Read idege EHE ỌKPỤKPỤ 36 Bible Online

EHE ỌKPỤKPỤ 36 - idege bible

EHE ỌKPỤKPỤ 36

¹“Lẹẹlẹ, iBesalẹlụ bala Oholiyabụ bala angịlẹ wuu ká Ohe Oluhye ya irya nya ang ọ-jẹ họ ha, kị jẹ jaabwọ kị ka họ ang myị ang nya Ọdụ nya Amkpaa ka họ ụkụrwọ ọwẹ kpẹẹkpẹẹ jaabwọ ká Amkpaa da ehile ya nyị họ.”

²Ọọwa, iMosisi à wụrụ iBesalẹlụ bala Oholiyabụ bala angị jẹ ụkụrwọ ịkịla ịlẹ ká Amkpaa ya irya nya ang ọ-jẹ họ ha, kị myị ọnụ nya ụkụrwọ ọwẹ ọhọhọ kị ka wẹ ka dọmwụ nya ụkụrwọ ọhọhọ lẹlẹ.

³Ị ye bwu ẹga nya iMosisi ang-ahị ịlẹ wuu ká ala Isirẹlụ kpa warị chajị nyọka kpa nwụ Ọdụ Ọlịgọgọ. Angịnyị kịnyaa la o-juwa kpa ang-ahị nyaa warị ịnyịnyịịnyị ẹnụ myị ẹnụ lụtụrụ.

⁴Ọọwa, angị jẹ ang ịlẹ wuu kị juwa họ ụkụrwọ nya Ọdụ nya Amkpaa ọnwụnwụ à rụ bwu ẹga nya ụkụrwọ kaka

⁵byi iMosisi yẹkẹẹ, “Angịnyị jam kpa ang-abwọ warị kpoye nyọlẹ kọ baba nya ụkụrwọ ọlẹ ká Amkpaa ya nyị họ lẹ̀-ẹ̄.”

⁶Ọọwa, iMosisi à du ẹrụ kaka byi ala Isirẹlụ wuu ya ọngọhẹ nyị myịmyị kpa ang-ahị warị chajị nya Ọdụ nya Amkpaa kaka lẹlẹ. Ọọwa, ị hwabwọ la ọ-kpa ọhaha kele lẹlẹ.

⁷Ang-abwọ ịlẹ kị kpa kaka tụguru wuu ju iru kpụ ị ka nwa ụkụrwọ ọọwa wuu hi.

⁸Angị jẹ ụkụrwọ gụ wuu ẹ-ẹpwụ nya angị juwa họ ụkụrwọ ọwẹ à họ Ọdụ nya Amkpaa lẹ. Ị kpa egbile nya ịpwụ iwo họọ. Ịpwụ ịịwa ri ịlẹ kị nụ yẹẹyẹẹ la iwu inyuukpuukpo bala ịnyịmịla gbuuu bala ịnyẹrị-nyẹrị ịlẹ kị nụ ọmwụ nya ihwoto nya alegu icherubim ba.

⁹Egbile nya ịpwụ ịwẹ wuu memeeme. Udiyo nya ọnyọnyọọnyị nyaa ri apatẹ iwo ine kụrụ imiiye (42). Ẹpwụ ojuju ri apatẹ ịrwọnyẹ.

¹⁰Ị ya egbile ịrụ ịhyẹ gá ju awụlẹ ri ebwo ọhẹ. Ị ya egbile ịrụ ịkịla gá ju awụlẹ ri ebwo ọkịla.

¹¹Ị gá ang ịkịlẹlẹ-kịlẹlẹ la apwụ onyuukpuukpo ju ugbọọnụ nya apwụ ọlẹ kọ da wẹ odehe nya ebwo ọnyọnyọọnyị.

¹²Ị gá ang ịkịlẹlẹ-kịlẹlẹ ịwẹ iwo ịrụ ju ebwo nya apwụ nya ọgbanyẹ. Ị gá iwo ịrụ (50) ju ebwo nya apwụ ọkịla pwoku ịnya ọgbanyẹ.

¹³Ị họ apata ịkụrẹchẹ iwo ịrụ (50) ju ẹga kị ka wu ịpwụ ịwẹ ku awụlẹ kị ka la ookpokpo.

¹⁴Ọọwa, ị họ ang ọlẹ kị ka ya dakụrụ Ọdụ lẹlẹ. Ị kpa egbile nya ịpwụ iwo kụrụ ookpokpo ịlẹ kị nụ la egbii nya ẹmwụ họ ang ọdakụrụ Ọdụ.

¹⁵Ị haa wuu memeeme. Udiyo nyaa ri apatẹ iwo ine kụrụ ịrụ (45). Ẹpwụ ojuju nyaa ri apatẹ ịrwọnyẹ.

¹⁶Ị ya egbile ịrụ ịhyẹ gá ju awụlẹ ri ebwo ọhẹ. Ị ya egbile ịrwọnyẹ ịkịla gá ju awụlẹ ri ebwo ọkịla.

¹⁷Ị ya ang ịkịlẹlẹ iwo ịrụ ju ugbọọnụ ugbile ohyẹẹkpẹ nya ebwo ọhẹ, ị ya ang ịkịlẹlẹ iwo ịrụ ju ugbọọnụ nya ebwo ọkịla.

¹⁸Ị họ apata ịkụrẹchẹ iwo ịrụ la oje ọnyọmịla kị ka ya wu ebwo imimiiye ịwẹ ku awụlẹ ká ang ọdakụrụ ọdụ ọwẹ ka ju awụlẹ la oookpokpo.

¹⁹Ị họ ang ịdakụrụ imiiye ịkịla. Ị kpa ugba nya omilodo ọlẹ kị ju ido ọnyọmịla họ ọhẹ, ị kpa ugba ọnyịịla-ọnyịịla họ ọkịla ká ịwẹ ka ri ang ịdakụrụ olodehe.

²⁰Ọọwa, ị kpa okoji nya akechiya họ iweji nya Ọdụ lẹlẹ.

²¹Uhye ọlala nya oweji ọnyọnyọọnyị lala apatẹ iwo kụrụ ịrụ. Ẹpwụ ojuju nyaa lala apatẹ imiiye ba ẹhya.

²²Ị họ ekeji ipyiye-pyiye imiiye kwoo ịkịka ẹga kị ka ya ekeji iweji ịwẹ ku awụlẹ. Ekeji iweji wuu la ang ipyiye-pyiye ịwẹ.

²³Ị họ ekeji iweji iwo imiiye nya ịkịka oledii.

²⁴Ị họ ang ikperi-kperi iwo ine ịlẹ kị ka ya daa ọ-ọmwụ nyọka wu ang ipyiye-pyiye nyaa kpa.

²⁵Ị họ iweji iwo imiiye kụrụ ine nya ịkịka ọlẹtẹ.

²⁶Ị họ ang ikperi-kperi iwo ine lokpoko onyoowuru ịlẹ kị ka ya da ọ-ọmwụ nya iweji ịwẹ. Okoji oweji ọnyọnyọọnyị la ang ikperi-kperi imiiye.

²⁷Ị họ ekeji iweji ịrwọnyẹ nya ịkịka ọlẹkpẹ ọlẹ kọ ri ọlọmwẹnụ-obyi nya Ọdụ Ọlịgọgọ.

²⁸Ị họ ekeji iweji imiiye ịlẹ kị ka ji ịkpanggọ imiiye ịlẹkpẹ nyamwụ.

²⁹Ị họ ekeji iweji imiiye ịwẹ ju lawụlẹ e-ekpeleji lẹ, ị ya ọmapẹ oloje-oje ọhẹ waa bawụlẹ u-uhye lẹlẹ. Ịịwẹ ị họ ọ-ọkpanggọ ọnyọnyọọnyị lẹ.

³⁰Lẹẹlẹ, ekeji iweji ịlọkpanggọ wuu tụ ju lawụlẹ la ineku. Ang ikperi-ikperi ị-daa ọ-ọmwụ wuu la iwo kụrụ imiiye.

³¹Ọọwa, ị kpa okoji nya akechiya họ ekeji ịhịlabwọ ịlẹ kị ya da bwu ịtachị ịhyẹ ka ịtachị ịkịla lẹlẹ. Ekeji ịhịlabwọ ịrụ wu ịtachị ịlụpa ọhẹ bawụlẹ.

³²Ịrụ ịkịla wu ịtachị ịlụpa ọkịla bawụlẹ. Ekeji ịhịlabwọ ị ya wu ịtachị ịlẹkpẹ ọ-ọmwẹnụ-obyi nya Ọdụ nya Amkpaa bawụlẹ ịnyịnyị lẹ.

³³Ị ya okoji ọhịlabwọ ọlẹpwarịrị da dịrẹ udiyo nya ịkịka ọnyọnyọọnyị bala ẹkpẹ nya Ọdụ Ọlịgọgọ. Ị ya da ekilo nya ịtachị ịịwa.

³⁴Ị họ ịmapẹ nya okpoko ịgọm ju ịkịka nya ịtachị ịlẹ kị ka kpa wu ekeji ịhịlabwọ kpa. Ị kpụ okpoko ịgọm kụrụ ịtachị bala ekeji ịhịlabwọ wuu.

³⁵Ọọwa, ị họ apwụ okeke ọlẹ kị kpa iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị bala ịpwụ ịnyịịla-ịnyịịla nụ lẹlẹ. Ọngọ jẹ ụkụrwọ yẹẹyẹẹ kpa owu-owu hwo ihwoto nya icherubu bọọ.

³⁶Ị họ ekeji iweji ine la okoji nya akechiya lẹ, ị kpụ okpoko ịgọm kụrwọọ gbịlẹ-gbịlẹ lẹlẹ. Ị họ ịmapẹ nya okpoko ịgọm ju ekeji iweji ịịwa bala ang ikperi-kperi nya okpoko ịgọm ịlẹ kị la ya daa ọ-ọmwụ.

³⁷Ị kpa iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị bala ịpwụ ịnyịịla-ịnyịịla họ apwụ o-ke ọnang nya Ọdụ Ọlịgọgọ. Ọngọ jẹ ụkụrwọ yẹẹyẹẹ nọmwụ jwoo.

³⁸Ọọwa, ị họ ekeji iweji ịrụ bala apata ịkụrẹchẹ nyaa lẹlẹ. Ị kpụ okpoko ịgọm kụrụ egbeju nya ekeji ịwẹ bala ákpa nyaa. Ị kpa oje ọnyọmịla họ ang ị-daa ọ-ọmwụ ịrụ ịnyịnyị.