Read idege EHE ỌKPỤKPỤ 33 Bible Online

EHE ỌKPỤKPỤ 33 - idege bible

EHE ỌKPỤKPỤ 33

¹Ọọwa, Amkpaa-à byi iMosisi yẹkẹẹ, “Ahụ bala angịnyị ịlẹ wuu ká gba kpehe bwu Ijipiti ā rụ bwu ẹgẹlẹ mẹ. Anụ rụ kele ka ọpyị ọlẹ kam myị ọnụ nyọka ya ha anyị ịtụma nya Ebiraham bala Ayịsiki bala iJekọbụ mẹ.

²M̀ ka du olegu-ẹrụ ọhẹ kaka kpanụ jilahị. M̀ ka ku ala iKenan bala ala Amọ bala ala iHiiti bala ala iPerisi bala ala iHivi bala ala iJebusi rụ hi ẹga hanụ.

³Ọpyị o-ju eyo bala ọ-há ang hiigu-hiigu anụ wẹẹ jẹ kà lẹ. Am ayịdang á tị ka tanụ jẹ lịlọm ka, chajị anụ ri angị la egbeju-ọngịrị. Ó-ri ịnyị ka, m̀ ka tanụ ayịreji.”

⁴Ụka kị wo ẹla ọ-byị ụrụ ọwẹ, ọ taa olujwo kpori-kpori. Ị́ tụtụm ya ịjang nyaa da kaka.

⁵Ang odudu ri Amkpaa lẹẹ byi iMosisi ene ya nyị byi ala Isirẹlụ yẹkẹẹ, “Anụ la egbeju-ọngịrị lụmẹ. Ó-ri kam bajẹ tanụ ụka ookpokpo oleeri ọlẹ, m̀ ka tanụ ayịreji wuu. Anụ pwọ ịjang nyanụ ịwẹ mẹ. Ọọwa, m̄ ka cheje jaabwọ kam ka họ lanụ wẹẹ lẹ.”

⁶Lẹẹlẹ, o-bwu Ọgbọdọ nya ịSayịnayị ọwẹ kịlahị lẹ, ala Isirẹlụ-ụ́ tụtụm da ịjang kaka.

⁷Ụka ká ala Isirẹlụ-ụ́ chịkụ ẹ-ẹgẹhẹ, iMosisi kaa kpa ọdụ ọhẹ kaka yeji hwẹẹẹ hi ikampụ nyaa. Ọ wụrụ ọdụ ọwẹ ọdụ ọlẹ ká Amkpaa kaa tọ angịnyị. Ọng myị ọng kọ tịtọ nyọka tọ Amkpaa ịtọ nya ẹla ọhẹ kaa kele ka ụwa.

⁸Ụka myị ụka ká iMosis-í ka kele ka ọdụ ọwẹ, angịnyị wuu kaa kpehe godayị ọ-ọnụ nya ẹpwang nya ịlaa juwa kpẹhị dịrọọ gbee kọ ka jụ kele.

⁹Ụka kọ jụ kele kpá, egbamwụ ọtịlẹlẹ ọhẹ kaa hireji kaka kpụba ọ-ọnang nya ọdụ ọọwa. Ọọwa, Amkpaa-à kaa ya ẹla ta iMosisi bwu ẹpwụ nya egbamwụ lẹlẹ.

¹⁰Ụka ká angịnyị á yẹ egbamwụ ọọwa lẹ, ị kaa hirikpẹẹ juwa gbịgba lẹlẹ.

¹¹Amkpaa kaa ya ẹla ta iMosisi a-ahịchịng jaabwọ ká ọngịnyị kaa ya ẹla bala oligu nyamwụ. Ọọwa, iMosis à kaa nyà wẹ ẹga nya ala Isirẹlụ lẹlẹ. Ọngọdụbwọ nya iMosisi kọ ri iJochuwa ọnyị nya iNun tị kaa hi hụ ọ-ọdụ ọwẹ.

¹²Ụka ọọwa, iMosisi byi Amkpaa yẹkẹẹ, “Ịnyịlẹhị lẹ, ahụ à byim am nyị kpa angịlẹ ka ọpyị ọọwa lẹ. Á tị ya jem ọngọlẹ ká ka ya du ẹrụ kpam chị ka. À ya ọwa nyị jẹm yẹẹyẹẹ, ẹla nyam nyị tị họọwa.

¹³Ó-ri ká ẹla nyam-ḿ hang ịnyịlẹhị lẹ aalẹ, tịtị̄ mẹ irya nyang jẹm chajị kam ka juwa myịng ẹrụ bala ọ-họ kpụng ịpyọ kịlahị-ịlahị mẹ. Aa kpịtịya ịnyịnyị mẹ, ahụ à chụ alụma ọlẹ nyọka ri angịnyị nya ịlọng lẹ.”

¹⁴Amkpaa wẹ byị iMosisi yẹkẹẹ, “M̀ ka kpang chị. M̀ ka ya ọkụrụ-kụrụ hang ịnyịnyị.”

¹⁵Ọọwa, iMosisi à byi Amkpaa yẹkẹẹ, “Ó-ri ká ka bajẹ bala ahị ka aalẹ, ā myị kahị rụ bwu ẹgẹlẹ koo.

¹⁶Ó-ri ká tahị jẹ ka, angịnyị-ị́ ka jẹ ẹla nyam bala ịnya angịnyị nyang nyị hang ka. Ọ-bajẹ tahị nyang à du ká angịnyị ka jẹ ahị nyị datị hi angịnyị ịkịla wuu am odehe lẹ.”

¹⁷Ọọwa, Amkpaa-à byi iMosisi yẹkẹẹ, “M̀ ka họ ang ọlẹ ká bịlẹ wẹ lẹ, m̀ jẹng yẹẹyẹẹ. Ẹla nyang tị ham ịnyịnyị.”

¹⁸Ọọwa, iMosisi à byi Amkpaa yẹkẹẹ, “Mẹ ụmụmẹ nyang jẹm mẹ-ẹ̀.”

¹⁹Amkpaa wẹ byoo yẹkẹẹ, “M̀ ka kpa ụ́hị nyam chịpwụrụ bwu ịlahị nyang. Ụka ọọwa, m̀ ka wụrụ ẹnyị nyam ọlẹ kọ ri Amkpaa dodehe ká ka wo. M̀ kaa họ ọnahị bala ọ-yẹ ahyẹẹrwẹrwa ẹ-ẹga nya ọngọlẹ kọ ri irya nyam.

²⁰Á tị ka jẹ-ẹ̀ yẹ ahị nyam koo, chajị ọngọngọhẹ-ẹ́ ka jẹ-ẹ̀ yẹm, ọọ juwa lọhịhị myị ka.

²¹Ẹgẹhẹ jam jum chwẹẹ ká ka godayị rịrị u-uhye nya ẹjwọ.

²²Ụka ká ụmụmẹ nyam á ka chịpwụrụ, m̀ ka yang godayị i-iwa nya ẹjwọ, kam ka yụbwọ nyam keng gbee kam ka chịpwụrụ kam kpá ene.

²³Ọọwa lẹ, m̄ ka tụụbwọ nyam kẹkpẹ, ká ka yẹ ẹkpẹ nyam lẹlẹ. Á tị ka jẹ-ẹ̀ yẹ ahị nyam ka.”