Read idege EHE ỌKPỤKPỤ 37 Bible Online

EHE ỌKPỤKPỤ 37 - idege bible

EHE ỌKPỤKPỤ 37

¹Ụka ọọwa, iBesalẹlụ kpa okoji nya akechiya họ Akpa nya Iro. Udiyo ọlala nyamwụ la apatẹ ịta ba eku ịta (3¾). Ẹpwụ ojuju nyamwụ la apatẹ imiiye ba eku. Uhye nyamwụ ri apatẹ imiiye ba eku ookpokpo (2¼) ịnyịnyị.

²Ọ kpụ okpoko ịgọm ọlahịchịng kụrwọọ ẹ-ẹpwụ tụ ahị. Ọ họ ugbọọnụ ọdagaga jwoo wuu lokpoko ịnyịnyị.

³Ọ hya ịmapẹ nya okpoko ịgọm jwoo ịkịka inine nyamwụ kị ka ya igbilo jwaa kpa kpolo nyamwụ.

⁴Ọ kpa okoji nya akechiya kọ igbilo bala ọ-kpụ okpoko ịgọm kụrwaa wuu.

⁵Ọ ya igbilo ịịwa dụrụ ịmapẹ ịlịkịka nya Akpa ọwẹ kị ka kpa hwoo.

⁶Ọ họ ọnụ nya Akpa ọwẹ lokpoko ịgọm ọlahịchịng. Udiyo nyamwụ la apatẹ ine. Ẹpwụ ojuju nyamwụ la apatẹ imiiye ba eku.

⁷Ọ kpa okpoko ịgọm ọlẹ kị hyà yẹẹyẹẹ họ alegu-icherubu imiiye.

⁸Ọ họ ọhẹ kụ ọnụ nya Akpa nya Iro ka egbeju ọhẹ, ọ họ ọkịla kụ ka egbeju ọkịla. Ọ tị haa bala ọnụ nya Akpa ju awụlẹ la ookpokpo.

⁹Alegu iCherubu ịwẹ jahị dawụlẹ. Achwọ nyaa pyẹ maaa ke ọnụ nya Akpa ọwẹ.

¹⁰Ọ kpa okoji nya akechiya họ itebwuru ọọwa. Udiyo nyamwụ la apatẹ ịta gbẹgbịlẹ. Ẹpwụ ojuju nyamwụ ri ẹpẹtẹ ookpokpo ba ẹhya. Uhye ọlala nyamwụ la apatẹ immiye ba eku.

¹¹Ọ kpụ okpoko ịgọm ọlahịchịng kụrwọọ bala ọ-họ ugbọọnụ ọdagaga jwoo lokpoko ịgọm.

¹²Ọ họ ugbụụrụ ọlẹ kọ ju ẹpwụ lala ẹpwụtụbwọ ju itebwuru ọwẹ. Ọ kpụ okpoko ịgọm kụrwọọ dagaga ju.

¹³Ọ hya ịmapẹ nya okpoko ịgọ ju itebwuru ọwẹ ịkịka inine ẹga ká ata nyamwụ ji kị ka kpa kpọọ.

¹⁴Ị ya ịmapẹ ịịwa ju ba ugbọọnụ oluhye ọdagaga ju itebwuru ba chajị ị wu igbilo ị-kpa kpa olo nya itebwuru kpa.

¹⁵Okoji nya akechiya ọ kpa họ igbilo ị-kpa kpa olo nya itebwuru lẹ. Ị kpụ okpoko ịgọm kụrwaa.

¹⁶Ọ kpa okpoko ịgọm ọlahịchịng họ ịja ị-kpa họ ụkụrwọ u-uhye nya itebwuru ọwẹ wuu tụ ịja ịpẹpịlẹ bala ikpori-kpori bala ekeku ịgbajị ị-ya ere okiliya ju.

¹⁷Ọ kpa okpoko ịgọm ọlahịchịng họ ang ọ-ya itinika rịrị. Okpoko ịgọm ọlẹ kị hyà yẹẹyẹẹ ọ kpa họ ọmwụ bala ekilo nyamwụ lẹ. Ọ họ egbeju inmee-nmee nya ábwọ nyamwụ bala ịlẹ kị ịlala àpwụ nya ekeji ju ang ọ-ya itinika rịrị ọwẹ la ọ-chaa ebwo hi ekilo nyamwụ ka.

¹⁸Ị họ ábwọ ịrwọnyẹ kụ ekilo nyamwụ. Ábwọ ịta kwọọ ịkịka ọhẹ, ábwọ ịta kwọọ ịkịka ọkịla.

¹⁹Ụbwọ ọnyọnyọọnyị nya ábwọ ịrwọnyẹ ịwẹ la egbeju ikperi-kperi ịtịtịịta lala ẹhị obebe bala àpwụ ogugu nya okoji nya amọndụ

²⁰Ekilo owulele nyamwụ la egbeju ikperi-kperi ine ịlẹ kị họ lala ẹhị obebe bala àpwụ ogugu nya okoji nya amọndụ.

²¹Ẹhị obebe ookpokpo ji ekpeleji nya ẹga ká ábwọ imimiiye ẹ-ẹpwụ nya ábwọ ịrwọnyẹ ịwẹ be hụrụ ekilo nyamwụ.

²²Ị kpa okpoko ịgọm ọlahịchịng ọlẹ kị hyà yẹẹyẹẹ họ ẹhị ibebe bala abwọ nyamwụ ju awụlẹ la ookpokpo.

²³Ọ họ itinika irwiye ịlẹ kị ka ya rịrị u-uhye nyamwụ bala abụwa nyamwụ bala ịja ịpapịla nyamwụ lokpoko ịgọm ọlahịchịng.

²⁴Ilo ọlala nya okpoko ịgọm ọlẹ kọ kpa họ ang ọ-ya itinika rịrị ọwẹ tụ ang-abwọ nyamwụ wuu ri okolo iwo ịta kụrụ ịrụ (35).

²⁵Ọ kpa okoji nya akechiya họ ogidi nya ịtangare. Udiyo bala ẹpwụ nyamwụ memeeme. Ọnyọnyọọnyị la ẹpẹtẹ ookpokpo ba ẹhya. Uhye ọlala nyamwụ la apatẹ ịta. Ị họ ịpyịyẹ-pyịyẹ ịla ịkpanggọ inine nyamwụ ju awụlẹ bala ogidi la ookpokpo.

²⁶Ọ kpụ okpoko ịgọm kụrwọọ u-uhye bala ịkịka inine wuu tụ ịpyịyẹ-pyịyẹ nyamwụ. Ọọwa, ọ me okpoko ịgọm dịrọọ u-ugbọọnụ dagaga jwoo lẹlẹ.

²⁷Ọ họ ịmapẹ imiiye jwoo e-ekpeleji nya ugbọọnụ ịkịka imimiiye kị ka ya igbilo dụrwaa kpa kpa olo nya ogidi ọwẹ.

²⁸Ọ kpa okoji nya akechiya họ igbilo lẹ, ọ kpụ okpoko ịgọm kụrwaa lẹlẹ.

²⁹Ọ họ ida ọlịgọgọ bala ịtangare ochoru kwọkwọ ọlahịchịng ịnyịnyị.