Read idege EHE ỌKPỤKPỤ 4 Bible Online

EHE ỌKPỤKPỤ 4 - idege bible

EHE ỌKPỤKPỤ 4

¹Ọọwa lẹ, iMosisi a wẹ byi Amkpaa yẹkẹẹ, “Ọ́ tị ri ká ala Isirẹlụ-ụ́ myị hu ẹla nyam nya ịlẹhị, ị ke ụrụ la ẹla nyam ka bẹẹ? Ányị m̄ tị́ ka họ ó-ri kị ya ahụ nyị́ chị ịlọng ehe mẹjẹm ịnyịlẹhị ka?”

²Ịnyị, Amkpaa-à tọọ wo yẹkẹẹ, “Ịyẹ a tị́ kpa ụ-ụbwọ nyang wẹ ene-è?” IMosisi wẹ yẹkẹẹ, “Ọgọdọ ịnyị.”

³Amkpaa byoo yẹkẹẹ, “Pẹ hyoo da keji wẹẹ?” Ụka ká iMosisi tụụbwọ hyoo da e-eji, ọgọdọ ọọwa yẹ la ilo. Ọọwa, iMosisi à chị ajị chirom hi ilo ọọwa lẹlẹ.

⁴Ọọwa lẹ, Amkpaa-à byi iMosisi yẹkẹẹ, “Yụbwọ chị ilo ọwẹ i-itọọgbẹ, ká hwoo mẹ.” Ịnyị, iMosisi a hirikpẹẹ lẹ, ọ wu ilo ọwẹ lẹ, ọ yẹ la ọgọdọ myịmyị lẹlẹ.

⁵Amkpaa byi iMosisi yẹkẹẹ, “Aa họ ịịwẹ nyọka mẹjẹ ala Isirẹlụ ya Amkpaa Ohe Oluhye nya adaa igogo anyị, ọlẹ kọ ri Ohe Oluhye nya Ebiraham bala Ayịsiki bala iJekọbụ nyị chị ịlọmwụ ehe mẹjẹng ịnyịlẹhị lẹ mẹ.”

⁶Amkpaa myịmyị ya ẹla ta iMosisi yẹkẹẹ, “Yụbwọ ju ka ẹpwụ nya awụrụ nyang wẹẹ.” Ụka ká iMosisi họ ịnyị kpá, kọ gba ụbwọ nyamwụ kpehe, ụbwọ nyamwụ ri abẹ-abẹ ịlẹ kị pwo hụrátataata lala ara.

⁷Ọọwa lẹ, Amkpaa-à byoo yẹkẹẹ, “Yụbwọ nyang ọwẹ ju ka ẹpwụ nya awụrụ myịmyị mẹ.” IMosisi a yụbwọ nyamwụ ju ka ẹpwụ nya awụrụ lẹlẹ. Ụka kọ gbọọ kpehe lẹ, abẹ ịlụbwọ nyamwụ a myị̀ cheri-cheri lẹ, ụbwọ nyamwụ a la hịlẹ-hịlẹ lala ịnyịrọ ọlẹga ọkịla lẹlẹ.

⁸Ọọwa, Amkpaa a byi iMosisi yẹkẹẹ, “Ó-ri ká ala Isirẹlụ-ụ́ myị ju ẹla oyaya nyang lee o-hu ụkụrwọ ẹbyẹbyị nya ọgbanyẹ nya ẹla nya ịlẹhị ka aalẹ, oheeye ọwẹ ka laa nya ịnyịlehị.

⁹Tị kpọkpọọkpọ, ó-ri ká ụkụrwọ ẹbyẹbyị imiiye ịwẹ-ẹ́ laa nya ịnyịlẹhị kpụ ị myị lang lee ọ-myị ke ụrụ la ẹla oyaya nyang kaka lẹ aalẹ, à kele ka chị enyi bwu Ihu ịNayịlị, ká ya hụrụ ị-ịpyị mẹ. Enyi ọọwa ka yẹ la ịwọ ụ-uhye nya ịpyị.”

¹⁰Ma, iMosisi byi Amkpaa, yẹkẹẹ, “Eheehe, ám koo, Ọngọlam. Ḿ ri ọngọ ya ẹla yẹẹyẹẹ ẹnẹnẹhẹ lee mwiiji nyọlẹ ká dọmwụ nya ẹla o-ya tam lẹka. M̀ kaa ya ẹla rẹm-rẹm, chajị m̀ chị ugogo.”

¹¹Amkpaa byi iMosisi yẹkẹẹ, “Oowo tị́ họ ọnụ nya ọngịnyị ehe-è? Oowo tị-ị̀ họ ká ọngịnyị kaa kpụ ịla lee o-ku ọnụ-ụ́? Oowo kpakpaakpa à tị-ị̀ họ ká ọngịnyị jẹ-ẹ̀ yọyị jogo-jogo lee ọ-kpụ idu chwiichwii-ì? Ám Amkpaa-à kaa họ ang ịwẹ wuu ka-á?

¹²Lẹẹlẹ, kele mẹ. M̀ ka dang ụbwọ ká ka jẹ-ẹ ya ẹla. M̀ tị ka ya jeng ẹla ọlẹ ká ka ya ịnyịnyị.”

¹³Ma, iMosisi wẹ byoo yẹkẹẹ, “Eheehe, Ọngọlam, du ọngọkịla ọhẹ ẹrụ ọwẹ mẹ.”

¹⁴Ọọwa lẹ, Amkpaa-à ju agbama ta iMosisi lẹ, ọ byoo yẹkẹẹ, “Ee lẹ, Erọn ọla iLivayị ọnyịnang bẹẹ? M̀ jẹ myịmyị kọ jẹ-ẹ̀ ya ẹla yẹẹyẹẹ. Ọ dọmwụ juwa jẹ warị kaka tọng ụ-ụgbẹyị lẹ. Ụka kọ yẹng ọ ka chị ọkẹkẹnị lụmẹ.

¹⁵Aa ya joo ẹla ọlẹ kọ ka ya mẹ. Am Ohe Oluhye ka danụ anụ angị imimiiye ụbwọ ẹ-ẹpwụ nya ẹla oyaya nyanụ bala ọ-ka ya jenu ang ọle kanụ ka họ.

¹⁶Erọn ọnyịnang ā kpa ọnụ-ẹla hang, kọọwa ā ya ẹla ta alịnyanụ hang mẹ. Ọọwa lẹ, ā ka ku ọmwakpa nyam am Ohe Oluhye ẹ-ẹga nyamwụ, juwa ya joo ẹla myị ẹla ọlẹ kọ ka ya lẹlẹ.

¹⁷Aa kpa ọgọdọ ọwẹ ba ịlọng mẹ, chajị ọwa ā wẹẹ ka kpa họ ụkụrwọ ịlẹbyẹbyị lẹ.”

¹⁸Ọọwa lẹ, iMosisi à tịrẹkpẹ ka ẹga nya adamwụ-ẹpwa iJetiro lẹ, ọ bịlọọ yẹkẹẹ, “Hi iwe ham chẹẹ mẹ, kam kele ka ẹga nya aanam ịlẹ kị juwa ọ-ọpyị nya Ijipiti, kaka yẹ ó-ri kị juwa lokpunyi wẹẹ.” Inyị, iJetiro à myị lẹ, ọ byi iMosisi yẹkẹẹ, “O hiigu, aa pyẹẹ kele mẹ.”

¹⁹Ụka ká iMosisi juwa ọ-ọpyị nya iMidiyan wẹẹ, Amkpaa ya ẹla tọọ yẹkẹẹ, “Rụ tịrẹkpẹ ka Ijipiti mẹ, chajị angịlẹ kị lẹẹ tịtọ nyọka nwụng nwụ lẹ, ị gbu wuu lẹ.”

²⁰Ịnyị, iMosisi a yụbwọ chị ahụ nyamwụ bala anyị alẹng nyamwụ lẹ, ọ yaa hụhụ u-uhye nya obyiyó lẹ, ị yegiri hu ang ẹdịyẹ nya Ijipiti lẹlẹ. IMosisi kpa ọgọdọ nyamwụ ba ịlọmwụ jaabwọ ká Ohe Oluhye byoo.

²¹Amkpaa myịmyị byi iMosisi yẹkẹẹ, “Ụka ká nyà tịrẹkpẹ pwụ Ijipiti lẹ, aa họ ụkụrwọ ẹbyẹbyị ịlẹ wuu ị-ịlahị nya adịrahụ jaabwọ kam ya ọngịrị jung ẹ-ẹpwụtụbwọ nyọka họhọ mẹ. Ma, m̀ ka họ ká adịrahụ ka la egbeju-ọngịrị. Ọ́ ka myị anụ-ụ̀ rụ ịịwẹ koo.

²²Ọọwa lẹ, a ka byoo ya am Amkpaa nyị yẹkẹẹ, ‘Ala Isirẹlụ à ri ọnyị ọlẹng nya ọgbanyẹ nyam lẹ.

²³M̀ bying ma pẹhi ọnyị nyam kọ rụ chajị kọ ka gbịgba ham mẹ. À tị pwa wẹẹ, m̀ juwa ka nwụ ọnyị ọlẹng nya ọgbanyẹ nyang lẹ.’ ”

²⁴Ụka ká iMosisi bala alugbiyegu nyamwụ chịkụ ẹ-ẹgẹhẹ lodu ẹ-ẹpwụ nya ẹdịyẹ nyaa ọ-ka Ijipiti, Amkpaa tọ iMosisi ụ-ụwa. Ọọwa, ọ juwa tịtọ kọ ka nwụ iMosisi lẹlẹ.

²⁵Ọọwa lẹ, iSipọra ahụ nyamwụ a hu ẹjwọ oliri weri-weri ọhẹ lẹ, ọ kpa da ọnyị ọlẹng nyaa ụwụwụ lẹ, ọ kpa ugbinyịrọ ọlẹga ọọwa kaka gu ata nya iMosisi[6] lẹlẹ. Ọọ-lajị nya ụwụwụ ọdada ọọwa lẹ, ọ byi iMosisi yẹkẹẹ, “Ọrwahụ ọlịwọ-lịwọ a ri ẹ-ẹga nyam lẹ.” Ọọwa, Amkpaa a hu abwọ la ọ-nwụ iMosisi lẹlẹ.

²⁷Ụka ọọwa, Amkpaa byi Erọn yẹkẹẹ, “Kele ka ugbileji kaka tọ iMosisi ụ-ụwa mẹ.” Ịnyị, ọ kele kaka tọọ ọ-ọgbọdọ ọlịgọgọ lẹlẹ. Ụka kọ tọọ, ọ da ọnụ chị iMosisi bwula ọnụ ojuju.

²⁸Ọọwa lẹ, iMosisi à tịrọnụ ya je Erọn ẹla ọnyị myị ọnyị ọlẹ ká Amkpaa ya wuu ụka kọ byi iMosisi ya nyi nyà tịrẹkpẹ ka Ijipiti mẹ lẹlẹ. Ọ tịrọnụ bwu ẹga nya ụkụrwọ ẹbyẹbyị ịlẹ ká Amkpaa byoo ya nyị họ ịnyịnyị wuu.

²⁹Ịnyị, iMosisi bala Erọn à kele ka Ijipiti lẹ, ị tụ ịgabwọ nya ala Isirẹlụ wuu guru lẹlẹ.

³⁰Ọọwa, Erọn a tịrọnụ jaa ẹla myị ẹla ọlẹ ká Amkpaa ya ta iMosisi lẹ, ọ họ ụkụrwọ ẹbyẹbyị ịịwa wuu ị-ịlahị nyaa ịnyịnyị lẹlẹ.

³¹Ị myị ju ẹla ọọwa. Ụka kị wo ya Amkpaa nyị warị wẹ ẹga nyịwa bala ọ-yẹ jaabwọ kị juwa yaa ụhị onyobyi-obyi lẹ, ị hiri ịlaa kpẹẹ juwa gbịgba ha Ohe Oluhye lẹlẹ.