Read idege EHE ỌKPỤKPỤ 5 Bible Online

EHE ỌKPỤKPỤ 5 - idege bible

EHE ỌKPỤKPỤ 5

¹Ọọwa lẹ, iMosisi bala Erọn à ka ẹga nya adịrahụ nya ala Ijipiti lẹ, ị byoo yẹkẹẹ, “Amkpaa Ohẹ Oluhye nya ala Isirẹlụ yẹkẹẹ, ‘Pẹ hi angịnyị nyam kị rụ, chajị kị kele ka chihi jum bwula ọ-la ọhụhụ u-ugbileji mẹ.’ ”

²Adịrahụ à taa wo yẹkẹẹ, “Oowo à tị́ ri Amkpaa ọọwa ene-è? Ịyẹ tị́ du kam ka ju omyi-ẹla nyamwụ ihi nyọka tu hi ala Isirẹlụ rụ ene-è? Ḿ jẹ Amkpaa ọọwa ka. Ḿ tị ka tụụbwọ hi ala Isirẹlụ rụ kpong-kpong ka.”

³IMosisi bala Erọn wẹ byoo yẹkẹẹ, “Ohe Oluhye nya ala iHiburu chị ịlọmwụ ehe mẹjẹẹhị lẹ̀. Hi iwe hahị kahị jẹdịyẹ lala ẹnụtụrụ ịta gbẹgbịlẹ ka ugbileji kaka kịla iya ha Amkpaa Ohẹ Oluhye nyahị mẹ. Ó-ri ịnyị ka, ọ ka tahị ayịreji la ẹdụrụ lee ẹwụ ọdada.”

⁴Adịrahụ byi iMosisi bala Erọn yẹkẹẹ, “Ịyẹ tị du kanụ họ ká anyịhị ịwẹ juwa nyẹẹkpẹ da ụkụrwọ nyaa ịnyị? Anụ tịrẹkpẹ ka ẹga nya ụkụrwọ nyanụ lẹẹlẹẹ mẹ!

⁵Alụma nyanụ pyẹ gbee kanụ ju iru gụ ala Ijipiti lẹ. Anụ tị mwọọgịlẹ juwa tịtọ nyọka hu abwọ la ụkụrwọ ọhọhọ!”

⁶Ẹnụ ọọwa kpangga, adịrahụ à da ehile byi ala Ijipiti ịlẹ kị ri alegbeju ịkpẹhị rịrị anyịhị bala angị kpa ịlahị nya ala Isirẹlụ yẹkẹẹ,

⁷“Anụ ya awigibi ị-kpa gba ịbịlọọkụ ha ala Isirẹlụ bwu alẹ kịlahị kaka. Ị kele kaka pịlahị nyaa lịlaa mẹ.

⁸Ma, anụ-ụ̀ byaa kị gba ịbịlọọkụ ju iru lala olene-ene, ookpokpo ā wẹ ẹkpẹ nya ọọwa koo. Ị́ ye ụkụrwọ họ waa ọnụ ka, ịnyị a du kị lee ya ẹla rịrịm nyọka pẹ hyaa kị ka rụ kaka kịla iya ha Ohẹ Oluhye nyaa lẹ!

⁹Anụ-ụ̀ kpaa họ ụkụrwọ ọnyọọngịrị gụ olene ụka wuu, chajị kị ka hi ụbwọ ke ụrụ la eguru nya ịnịịkịla ịlẹ kị wẹẹ kpa kaka me jwaa kaka mẹ.”

¹⁰Ọọwa lẹ, alegbeju ịkpẹhị rịrị anyịhị bala angị kpa ịlahị nya ala Isirẹlụ à kaka ya je ala Isirẹlụ yẹkẹẹ, “Adịrahụ ya ọwa nyị ka ya awigbi ị-kpa gba ịbịlọọkụ hanụ kịlahị kaka.

¹¹Ọ ya anụ nyị̄ tịtọ nyaa lịlọnụ ka ẹga myị ẹga ọlẹ kanụ nyị ka yẹ bwu kpa nya ka họ ụkụrwọ mẹ, ma, anụ nyị tị ka gba ịbịlọọkụ ju iru lala olene-ene.”

¹²Ịnyị, ị̄ jẹ tụ ọpyị nya Ijipiti wuu da juwa pịlahị nya awigbi ịịwa lịlaa lẹlẹ.

¹³Alegbeju ịkpẹhị rịrị anyịhị juwa kpa agbụrụ maga ká ala Isirẹlụ ka gba ịbịlọọkụ ju iru ẹnụ myị ẹnụ lala ụka ọlẹ kị kaa ya awigbi ị-kpa gba ịbịlọọkụ haa la orwaahị.

¹⁴Ụka ọọwa, ala Ijipiti ịlẹ kị ri alegbeju ịkpẹhị rịrị anyịhị juwa nyí angị kpa ịlahị nya ala Isirẹlụ ịlẹ kị chụ kpẹhị rịrị ụkụrwọ ọhọhọ nya anyịhị enyiri. Ị ta ịtọ yẹkẹẹ, “Ịyẹ tị́ du kanụ gba ịbịlọọkụ ju iru lala ọlẹnụ-ẹnụ ka-à?”

¹⁵Ọọwa lẹ, angị kpa ịlahị nya ala Isirẹlụ à kele ka ẹga nya adịrahụ kaka chị eru jwoo yẹkẹẹ, “Ịyẹ tị́ du ká jam họhị ịnyị mẹ, Agaba Idu?

¹⁶Ị́ myị ya awigbi hahị kaka ma, ị tị ya ahị nyị ka gba ịbịlọọkụ pyii. Ugbẹnyị lẹ, enyiri ị jam mịlaahị nyi lẹlẹ. Angịnyị nyang a tị ju ọmwụ nya ẹlẹwẹ wuu lẹ.”

¹⁷Adịrahụ wẹ byaa yẹkẹẹ, “Anụ alịhyẹ ịwẹ, ánụ tịtọ nyọka họ ụkụrwọ ka. Ịnyị à du kanụ byim ya nyị hi iwe ha ịwa chajị kịịwa nyị kele ka kịla iya ha Amkpaa lẹ.

¹⁸Anụ tịrẹkpẹ rụ ka họ ụkụrwọ mẹ! Ị́ ka ya awigbi hanụ kaka, ịbịlọọkụ ịlẹ kanụ ka gba á tị ka weji nya olene ka ịnyịnyị.”

¹⁹Angị kpa ịlahị nya ala Isirẹlụ jẹ kị ji ẹpwụ nya akama lẹ ụka kị byaa ya nyị ka gba ịbịlọọkụ ju iru ẹnụ myị ẹnụ lala olene-ene.

²⁰Ụka kị juwa jẹ rụ bwu ẹga nya adịrahụ lẹ, ị tọ iMosisi bala Erọn kị juwa kụ ọlọyị gbaa lẹlẹ.

²¹Ọọwa, ị byi iMosisi bala Erọn yẹkẹẹ, “Amkpaa yẹ ụma nya ang ọlẹ kanụ họ-ọ̀ wẹ, ọ tị ka wunu uri nya ọ-họ ká adịrahụ bala alekpeleji nyamwụ juwa bahị ẹtẹ onyobyi. Anụ à ju ọmwigu nyahị-ị̀ wẹ lẹ.”

²²Ọọwa lẹ, iMosisi a jahị kpata da ka ẹga nya Amkpaa lẹ, ọ byoo yẹkẹẹ, “Ịyẹ tị́ du ká yẹ angịnyị nyang akama ịịwẹ, Ọngọlahị? Iyẹ tị́ du ká tị tị dum ẹrụ warị wẹ ẹgẹlẹ ene-è?

²³Mwiiji nyọlẹ kam ka ẹga nya adịrahụ kaka ya ẹla la ẹnyị nyang lẹ, ịịwe ọ wẹẹ yẹ angịnyị nyang ụhị lẹ. Á tị họ abwọhẹ nyọka gbaa kpehe kpong-kpong ka!”