Read idege EHE ỌKPỤKPỤ 34 Bible Online

EHE ỌKPỤKPỤ 34 - idege bible

EHE ỌKPỤKPỤ 34

¹Ọọwa, Amkpaa-à byi iMosisi yẹkẹẹ, “Be ajwọ ịpapịla imiiye ịkịla ịlala ịnya ọgbanyẹ kpa warị mẹ. Ọọwa, m̄ ka da baa ala ịlẹ kam da ba ịnya ọgbanyẹ ịlẹ ká ya bene lẹlẹ.

²Á nwụlanọ ijuju lụtụrụ lẹ, à wẹ kaka tọm u-uhye nya Ọgbọdọ nya ịSayịnayị mẹ.

³Ọngọngọhẹ-ẹ́ ka bang warị lee ọ-jẹ wẹ ọnaabwọ nya ọgbọdọ koo. Ịna bala ịkpịlọ-ọ́ ka ri amẹ ọ-ọmwụ nya ọgbọdọ ọwẹ ka ịnyịnyị.”

⁴Ọọwa, iMosisi à be ajwọ ịpapịla imiiye ịlala ịnya ọgbanyẹ lẹlẹ. Ahị ọpyẹpyẹ ọọnamwụ, ọ kpaa kele ka uhye Ọgbọdọ nya ịSayịnayị jaabwọ ká Amkpaa dọọ ehile ya nyị họ.

⁵Ọọwa, Amkpaa-à hireji ẹ-ẹpwụ nya egbamwụ warị kaka godayị ta iMosisi lẹ, ọ gu ịlọmwụ ẹnyị nya Amkpaa lẹlẹ.

⁶Amkpaa chịpwụrụ bwu ịlahị nya iMosisi lẹ, ọ ya ẹla gboo yẹkẹẹ, “Am kpakpakpa à ri Amkpaa lẹ. Am Amkpaa ri Ohe Oluhye ọlahyẹẹrwẹrwa bala ọlọnahị ọlẹ koo ju agbama hyaa ka, kọ la ọháha o-gbu enyi-ka bala o-ju ọdahịhile.

⁷M̀ kaa họ ọnahị ẹ-ẹga nya ụnụnụụnọ nya angịnyị. M̀ kaa hịnyọhi ọhọbịrị bala ang inyibyi ịhọhọ nya angịnyị. M̀ tị kaa ya uri nya ang onyobyi ọhọhọ nya adịda wu anyị nyaa bwu oyi ọhata ju ka ohene.”

⁸Ọọwa, iMosisi à hiri ahị kpẹẹ ahyaahị lẹ, ọ gbịgba lẹlẹ.

⁹Lẹ̀, ọ yẹkẹẹ, “Ọngọlahị ee, ó-ri ká ẹla nyam-ḿ kpụng ịpyọ lẹ aalẹ, à bajẹ tahị mẹ, chuchuu. M̀ jẹ ká angịlẹ la egbeju-ọngịrị, ma hịnyọhi ang onyobyi bala ịhọbịrị nyahị, ká kpahị lala angịnyị nyang mẹ.”

¹⁰Ọọwa, Amkpaa-à byi iMosisi yẹkẹẹ, “M̀ jam nwa iro ta ala Isirẹlụ lẹ. M̀ ka họ ụkụrwọ ẹbyẹbyị ịtụka a-ahị nyaa. Ụkụrwọ ịịwa ka ri ịlẹ ká ọngọngọhẹ-ẹ́ họ ha ẹpwụmẹ ọhẹ-lọhẹ nya odehe ẹnẹhẹ lẹka. Ịwa wuu ka kpẹhị nya ịlaa yẹ ụkụrwọ iluhi-uhi ịlẹ ká am Amkpaa wẹẹ ka họ hanụ.

¹¹Anụ kpa ehile ịlẹ wuu kam wẹẹ ya hanụ alẹ mẹ. M̀ ka ku ala Amọ bala ala iKenan bala ala iHiiti bala ala iPerisi bala ala iHivi bala ala iJebusi rụ hi ẹga hanụ.

¹²Anụ kpẹhị chịng, kanụ la ọnụ ọmyịmyị ọhẹ-lọhẹ ta angịlẹ kị kụ ọpyị ọlẹ kanụ wẹẹ ka koo. Ọlịnyị ka kpanụ kaka wu eri.

¹³Anụ ka tụrụ ogidi ikiliya nyaa bala ajwọ iweji nyaa bala ọ-ta ekpeku nya Achẹra, ohe ọnyang nyaa ayịreji.

¹⁴“Ānụ ka gbịgba ha ijiga ịkịla ka, chajị am Amkpaa ri Ohe Oluhye ọ-jẹ ijiiji.”

¹⁵Ānụ la ọnụ ọmyịmyị ọhẹ-lọhẹ ta angịlẹ kị kụ ọpyị ọlẹ kanụ wẹẹ ka koo. Ó-ri ịnyị ka, ị ka wụrụụnụ ụka kị ka gbịgba ha ijiga nyaa. Iyo ịlẹ kị ya kịla iya ha ijiga nyaa ka maanụ ma la oriri.

¹⁶Ó-ri ká anyị alẹng nyanụ á ye anyị anyang nyaa, anyang ịịwa ka kpa anyị alẹng nyanụ rụ kaka gbịgba ha ijiga ijiga nyaa.

¹⁷Anụ họ ijiga nya oje ka.

¹⁸“Anụ ka la ọhụhụ nya Ịkaa Ọmịrịị-mịrị-ka. Ánụ-ụ̀ ri ịkaa ọmịrịị-mịrị-ka ẹnụtụrụ irwiye gbẹgbịlẹ jaabwọ kam danụ ehile mẹ. Ẹ-ẹpwụ nya ọya nya Abiibu ānụ ka la ọhụhụ nya ang oriri ọlẹ lẹ, chajị ọya ọọwa anụ gba kpehe bwu ọpyị nya Ijipiti lẹ.

¹⁹Ọnyị ọlẹng nya ọgbanyẹ-ọgbanyẹ ọnyị myị ọnyị tụ ọnyị nya ọgbanyẹ nya iyo ịlẹpwa nyanụ ri nyam.

²⁰Anụ tị ka ra ọnyị nya ọgbanyẹ nya obyiyó tịrẹkpẹ bwula ọ-ya ọnyị-ọkpịlọ nyọọ nyẹ. Ọ́ tị ri kanụ ka nyọọ tịrẹkpẹ ka aalẹ, anụ ka mwọọ ido. Anụ-ụ̀ nyẹ ọnyị ọlẹng nya ọgbanyẹ nyanụ ọnyị myị ọnyị tịrẹkpẹ. “Ọngọngọhẹ nyanụ ā wẹ kaka gbịgba ham la ọ-kpa ọhaha warị ka lẹ koo.

²¹“Ẹ-ẹpwụ nya ẹnụtụrụ ịrwọnyẹ anụ ka họ ụkụrwọ nyanụ lẹ. Anụ ka mwụ ịnyọ ẹnụtụrụ ọharwiye, ó-riri ka ụka ọọwa-á ri ụka nya ẹrụ owuwu lee ịnya ang-ẹrụ ọwụwụ.

²²“Anụ ka la Ọhụhụ nya Ang-ẹrụ Ọwụwụ ụka kanụ dọmwụ nyọka chị ịrayịsị iwiiti nya ọgbanyẹ nyanụ. Anụ ka la Ọhụhụ nya Adáa la ọmyịmyị nya ẹka ụka kanụ kaa nwụla ang-ẹrụ nyanụ kpa nyà wẹ ẹpwa.

²³“Ugbabwọ ịta ẹ-ẹpwụ nya ẹka ọnyị myị ọnyị alẹng nyanụ à ka wẹ kaka gbịgba ham am Ọngọlahị Amkpaa Ohe Oluhye nya Isirẹlụ lẹ.

²⁴Ụka kam ku alụma ịkịla rụ hi ẹga hanụ, kam pyẹ ọpyị nyanụ ẹpwụ lẹ, ọngọngọhẹ-ẹ́ ka tịtọ nyọka nunu ọpyị lụka nya ọhụhụ ịta ịwẹ kaka.

²⁵“Ụka kanụ ka ya iyo kịla iya ham, ānụ ya ịkaa ọmịrịị-mịrị ha ọhaha ham kpịlọ koo. Ānụ tị hi ọhẹ-lọhẹ nya iyo ọlẹ kị nwụ lụka nya ọhụhụ nya Ang Oriri Ọchịpwụrụ nọ gbe ahị ọpyẹpyẹ ọọnamwụ koo.

²⁶“Anụ ka kpa ang ịlẹhị-ịlẹhị bwu ẹpwụ nya ang-ẹrụ inyeewe ịlẹ kanụ wụ bwu ẹrụ nyanụ wẹ ẹpwa nya Amkpaa. “Ānụ kpa enyi-ẹmẹ nya ịnịna nya ẹmwụ kpụ́ ọnyị nyamwụ koo.”

²⁷Ọọwa, Amkpaa-à byi iMosisi yẹkẹẹ, “Da ala ịlẹ wuu ju mẹ, chajị u-uhye nya ala ịwẹ m̄ nwa iro tang bala ala Isirẹlụ lẹ.”

²⁸IMosisi hụ ụ-ụwa ta Amkpaa ahị ọpyẹpyẹ iwo ine tụ odu iwo ine gbẹgbịlẹ, la ọ-kpa ang oriri lee enyi ọnwanwa ka ọnụ ka. Ụka ọọwa, ọ da iro ọnwanwa ba ajwọ ịpapịla ịịwa lẹ. Iro ọnwanwa ọọwa à ri Ehile Iwo lẹ.

²⁹Ụka ká iMosisi hireji bwu Ọgbọdọ nya ịSayịnayị la ajwọ ịlẹ kị da Ehile Iwo ba, ahị nyamwụ juwa hụ́ myịrị-myịrị ọọ-la ọlẹ kọ ya ẹla ta Amkpaa. Ọwa, ayịdang á tị jẹ ịnyị ka.

³⁰Ụka ká Erọn bala angịnyị wuu yẹ jaabwọ ká ahị nya iMosisi juwa hụ́, ị ju uhi nyọka jẹ jwoo chwẹẹ.

³¹Ma, iMosisi bẹ ẹkọ wụrwaa. Ọọwa, Erọn bala alegbeju nya ala Isirẹlụ à kele ka ẹga nyamwụ lẹ, ọ ya ẹla taa lẹlẹ.

³²Ụka kọ nọ chẹẹ lẹ, ala Isirẹlụ wuu à wẹ kaka dagaga ju iMosisi lẹ, ọ ya ehile ịlẹ wuu ká Amkpaa ya họọ ọ-ọgbọdọ nya ịSayịnayị haa lẹlẹ.

³³Ụka ká iMosisi ya ẹla taa kpá lẹ, ọ hu apwụ ọhẹ ke ịlọmwụ a-ahị lẹlẹ.

³⁴Ụka myị ụka kọ tị ka ka ẹpwụ nya Ọdụ nya Amkpaa kaka ya ẹla ta Amkpaa, ọ kaa nwụlọọ hi ịlọmwụ. Ụka kọ kpehe bwu ụwa kọ ka ya je angịnyị ẹla ọlẹ ká Amkpaa ya,

³⁵ị kaa yẹ jaabwọ ká ahị nyamwụ juwa hụ́ myịrị-myịrị. Ọọwa, ọ kaa ya apwụ ke ịlọmwụ a-ahị myịmyị gbee da ka ụka kọ ka tịrẹkpẹ kaka ya ẹla ta Amkpaa lẹlẹ.