Read idege EHE ỌKPỤKPỤ 39 Bible Online

EHE ỌKPỤKPỤ 39 - idege bible

EHE ỌKPỤKPỤ 39

¹Ị kpa ịpwụ inyuukpuukpo bala ịnyịmịla gbuuu bala ịnyịmịla nyẹrị-nyẹrị ga ang ịkụrụ-kụrụ ịnyịịla-ịnyịịla ịlẹ ká angịkiliya ka kụrụ kpa họ ụkụrwọ nyaa ẹ-Ẹga Ọlịgọgọ. Ị ga ang ịkụrụ-kụrụ ịwẹ ha Erọn jaabwọ ká Amkpaa da iMosisi ehile.

²Ị họ ẹfọdụ la apwụ ọnyịịla-ọnyịịla bala iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị bala iwu nya okpoko ịgọm.

³Ị ga ene nya okpoko ịgọm kpálị-kpalị lẹ, ị gwaa ene wule-wule kị ka ya nụ ọmwụ jula iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị lẹlẹ.

⁴Ị gá iri imiiye nya ẹfọdụ ịlẹ kị ya jwoo bwu ịkịka imiiye nyamwụ kaka wu amwachwọ chajị kị ka chaa do.

⁵Ị kpa ang-abwọ ịlịnyị-ịnyị họ apwụ ọchọhị ju ẹfọdụ chajị kị ka ju awụlẹ jaabwọ ká Amkpaa da iMosisi ehile.

⁶Ị go ajwọ nya ọnikisi lẹ, ị ya ku ang ọlala ụbaala ọlẹ kị họ lokpoko ịgọm rẹẹrẹẹrẹẹ lẹlẹ. Ị kpa irya nya ịbańg ọjẹjẹ gu ịna nya ẹnyị nya anyị alẹng iwo da imiiye nya iJekọbụ ba ajwọ ịwẹ u-uhye.

⁷Ọọwa, ị ya ba ori nya ẹfọdụ ọlẹ kọ pịlẹ amwachwọ nyọka kpa kpịtịya nya imwawụ iwo da imiiye nya ala Isirẹlụ jaabwọ ká Amkpaa byi iMosisi lẹlẹ.

⁸Ị họ ang ọdọkịlẹtụ nya olegbeju okiliya la ụma nya ang-abwọ ịlẹ kị kpa họ ẹfọdụ. Ị nọmwụ jwoo yẹẹyẹẹ ịnyịnyị.

⁹Ị họ udiyo bala ẹpwụ ojuju nyamwụ memeeme. Udiyo nyamwụ lala ẹhya nya ẹpẹtẹ. Ẹpwụ ojuju nyamwụ lala ẹhya nya ẹpẹtẹ ịnyịnyị. Ị mwụ ang ọdọkịlẹtụ ọwẹ aba bawụlẹ ugbabwọ imiiye.

¹⁰Ị ya ajwọ ịnyịịla-ịnyịịla bọọ rẹẹrẹẹrẹẹ jịra ịgba ine. Ajwọ ịlẹ kị ya bọọ ọgba ọhọhẹ ri ẹjwọ irubyi bala ẹjwọ itopasị bala ẹjwọ ịganẹtị.

¹¹Ajwọ ịlẹ kị ji ọgba oheeye ri ẹjwọ emaradị bala ẹjwọ ịsafaya bala ẹjwọ ịdayamọndụ.

¹²Ajwọ ịlẹ kị ji ọgba ọhata ịnyịnyị ri ẹjwọ ịtẹkwasị bala ẹjwọ ageti bala ametisi.

¹³Ụma nya ajwọ ịlẹ kị ji ọgba ohene ri ẹjwọ iberiili bala ẹjwọ ịkaneliyan bala ẹjwọ ịjasịpa. Ị ya ajwọ ịwẹ ku ang ịlala abaala ichiche imiiye ịwẹ kị họ lokpoko ịgọm mẹ.

¹⁴I gu ịna nya ẹnyị nya ọnyị ọnyọnyọọnyị nya anyị nya iJekọbụ ba ẹjwọ ọnyọnyọọnyị nya iwo da imiiye ịwẹ chajị kị ka ku ọmwakpa nya imwawụ iwo da imiiye nya Isirẹlụ.

¹⁵Ị họ agba nya okpoko ịgọm ọlẹ kị gu lala ochiri nyọka ya ju ang ọdọkịlẹtụ.

¹⁶Ị kpa okpoko ịgọm họ abaala imiiye bala ịmapẹ nya imiiye lẹ, ị ya ịmapẹ ịịwa ju ịkpanggọ imiiye iluhye nya ang ọdọkịlẹtụ ọwẹ lẹlẹ.

¹⁷Ị ya agba imiiye ịwẹ do bwọ ịmapẹ imiiye ịịwa.

¹⁸Ị kpa egbeju ịkịla nya agba ịwẹ kaka bwọ abaala imiiye ịwẹ pịlẹ iri ịlamwachwọ nya ẹfọdụ da wẹ ịlahị.

¹⁹Ị họ ịmapẹ nya okpoko ịgọm imiiye ịkịla ju ịkpanggọ ileji nya ang ọdọkịlẹtụ ịlẹ kị ji ọbaba ọlẹpwụ ba ẹfọdụ ba.

²⁰Ị myịmyị họ ịmapẹ nya okpoko ịgọm imiiye ịkịla ju ekpeleji nya iri nya ẹfọdụ ị-da pịlẹ amwachwọ wẹ ịlahị ba uhye nya apwụ ọchọhị nya ẹfọdụ ọlẹ kị nụ yẹẹyẹẹ ba.

²¹Ị kpa ori onyuukpuukpo wu ịmapẹ nya ang ọdọkịlẹtụ bala ịmapẹ nya ẹfọdụ do bwọ awụlẹ ba apwụ ọchọhị u-uhye chajị ká ang ọdọkịlẹtụ-ụ́ ka yi hi apwụ ọchọhị nya ẹfọdụ ka.

²²Ị kpa apwụ onyuukpuukpo kem ga awụrụ ogbileji olekpeleji nya ẹfọdụ.

²³Ị chọọ iwa meme la egbeju. Ị nọmwụ ju ụkpụrọkọ nyamwụ wuu dọgịlẹ ju chajị kọ ka jẹ-ẹ gu ene bwu ụwa ka.

²⁴Ị kpa owu onyuukpuukpo bala ọnyọmịla gbuu bala ọnyọmịla nyẹrị-nyẹrị nụ egbe nya okoji ipomegiraneti dọgịlẹ ju ugbọọnụ oleji nyamwụ wuu.

²⁵Ị họ atang nya okpọko ịgọm pịlẹ apewa nya ipomegraneti ọnyọnyọọnyị.

²⁶Atang bala ipomegiraneti ịwẹ pịlẹ apewa nya awụlẹ dọgịlẹ ju ugbọọnụ oleji nya awụrụ ọọwa. Erọn ọngọkiliya ka kụrụ awụrụ ọwẹ ụka myị ụka kọ juwa họ ụkụrwọ nyamwụ jaabwọ ká Amkpaa ya.

²⁷Ị nụ ịwụrụ la ịpwụ ịnyịịla-ịnyịịla ha Eron bala anyị nyamwụ ịnyịnyị.

²⁸Ị họ apwụ ọkụrụ egbeju bala okpo bala ịbante

²⁹bala apwụ ọchọhị ọlẹ kị ka họ la apwụ ọnyịịla-ọnyịịla bala iwu inyuukpuukpo bala ịnyịmịla gbuuu bala ịnyịmịla nyẹrị-nyẹrị ịlẹ kị nọmwụ ju yẹẹyẹẹ jaabwọ ká Amkpaa da iMosisi ehile.

³⁰Ị kpa okpoko ịgọm ọlahịchịng họ uginikpo ọlẹ kị gu ịna ba yẹkẹẹ: “Ọlẹ ri nya Amkpaa lẹ.”

³¹Ị ya ori onyuukpuukpo jwoo ka wu ịlahị nya apwụ ọkụrụ egbeju jaabwọ ká Amkpaa da ehile.

³²Ụka ohyẹẹkpẹ, ị họ ụkụrwọ nya Ọdụ nya Amkpaa ọnwụnwụ kpá. Ala Isirẹlụ họ họ ang myị ang jaabwọ ká Amkpaa daa ehile ya nyị họ.

³³Ụka ọọwa, ị kpa ang ịwẹ wuu wẹ iMosisi lẹlẹ. Ang ịịwa ri Ọdụ nya Amkpaa bala ang-abwọ ị-kpa họ ụkụrwọ ịlụwa wuu tụ apata ịkụrẹchẹ nyamwụ bala igbilo bala ekeji ịhịlabwọ bala ịtachị bala ang ị-da ịtachị ọ-ọmwụ bala

³⁴ugba nya imolodo ọlẹ kị ju ido ọnyọmịla bala ugba ọnyịịla-ọnyịịla okeke ọkịla bala apwụ okeke.

³⁵Ang ịkịla ri Akpa nya Iro ọlẹ ká ajwọ ịpapịla ịlẹ kị da ehile iwo ba ji bala igbilo ị-kpa kpa olo nyamwụ bala ọnụ ọkụrwọọ-kụrụ bala

³⁶itebwuru bala ang-abwọ nyamwụ bala ịkaa ọlịgọgọ bala

³⁷ang ọ-ya itinika rịrị ọlẹ kị họ lokpoko ịgọm ọlahịchịng bala itinika bala ang-abwọ bala ida nyaa bala

³⁸ogidi ọlẹ kị họ lokpoko ịgọm bala ida ọlịgọgọ bala ịtangare ochoru kwọkwọ bala apwụ o-ke ọnang nya Ọdụ Ọlịgọgọ.

³⁹Ang ịkịla ri ogidi nya oje ọnyọmịla bala ụbaala nya oje ọnyọmịla ọlẹ kị họ jwoo bala igbilo nyamwụ bala ang-abwọ nyamwụ wuu bala ẹja ọtabwọ bala ẹga ọ-ya rịrị bala

⁴⁰ịpwụ ịlẹ kị ka ya dagaga ju ọdọda nya Ọdụ nya Ọlịgọgọ bala ịtachị bala ang ikperi-kperi ileji nyaa bala apwụ okeke ọlọnang ọ-ka ọdọda bala iri bala iloo nyamwụ bala ang-abwọ ọnyị myị ọnyị kị ka kpa họ ụkụrwọ ẹ-ẹpwụ nya Ọdụ nya Amkpaa bala

⁴¹ang ịkụrụ-kụrụ ịnyịịla-ịnyịịla ịlẹ ká Erọn bala anyị nyamwụ angịkiliya ka kụrụ juwa myị ẹrụ ẹ-Ẹga Ọlịgọgọ.

⁴²Ala Isirẹlụ họ ụkụrwọ ọọwa kpẹẹkpẹẹ jaabwọ ká Amkpaa daa ehile.

⁴³Ụka ká iMosisi wụla ụkụrwọ ọlẹ kị họ wuu yẹ, ọ jẹ ịnyịlẹhị ya nyị họ ang myị ang wuu kpẹẹkpẹẹ jaabwọ ká Amkpaa da ehile. Ọọwa, iMosis à wahị kụrwaa lẹlẹ.