Read idege EHE ỌKPỤKPỤ 40 Bible Online

EHE ỌKPỤKPỤ 40 - idege bible

EHE ỌKPỤKPỤ 40

¹Ọọwa, Amkpaa-à byi iMosisi yẹkẹẹ,

²“Ẹnụtụrụ ọhọhẹ-họhẹ nya ọya nya ọgbanyẹ-ọgbanyẹ lẹ, à ya Ọdụ nya Amkpaa yeji mẹ.

³À ka ya Akpa nya Iro rịrị ụ-ụwa, ká ya apwụ koo bwu ịlahị.

⁴Aa kpa itebwuru nya ịkaa ọlịgọgọ ka ẹpwụ nyamwụ, ká ya ang iluhye nyamwụ rịrị ụ-ụwa jaabwọ kọ chịla mẹ. Ọọwa lẹ, ká kpa ang ọ-ya itinika rịrị kele ka ụwa, ká ya itinika nyamwụ rịrị u-uhye nyamwụ mẹ.

⁵Ya ogidi okiliya nya ịtangare ọlẹ kị họ lokpoko ịgọm rịrị ị-ịlahị nya Akpa nya Iro, ká ya apwụ da ke ọnang nya Ẹga Ọlịgọgọ mẹ.

⁶À ka ya ogidi okiliya o-ru ila rịrị ị-ịlahị nya ọnang nya Ọdụ Ọlịgọgọ.

⁷Ya ẹja ọtabwọ rịrị apewa nya Ọdụ nya Amkpaa bala ogidi, ká chị enyi ju ẹja ọọwa mẹ.

⁸Aa bá ang ọdagaga ju Ọdụ nya Amkpaa ọwẹ ká ya apwụ ke ọnang nyamwụ mẹ.

⁹“Ọọwa lẹ, à chị ịgọgọ ju ọdụ ọwẹ bala ang-abwọ ịlụwa wuu bwula ọ-ya ida ọlịgọgọ hwọọ chajị kọ ka la ịgọgọ mẹ.

¹⁰À ka ya ida ọlịgọgọ hụ ogidi okiliya ọ-rụ ila bala ang-abwọ ịlụwa wuu chajị kọ ka la ịgọgọ yẹẹyẹẹ.

¹¹À ka ya ida hụ ẹja ọtabwọ bala ẹga ọ-ya rịrị ịnyịnyị, ká ka chịgọgọ jwoo.

¹²“Kpa Erọn bala anyị nyamwụ wẹ ọnang nya Ọdụ, ká byaa kị dị̀lọ hụ ịlaa lenyi mẹ.

¹³Aa ya ang ịkụrụ-kụrụ nya ọngọkiliya kụrụ Erọn, ká chịgọgọ jwoo bwula ọ-ya ida ọlịgọgọ hwọọ chajị kọ ka juwa myị ẹrụ ham lala ọngọkiliya mẹ.

¹⁴Kpa anyị nyamwụ warị, ká ya ịwụrụ kụrwaa mẹ.

¹⁵Ọọwa lẹ, ā ka ya ida hwaa jaabwọ ká ya hụ adaa, chajị kị ka myị ẹrụ ham lala angịkiliya lẹlẹ. Ida ọhụhụ ọwẹ du kị ka ri angịkiliya gbe oyi myị oyi.”

¹⁶IMosisi họ ang myị ang wuu kpẹẹkpẹẹ jaabwọ ká Amkpaa da ehile.

¹⁷Ọọwa, ẹnụtụrụ ọhọhẹ nya ọya ọhọhẹ ẹ-ẹpwụ nya ẹka oheeye nyọlẹ kị rụ bwu Ijipiti kpá lẹ, ị ya Ọdụ nya Amkpaa yeji lẹlẹ.

¹⁸IMosisi ya ang ikperi-kperi nya ịtachị da e-eji bala ọ-ya ịtachị yeji bala ọ-ya ekeji ịhịlabwọ daa bala ọ-ya igbilo nịraa.

¹⁹Ọ pyẹ ang ọ-dakụrụ ọhẹ maaa kụrụ Ọdụ nya Amkpaa ene kọọ ya ọkịla da kụrwọọ u-uhye jaabwọ ká Amkpaa da ehile.

²⁰Ọọwa, ọ gọ ajwọ ịpapịla imiiye ịlẹ kị da ehile ju ka ẹpwụ nya Akpa nya Iro bala ọ-ya igbilo dụrụ ịmapẹ ịlẹ kị họ ju akpa ọwẹ lẹ, ọ ya ọnụ nyamwụ kụrwọọ lẹlẹ.

²¹Ọọwa, ọ hu akpa ọwẹ kpa ka ẹpwụ nya Ọdụ nya Amkpaa lẹ, ọ ya apwụ okeke pịlẹ yọọ dada kọ ka ke akpa lẹlẹ. Ọ họ ịnyị jaabwọ ká Amkpaa dọọ ehile.

²²Ọ ya itebwuru rịrị ẹ-ẹpwụ nya Ọdụ nya Amkpaa ịkịka ọlẹtẹ ka odehe nya apwụ okeke lẹ,

²³ọ ya ịkaa ọla kị ya ha Amkpaa nọ u-uhye nyamwụ jaabwọ ká Amkpaa ya lẹlẹ.

²⁴Ọ ya ang ọ-ya ang nya itinika rịrị koye nya edii jahị da itebwuru lẹ,

²⁵ọ ya ila ju itinika rịrị ị-ịlahị nya Amkpaa jaabwọ ká Amkpaa da ehile lẹlẹ.

²⁶Ọ ya ogidi nya okpoko ịgọm rịrị ka ẹpwụ nya Ọdụ nya Amkpaa ị-ịlahị nya apwụ okeke lẹ,

²⁷ọ ju ịtangare ochoru kwọkwọ ila u-uhye nyamwụ jaabwọ ká Amkpaa da ehile lẹlẹ.

²⁸Ọọwa, ọ ya apwụ okeke ọlọnang nya Ọdụ nya Amkpaa pịlẹ lẹ,

²⁹ọ ya ogidi okililya rịrị ị-ịlahị nyamwụ bala ọ-kịla iya ọ-rụ ila bala iya nya ajẹ nya ang-ẹrụ jaabwọ ká Amkpaa da ehile lẹlẹ.

³⁰Ọ ya ẹja ọtabwọ rịrị apewa nya Ọdụ nya Amkpaa bala ogidi ọwẹ lẹ, ọ ya enyi juwa lẹlẹ.

³¹IMosisi bala Erọn bala anyị nya Erọn kaa hụ abwọ bala ata nyaa ụ-ụwa

³²ụka myị ụka kị juwa ka ka ẹpwụ nya Ọdụ nya Amkpaa lee ụka kị ka kịla iya ogidi jaabwọ ká Amkpaa da ehile.

³³IMosisi ya ang ọ-chị oyi nya ọdọda yeji dagaga ju Ọdụ nya Amkpaa bala ogidi bala ọ-ya apwụ okeke ọlọnang nya ọdọda pịlẹ. Ịịwẹ ọ chị ụkụrwọ ọwẹ wuu eju lẹ.

³⁴Ọọwa, egbamwụ à wẹ kaka kụrụ Ọdụ nya Amkpaa u-uhye lẹ, ụmụmẹ nya Amkpaa-à myị̀ ụwa pwẹẹpwẹẹ lẹlẹ.

³⁵IMosisi-í jẹ jụ ka ẹpwụ nya Ọdụ nya Amkpaa myị ka ọọ-la ọọwa.

³⁶Ẹ-ẹpwụ nya ẹdịyẹ nyaa wuu, ụká ká egbamwụ ọwẹ-ẹ́ mwụ bwu uhye nya Ọdụ nya Amkpaa kẹnẹ-kẹnẹ ala Isirẹlụ à kaa tị̀tị̀ mwụ ịkampụ nyaa bwu ụwa ka ẹga ọkịla lẹ.

³⁷Ó-ri ká egbamwụ-ụ́ mwụ ka, ịị rụ bwu ẹga ọọwa ka.

³⁸Ẹga myị ẹga ọlẹ kị jẹ bwu wuu ị kaa yẹ egbamwụ nya Amkpaa u-uhye nya Ọdụ nya Amkpaa lụka nya ẹnụ. Ụka nya odu ị ka yẹ ila ẹ-ẹpwụ nyamwụ.