Read idege EHE ỌKPỤKPỤ 6 Bible Online

EHE ỌKPỤKPỤ 6 - idege bible

EHE ỌKPỤKPỤ 6

¹Ọọwa lẹ, Amkpaa-à byi iMosisi yẹkẹẹ, “À ka yẹ ang ọlẹ kam wẹẹ ka họ ẹ-ẹga nya adịrahụ nya ala Ijipiti lẹ̀. M̀ ka kpa agbụrụ họ kọ ka pẹhi angịnyị nyam rụ. M̀ dọmwụ ka họ kọ ka kwaa ku rụ la ágaga bwu ọpyị nyamwụ.”

²Ohe Oluhye ya ẹla ta iMosisi yẹkẹẹ, “Am à ri Amkpaa lẹ.

³M̀ chị ịlọm ehe mẹjẹ Ebiraham bala Ayịsiki bala iJekọbụ lala Ohe Oluhye Agụgụ ma, ḿ mẹ ịlọm jaa la ẹnyị nyam ọlẹ kọ ri Amkpaa ka.

⁴M̀ nwa iro taa ịnyịnyị bwula ọ-myị ọnụ nyọka ya ọpyị nya iKenan haa, ẹga kị kụ ene-ene lala angga.

⁵M̀ wo eru ọchịchị nya ala Isirẹlụ jaabwọ ká ala Ijipiti wẹẹ kpa yẹ ụhị. M̀ tị kpịtịya nya iro nyam ịnyịnyị lẹ.

⁶Lẹẹlẹ, byi ala Isirẹlụ am nyị yẹkẹẹ, ‘Am à ri Amkpaa lẹ. M̀ ka gbanụ kpehe bala ọ-ka họ kanụ ka lịlọnụ bwu ẹpwụ nya ọnyọhị oriri e-ekpeleji nya ala Ijipiti. M̀ ka kpa ọngịrị nyam yaa akama onyobyi-obyi, m̀ tị ka chịnụ anụ da.

⁷Lẹ̀, m̄ ka huunu nya angịnyị nyam lẹ, am a tị ka ri Ohe Oluhye nyanụ lẹlẹ. Anụ ayịdang ka jẹ kam a ri Amkpaa Ohe Oluhye nyanụ ọngọ gbanụ kpehe bwu ẹpwụ nya ọnyọhị ọrịrị ọ-ọpyị nya Ijipiti.

⁸M̀ ka kpanụ kele kaka kụ ọpyị ọlẹ kam nwa iro nyọka ya ha Ebiraham bala Ayịsiki bala iJekọbụ. Ọpyị ọọwa m̄ ka ya hanụ kanụ ka lọọ lụbwọ-lẹta lẹ. Anụ tị́ jẹ, am kpangga à ri Amkpaa lẹ.”

⁹IMosisi kele ka tịrọnụ nya ẹlẹwẹ wuu ya je ala Isirẹlụ. Ị́ tị myị ke ụrụ la ẹla nyamwụ ka, chajị ọkịlẹtụ kpaa enyi lụmẹ ọọ-lajị nya ụhị ọyẹyẹ nyaa.

¹⁰Ọọwa lẹ, Amkpaa-à byi iMosisi yẹkẹẹ,

¹¹“Kele ka byi adịrahụ nya ala Ijipiti kọ pe hi ala Isirẹlụ kị rụ bwu ọpyị nyamwụ mẹ.”

¹²Ma, iMosisi wẹ byi Amkpaa yẹkẹẹ, “Ala Isirẹlụ ri ala Isirẹlụ, ị́ myị ke ụrụ lam ka, ịyẹ tị́ ka jẹ-ẹ̀ du ká adịrahụ ka myị-ị̀ ke ụrụ wo ẹla nyam am olugogo ọlẹ-ẹ̀?”

¹³Ọọwa, Amkpaa-à da iMosisi bala Erọn ehile yẹkẹẹ, “Anụ-ụ̀ ya je ala Isirẹlụ bala adịrahụ nya Ijipiti mẹ, m̀ bying ahụ iMosisi bala Erọn kanụ ka kpa ala Isirẹlụ kpehe rụ bwu Ijipiti lẹ.”

¹⁴Ọnyị ọgbahị nya iJekọbụ ọlẹ kị wụrụ iRubẹn ma anyị alẹng angị ine. Ẹnyị nyaa ri ịHanọkụ bala ịPalu bala iHesirọn bala ịKami. Anyị ịwẹ à ri adịda igogo nya ogang-ogang nyaa lẹ.

¹⁵ISimyọn ma anyị alẹng angị ịrwọnyẹ. Ẹnyị nya anyị ịịwa ri ịJemwẹlụ bala ịJamin bala Ohadị bala ịJachin bala iSoha bala ịChawulu ọlẹ ká ịnamwụ bwu iKenan. Anyị ịwẹ à ri adịda igogo nya ogang-ogang nyaa lẹ.

¹⁶ILivayị ma anyị alẹng angị ịta ịlẹ ká ẹnyị nyaa ri ịGachọn bala iKohatị bala iMerari. Ịwa angị ịta ịwẹ à ri adịda igogo nya ogang-ogang nyaa ịnyịnyị lẹ. ILivayị ri ehe gbee kọ gu ẹka ohu ookpokpo da ẹka iwo ịta kụrụ irwiye (137) gbẹgbịle.

¹⁷ỊGachọn ma anyị alẹng imiiye. Ẹnyị nyaa ri iLibini bala iChimeyi. Ịwa tị ma anyị lụmẹ-lụmẹ ịnyịnyị.

¹⁸IKohatị ma anyị alẹng angị ine. Ẹnyị nyaa ri Amram bala Isaa bala iHebirọn bala Usiyẹlụ. IKohatị ayịdang ri ehe gbee kọ gu ẹka ohu ookpokpo da ẹka iwo ịta kụrụ ịta (133).

¹⁹IMerari ma anyị alẹng angị imiiye. Ẹnyị nyaa ri ịMahali bala iMuchi. Ogang ịla iLivayị bala anyị ịtụma nyaa-à wẹ lẹlẹ.

²⁰Amram ye ọnyịnịna nya adamwụ ọlẹ kị wụrụ iJokebẹdị. IJokebẹdị ọọwa à ma Erọn bala iMosisi ha Amram lẹ. Amram ri ehe gbee kọ gu ẹka ohu ookpokpo da ẹka iwo ịta kụrụ irwiye (137) gbẹgbịle.

²¹Isaa ma anyị alẹng angị ịta. Ẹnyị nya anyị nyamwụ ịịwa ri iKora bala ịNẹfẹgị bala iSikiri.

²²Usiyẹlụ ma anyị alẹng angị ịta ịnyịnyị. Ẹnyị nyaa ri iMichẹlụ bala Ẹlịsafan bala iSitiri.

²³Erọn ye Elichẹba ọnyị nya Aminadabụ. Elichẹba ọwẹ ri ọnyịnịna nya ịNachọn. Ọ ma anyị alẹng ịlẹ kị wụrụ ẹnyị nyaa ịNadabụ bala Abihu bala Eliyẹsa bala Itamaa ha Erọn.

²⁴IKora ma anyị alẹng angị ịta ịlẹ kị wụrụ ẹnyị nyaa Asii bala Elikana bala Abiyasafụ. Anyị ịwẹ à ri adịda igogo nya alogang nya anyị ịtụma nya iKora lẹ.

²⁵Eliyesa ọnyị ọlẹng nya Erọn ye ọnyị nya iPutiyẹlụ. Ọọwa, ọ ma ọnyị ọlẹng ọlẹ kị wụrụ iFinihasị họọ lẹlẹ. Angịwẹ a ri adịda igogo nya alugbiyegu bala alogang ọnyọnyọọnyị ilimwawụ nya iLivayị lẹlẹ.

²⁶Erọn bala iMosisi à ri angịlẹ ká Amkpaa ya ẹla ta yẹkẹẹ, “Anụ gba ala Isirẹlụ wuu kpehe bwu ọpyị nya Ijipiti mẹ” lẹ.

²⁷Ịwa à tị ri angịlẹ kị kele ka byi adịrahụ nya ala Ijipiti ya nyị tụụbwọ hi ala Isirẹlụ rụ mẹ ịnyịnyị lẹ.

²⁸Ụka ká Amkpaa ya ẹla ta iMosisi ụ-ụwa Ijipiti,

²⁹ọ byi iMosisi yẹkẹẹ, “Am kpangga à ri Amkpaa lẹ. Aa ya je adịrahụ nya ala Ijipiti ẹla myị ẹla ọlẹ kam wẹẹ ya dung ọrụ tọọ mẹ.”

³⁰Ma, iMosisi byi Amkpaa yẹkẹẹ, “Anyị ā tị́ mahị ká iFero ka myị-ị̀ ke ụrụ wo ẹla nyam am olugogo ọlẹ-ẹ̀?”