Read idege EHE ỌKPỤKPỤ 35 Bible Online

EHE ỌKPỤKPỤ 35 - idege bible

EHE ỌKPỤKPỤ 35

¹Ọọwa, iMosisi à wụrụ aluche nya Isirẹlụ wuu kaka tụguru lẹ, ọ byaa yẹkẹẹ, “Ịlẹ ri ehile ịlẹ ká Amkpaa danụ kanụ ka kpa.

²Ẹnụtụrụ ịrwọnyẹ ānụ ka kpa họ ụkụrwọ nyanụ lẹ. Ẹnụtụrụ ọharwiye ri ẹnụ ọlịgọgọ, ẹnụ ọ-mwụ ịnyọ dụmwọ ham am Amkpaa. Ọngọngọhẹ kọ họ ụkụrwọ ẹnụ ọọwa aalẹ, ị ka nwọọ.

³Ānụ dọmwụ tụ ila ju ẹ-ẹpwa nyanụ Ẹnụtụrụ Ọhịnyọ Lụkụrwọ ọwẹ kpong-kpong ka.”

⁴IMosisi byi ala Isirẹlụ wuu yẹkẹẹ, “Ọlẹ ri ehile ọlẹ ká Amkpaa danụ kanụ ka kpa.

⁵Anụ hu ọhaha ha Amkpaa mẹ. Ọng myị ọng kọ myị ọnụ nyọka hu ha ịnyị aalẹ, ang ịlẹ kọ ka kpa kaka ha ọhaha ọọwa ri okpoko ịgọm bala bala okpoko onyoowuru bala oje ọnyọmịla bala

⁶apwụ ọnyịịla-ọnyịịla bala iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị bala apwụ ọlẹ kị nụ la egbii nya ẹmwụ.

⁷Ang ịkịla ri ugba nya omilodo ọlẹ kị ju ido ọnyọmịla bala ugba ọlẹ kị du yẹẹyẹẹ bala ekeji nya akechiya bala

⁸ida o-ju itinika bala etiji ichoru kwọkwọ ịlẹ kị ka ya ju ida ọlịgọgọ bala iya nya ịtangare bala

⁹ẹjwọ nya onikisi bala ajwọ ịnyịịla-ịnyịịla ịkịla ịlẹ kị ka ya ku ẹfọdụ bala ang ọdọkịlẹtụ nya ọngọkiliya.

¹⁰“Angị jẹ ụkụrwọ yẹẹyẹẹ ịlẹpwụ nyanụ ā kẹwẹ kị họ ang myị ang ịlẹ ká Amkpaa da ehile mẹ.

¹¹Ang ịịwa ri Ọdụ nya Amkpaa bala ọdụ ọdaga jwoo bala ang ị-da kụrwọọ bala apata ịkụrẹchẹ bala ekeji iweji bala ekeji ịhịlabwọ bala ịtachị bala ang ị-da ịtachị ọ-ọmwụ.

¹²Ang ịkịla ri Akpa nya Iro bala igbilo ị-kpa kpa olo nyamwụ bala ọnụ ọkụrwọọ-kụrụ bala apwụ okeke ọlịlahị nyamwụ bala

¹³itebwuru bala igbilo nyamwụ bala ang-abwọ nyamwụ bala ịkaa ọlịgọgọ bala

¹⁴ang ọ-ya itinika rịrị bala itinika bala ida nyaa bala

¹⁵ogidi okiliya nya ịtangare bala igbilo nyamwụ bala ida ọlịgọgọ bala ịtangare ochoru kwọkwọ bala apwụ o-ke ọnang nya Ọdụ Ọlịgọgọ.

¹⁶Ang ịkịla ri ogidi okiliya ọ-rụ ila bala ụbaala nya oje ọnyọmịla ọlẹ kị họ jwoo bala igbilo nyamwụ bala ang-abwọ nyamwụ wuu bala ẹja ọtabwọ bala ẹga ọ-ya rịrị bala

¹⁷ịpwụ ịlẹ kị ka ya dagaga ju ọdọda nya Ọdụ Ọlịgọgọ bala

¹⁸iloo bala iri nya Ọdụ nya Amkpaa bala ịnya ọdọda ọdagaga jwoo bala

¹⁹ịwụrụ ịnyịịla-ịnyịịla ịlẹ ká angịkiliya ka kụrụ ụka kị ka myị ẹrụ ham ẹ-ẹga Ọlịgọgọ. Ịịwa ka ri ịwụrụ ịlịgọgọ ịlẹ ká Erọn bala anyị nyamwụ ka kụrụ.”

²⁰Ọọwa, ala Isirẹlụ wuu à yegiri bwu ẹga nya iMosisi lẹlẹ.

²¹Ụka ọọwa, ọng myị ọng ọlẹ kọ myị lọkịlẹtụ ọgbagbịla nyọka hu ha kpa ọhaha warị wẹ Amkpaa chajị kị ka kpa nwụ Ọdụ Ọlịgọgọ. Ị kpa ang myị ang ịlẹ kị baba nyọka kpa họ ụkụrwọ nya ịgba ọgbagba ụ-ụwa bala ịnyọka kpa ga ang ịkụrụ-kụrụ nya angịkiliya.

²²Ọọwa, alẹng bala anyang ịlẹ wuu kị myị lọkịlẹtụ ọgbagbịla nyọka hu ha à kpa ịmapẹ bala ịjang bala ang i-gu arụ bala and idoomyi bala ang-abwọ datị-datị ịlẹ kị họ lokpoko ịgọm warị kaka kịla iya o-nyí kile-kile ha Amkpaa lẹlẹ.

²³Ọng myị ọng ọlẹ kọ la ịpwụ ịnyịịla-ịnyịịla bala iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị bala ịpwụ ịlẹ kị kpa egbii nya ẹmwụ họ bala egba nya imilodo ịlẹ kị ju ido ọnyọmịla lee egba ịnyịịla-ịnyịịla wuu kpaa warị kaka ha.

²⁴Angịlẹ wuu kị la okpoko onyoowuru lee oje ọnyọmịla kpa ọhaha nya ang ịịwa wẹ Amkpaa. Angị tị la ekeji nya akechiya ịlẹ kị ju apyobwuna ẹ-ẹpwụ nya ụkụrwọ ọọwa kpa warị.

²⁵Ọnyang ọnyị myị ọnyị kọ jẹ nụ apwụ yẹẹyẹẹ wuu kpa iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị bala ịpwụ ịnyịịla-ịnyịịla ịlẹ kị nụ warị.

²⁶Anyang ịlẹ wuu kị myị lọkịlẹtụ ọgbagbịla warị kaka nụ ịpwụ la egbii nya ẹmwụ chajị nya ụkụrwọ ọọwa.

²⁷Alegbeju kpa ajwọ nya ọnikisi bala ajwọ ịnyịịla-ịnyịịla ịkịla ịlẹ kị ka ya ju ẹfọdụ bala ang ọdọkịlẹtụ.

²⁸Ị kpa etiji ichoru kwọkwọ ịlẹ kị ka ya ju ida ọlịgọgọ bala ịtangare. Ị kpa ida ọlẹ kị ka ya ju itinika ịnyịnyị.

²⁹Anyang bala alẹng nya ala Isirẹlụ ịlẹ wuu kị myị lọkịlẹtụ ọgbagbịla kpa ọhaha nyaa wẹ Amkpaa chajị nya ụkụrwọ ọlẹ kọ da iMosisi ehile ya nyị họ.

³⁰Ọọwa, iMosisi à byi ala Isirẹlụ yẹkẹẹ, “Anụ yẹ mẹ, Amkpaa chụ iBesalẹlụ ọnyị nya Uri ọlẹ ká adamwụ-ọgbahị ri iHuu o-bwu imwawụ nya iJuda lẹ.

³¹Ọ tị ya ọngịrị nyamwụ[22] juwa tọọ bala ẹla ọjẹjẹ bala irya ọ-kpa họ ụma nya ịbańg ọnyị myị ọnyị wuu

³²nyọka gu ang ịna ịnyịịla-ịnyịịla bala ọ-họ ụma nya ang datị-datị lokpoko ịgọm bala okpoko onyoowuru bala oje ọnyọmịla bala

³³ọ-ka be ajwọ ịnyịịla-ịnyịịla, wụlaa nya ịjang bala ọ-jẹ kọ ekeji bala ụma nya ịbańg ịkịla datị-datị.

³⁴Amkpaa ya irya họọ bala Oholiyabụ ọnyị nya Ahisamakị bwu imwawụ nya ịDan nyọka mẹ ang jẹ angịkịla.

³⁵Ọ ya irya haa nyọka jẹ-ẹ̀ họ ụma nya ụkụrwọ ọnyị myị ọnyị lala alịbańg ị-gu ịna nya ang datị-datị ba ajwọ bala ịpwụ bala angị nụ ịpwụ ịnyịịla-ịnyịịla bala ọ-nọmwụ ju ang la iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị.