Read idege EHE ỌKPỤKPỤ 7 Bible Online

EHE ỌKPỤKPỤ 7 - idege bible

EHE ỌKPỤKPỤ 7

¹Ọọwa lẹ, Amkpaa a byi iMosisi yẹkẹẹ, “Yẹ mẹ, m̀ yang ku ọmwakpa nya ịlọm am Ohe Oluhye ị-ịlahị nya iFero lẹ, Erọn ọnyịnang à tị ka ku ọmwakpa nyang lala ọlọmwụ ịnyịnyị lẹlẹ.

²Aa ya ẹla myị ẹla ọlẹ kam bying mẹ, chajị ká Erọn ā byi iFero kọ tụụbwọ hi ala Isirẹlụ kị rụ bwu ọpyị nya Ijipiti mẹ.

³Ma, m̀ ka họ ká iFero ka ngịrị ọkịlẹtụ nyamwụ ọngịrị, jaabwọ myị abwọ kam chị ụkụrwọ ẹbyẹbyị nyam ehe lụmẹ-lụmẹ kaka ba.

⁴Ọ́ ka myị-ị̀ wo lang ka. Ọọwa, m̄ ka yụbwọ nyam gụ ala Ijipiti bwula ọ-yaa akama nya ịlẹhị-ịlẹhị lẹ, m̄ ka gba ala Isirẹlụ angịnyị nyam kpehe bwu ẹpwụ nya akama ọyẹyẹ lẹlẹ.

⁵Ụka kam yụbwọ gu ala Ijipiti, kam gba ala Isirẹlụ kpehe bwu ụwa lẹ, ala Ijipiti ịwẹ à ka jẹ ká am à ri Amkpaa lẹlẹ.”

⁶IMosisi bala Erọn họ jaabwọ ká Amkpaa daa ehile ya nyị họ.

⁷IMosisi gu ẹka iwo ineku (80), Erọn tị gu ẹka iwo ineku kụrụ ịta (83) gbẹgbịlẹ lụka ọlẹ kị kele ka ya ẹla ta iFero.

⁸Amkpaa byi iMosisi bala Erọn yẹkẹẹ,

⁹“Ó-ri ká iFero-ó byinu yẹkẹẹ, ‘Anụ họ ụkụrwọ ẹbyẹbyị ọhẹ nya ang-ẹjẹẹ mẹ’ lẹ aalẹ, à byi Erọn kọ hu ọgọdọ nyamwụ, kọ pẹ hyoo da keji ị-ịlahị nya iFero mẹ. Ọ ka yẹ la ilo.”

¹⁰Ọọwa lẹ, iMosisi bala Erọn à kele ka ẹga nya iFero lẹ, ị họ jaabwọ ká Amkpaa byaa lẹlẹ. Erọn pẹhi ọgọdọ nyamwụ da keji ị-ịlahị nya iFero Adịrahụ bala alegbeju ịtụkụ yoo. Ọgọdọ nya Erọn ọọwa yẹ la ilo.

¹¹Ọọwa lẹ, iFero a du ẹrụ kaka wụrụ angị jẹ ẹla bala angị mwụ ịnwa nyamwụ lẹlẹ. Angị mwụ ịnwa nya ala Ijipiti ịịwa kpa ịdachị nyaa họ jaabwọ ká Erọn anyị họ.

¹²Ọng myị ọng nyaa pẹhi ọgọdọ nyamwụ da kẹjị, ọ yẹ la ilo. Ma, ilo nya Erọn go ịnya angị mwụ ịnwa ịịwa mile.

¹³Tị kpọkpọkpọ, iFero ngịrị ọkịlẹtụ nyamwụ ọngịrị, ọ́ myị ke ụrụ la ọbịlẹ-bịlẹ nya iMosisi anyị ka, jaabwọ ká Amkpaa ya deeji ene.

¹⁴Ọọwa lẹ, Amkpaa-à byi iMosisi yẹkẹẹ, “Adịrahụ iFero-ó myị pwuru ọkịlẹtụ kokoo. Ọ pwa gbanggbang nyọka pẹhiinu rụ lẹ.

¹⁵Lẹẹlẹ, aa kele ka ẹga nyamwụ lụtụrụ ụka kọ kà juwa jẹ yahị da ka Ihu ịNayịlị mẹ. Aa godayị gboo ọ-ọnụụka nya ihụ la ọgọdọ nyang ọlẹ kọ yẹ la ilo lẹẹ ụ-ụbwọ ịnyịnyị mẹ.

¹⁶Ọọwa lẹ, ká byoo mẹ, ‘Amkpaa Ohe Oluhye nya ala iHiburu dum ẹrụ tọng yẹkẹẹ: Pẹhi angịnyị nyam kị rụ, chajị kị ka gbịgba ham u-ugbileji mẹ. Ma, gbee da wẹ amachanyị á myị ke ụrụ la ẹla ọọwa kaka lẹ,

¹⁷ịịle Amkpaa a ya lẹ. Bwula ọlẹ ā ka jẹ kọọwa kpakpakpa a ri Amkpaa lẹ. M̀ ka ya ọgọdọ ọlẹ kam kpa lẹẹ ụ-ụbwọ wa enyi ọ-la Ihu ịNayịlị ọlẹ kpayị̀. Ọọwa lẹ, enyi ọlụwa wuu à ka yẹ la ịwọ lẹlẹ.

¹⁸Iyenyi ịlẹpwụ nya ịNayịlị wuu ka gbu. Lẹ, enyi à ka nyí oru lẹlẹ. Ọngọngọhẹ nyanụ anụ ala Ijipiti-í ka byẹjẹ kpa enyi ọọwa ka ọnụ myị kpong-kpong ka.’ ”

¹⁹Amkpaa ya ẹla ta iMosisi yẹkẹẹ, “Byi Erọn kọ hu ọgọdọ nyamwụ kpa ụ-ụbwọ, kọ nịra ụbwọ kpaaa koye ọnyị myị ọnyị ká enyi ji wuu Ijipiti mẹ. Ọọwa, ị ka yẹ la ịwọ wuu lẹlẹ. Ẹga myị ẹga ụ-ụwa Ijipiti wuu ka myị la ịwọ, tụ ị̀bá bala àya nya enyi bala ẹmwụ-enyi. Ịwọ ka dọmwụ juwa ẹ-ẹpwụ nya ikwori bala irim ị-kpa ju enyi nyaa wuu ịnyịnyị.”

²⁰IMosisi bala Erọn họ kpẹẹkpẹẹ jaabwọ ká Amkpaa byaa ya nyị họ. Erọn hu ọgọdọ nyamwụ hwaaa, ya wa enyi ị-ịlahị nya iFero bala alegbeju ịtụkụ yoo lẹ, enyi wuu a yẹ la ịwọ i-ijata ijata lẹlẹ.

²¹Iyenyi ịlẹpwụ nya Ihu ịNayịlị wuu gbu kpẹngkpẹng. Enyi ọlụwa wuu ri ukpooru-ukpooru dudu ká ala Ijipiti-í nwọọ myị ka. Ịwọ ji ẹga myị ẹga nya ọpyị nya Ijipiti wuu.

²²Ma, angị mwụ ịnwa nya ala Ijipiti tị jẹ kpa ịdachị nyaa họ lala iMosisi anyị. Lẹẹlẹ, iFero ngịrị ọkịlẹtụ nyamwụ ọngịrị kịlahị-ịlahị. Ọ́ myị ke ụrụ la iMosisi bala Erọn ka jaabwọ ká Amkpaa ya deeji ene.

²³Ọ nyẹẹkpẹ daa lẹ, ọ rụ ya ẹtẹ chị ẹpwang nyamwụ lẹlẹ. Ẹlẹwẹ-ẹ́ ryoo ẹlẹlẹhẹ kpong-kpong ka.

²⁴Ala Ijipiti juwa wụ ẹmwụ tụ ọnụụka-ọnụụka nya Ihu ịNayịlị da kị ka ye enyi ọnwanwa, chajị enyi ọlẹpwụ nya Ihu ayịdang á há ọnwanwa kaka.

²⁵Ụka ká Amkpaa họ ká ihụ ịNayịlị yẹ ịwọ ịwọ kpá, ọ nọ lala ẹnụtụrụ irwiye gbẹgbịlẹ.