẹ, m̀ ka họ kaahụ bala anyị ịtụma nyang ka pyẹ ka ri ẹpwụma ọtụka.”

¹¹Ma, iMosisi bịlẹ Amkpaa Ohe Oluhye nyamwụ, juwa byoo yẹkẹẹ, “Amkpaa ee, ịyẹ tị́ du ká ka ju agbama lụmẹ-lụmẹ ịnyị ta angịnyị nyang ịlẹ ká gba kpehe bwu ọpyị nya Ijipiti la ọngịrị ọtụka nyang ịnyị-ị̀?

¹²Ala Ijipiti kà ya ahụ nyị gba angịnyị nyang kpehe chajị nyọka nwaa ị-ịgbọdọ bala ọ-ka taa ayịreji gbanggbang. Lẹẹlẹ, hịnyọ la agbama ojuju, ká bà la ọ-kpa akama ọtụka ọwẹ wẹ angịnyị nyang mẹ.

¹³Aa kpịtịya nya Ebiraham bala Ayịsiki bala iJekọbụ anchẹ nyang jaabwọ ká myị ọnụ nyọka họ ká anyị ịtụma nyaa ka pyẹ ju iru lala ịdịchụ bala jaabwọ ká ya ọpyị ọlẹ kọọwa nyị myị ọnụ haa wẹẹ nyị ka ri nya anyị nyaa gbe oyi myị oyi mẹ.”

¹⁴Ọọwa lẹ, Amkpaa-à pwuru irya nyamwụ lẹ, ọ yẹ angịnyị nyamwụ akama ọlẹ kọ hwàhwa nyọka yaa kaka lẹlẹ.

¹⁵Ọọwa, iMosisi à hireji bwu ọgbọdọ la ajwọ ịpapịla imiiye a-abwọ nyamwụ lẹlẹ. Ị da ehile nya Ohe Oluhye ba ajwọ ịịwa ẹ-ẹkpẹ imimiiye nyaa.

¹⁶Ohe Oluhye lịlọmwụ à họ ajwọ ịwẹ lẹ. Ọwa-ọwa à da ehile baa ịnyịnyị lẹ.

¹⁷Ụka ká iJochuwa wo ụkwa ọchịchị nya angịnyị, ọ byi iMosisi yẹkẹẹ, “Ọmọnyọ nya ẹwụ à lalẹẹ kam wẹẹ wo pwụ ịkampụ nyahị lẹ.”

¹⁸Ọọwa, iMosisi à wẹ yẹkẹẹ, “Ụ́-ụkwa nya ọ-kụrụ aluji à lalẹẹ ka. E-eko nya aluji ọkụrụ-kụrụ à tị lalẹẹ ka. Iru nya eje omwumwu à lalẹẹ lẹ.”

¹⁹Ụka ká iMosisi jẹ ju ịkampụ chwẹẹ, kọ yẹ ẹna nya okpoko ịgọm bala jaabwọ ká angịnyị juwa chewo, agbama nyamwụ wuru pwuuu. Ọọwa, ọ pẹhi ajwọ ịpapịla ịwẹ kaka bene ọ-ọmwụ nya ọgbọdọ lẹlẹ.

²⁰Ọ hu ẹna ọwẹ kị họ-ọ̀ wẹ, ya wulo i-ila lẹ, ọ goo kpọrụ pwụrẹ-pwụrẹ lẹlẹ. Ọ ya wọwọ ju enyi lẹ, ọ hwoo ha ala Isirẹlụ nwa lagbụrụ lẹlẹ.

²¹Ọọwa, iMosisi à tọ Erọn wọ yẹkẹẹ, “Ịyẹ angịlẹ à tị́ họng du ká kpaa ka họ ang onyobyi ọtụka ọlịịlẹ kpong-kpong?”

²²Erọn wẹ byoo yẹkẹẹ, “Ā wụ ẹjẹ tam ka, adam. Ahụ ayịdang tị́ jẹ lẹ, angịlẹ kaa tịtọ nyọka họ ang onyobyi ụka wuu.

²³Ị wẹ ka byim yẹkẹẹ, ‘IMosisi à gbahị kpehe bwu ọpyị nya Ijipiti lẹ, áhị tị jẹ ang ọlẹ kọ họ tọọ kaka. Lẹẹlẹ, họ ohe ọlẹ kọ ka kpahị ụgbẹyị hahị mẹ.’ ”

²⁴Ọọwa, m̄ byaa yẹkẹẹ, “Anụ pwọ ịjang nya okpoko ịgọm nyanụ kpa wam mẹ. Ụka kị kpa wam, kam ya wulo i-ila lẹ, m̄ yaa me ẹna ọlẹ lẹlẹ!”

²⁵IMosisi yẹ jaabwọ ká ala Isirẹlụ họ ẹla kpoye nya oyi, Erọn à tị du lẹ. Ọhọhọ ọọwa du kị hu ịlaa rọọnụ ẹ-ẹga nya aluji nyaa.

²⁶Ọọwa lẹ, ọ godayị ogirigba nya ịkampụ lẹ, ọ dọna gboo yẹkẹẹ, “Ọngọlẹ kọ ji oye nya Amkpaa lẹ aalẹ, ọngọọwa-ā kẹwẹ wẹ ẹga nyam mẹ!” Ọọwa, ala iLivayị wuu à wẹ kaka jịra ẹ-ẹga nya iMosisi lẹlẹ.

²⁷Ọọwa, iMosisi à byaa yẹkẹẹ, “Amkpaa Ohe Oluhye nya ala Isirẹlụ danụ ehile yẹkẹẹ, ‘Ọng myị ọng nyanụ ā hu oge ju ụbwọ kanụ jẹ tụ ịkampụ da bwu ọbaba ọhẹ kele ka ọkịla kanụ nwụ anyịnanụ bala aligu nyanụ bala angị kụ baanụ ba.’ ”

²⁸Ala iLivayị ju ihi nya ẹlẹwẹ. Ị nwụ ala Isirẹlụ angị ụnọ ịta (3,000) lẹpwụ-lẹpwụ ẹnụ ọọwa.

²⁹Ọọwa, iMosisi à byi ala iLivayị yẹkẹẹ, “Alẹ ọlẹ, anụ ayịdang chị ịlọnụ ịgọ ham lala angịkiliya nya Amkpaa lẹ. Anụ họ ịnyị bwula ọlẹ kanụ myị nwụ anyị nya ịlọnụ bala anyịnanụ. Lẹẹlẹ, Amkpaa wahị kụrụụnụ chajị nya ọọwa lẹ.”

³⁰Ahị ọpyẹpyẹ ọọnamwụ lẹ, iMosisi à byi ala Isirẹlụ yẹkẹẹ, “Anụ họ ọhọbịrị onyobyi-obyi lẹ. Ma, m̀ ka kele ka ẹga nya Amkpaa u-uhye ọgbọdọ myịmyị wẹ́ẹ̀. Ọhẹka, Ohe Oluhye ka myị-ị̀ wo ọbịlẹ-bịlẹ nyam, ọ ka hịnyọ hiinu.”

³¹Ọọwa lẹ, iMosisi à tịrẹkpẹ ka ẹga nya Amkpaa lẹ, ọ byoo yẹkẹẹ, “Angịlẹ họ ọhọbịrị onyobyi-obyi lẹ! Ị họ ohe nya okpoko ịgọm ha ịlaa lẹ.

³²Ma, hịnyọhi ang onyobyi ọlẹ kị họ mẹ, chuchuu. Ọ́ tị ri ká ka hịnyọhi haa kaka lẹ aalẹ, à tị̀ tị yịlẹ ẹnyị nyam am hi ụpwụ ọlẹ ká da ẹnyị nya angịnyị nyang ju mẹ.”

³³Ọọwa lẹ, Amkpaa-à byoo yẹkẹẹ, “Ẹnyị nya angịlẹ kị họ ang onyobyi kem m̄ ka yịlẹ hi ụpwụ nyam lẹ.

³⁴Ọlẹẹlẹẹ lẹ, kele ká kpa angịnyị nyang ka ẹga kam bying mẹ. Olegu-ẹrụ nyam ka kpang ụgbẹyị. Ụka tị juwa wẹ ị-ịlahị kam ka yaa akama chajị nya ọhọbịrị nyaa wẹẹ.”

³⁵Ịnyị Amkpaa-à du ẹdụrụ ọhẹ kaka jwaa chajị nyọlẹ kị họ ka Erọn mẹ ẹna nya okpoko ịgọm haa lẹlẹ.