Read idege EHE ỌKPỤKPỤ 8 Bible Online

EHE ỌKPỤKPỤ 8 - idege bible

EHE ỌKPỤKPỤ 8

¹Ọọwa lẹ, Amkpaa-à byi iMosisi yẹkẹẹ, “Yegiri kele ka ẹga nya iFero adịrahụ, ká byoo Amkpaa nyị yẹkẹẹ, ‘Pẹ hi angịnyị nyam kị rụ, chajị kị ka gbịgba ham mẹ.

²Ó-ri ká myị tụụbwọ hyaa rụ ka aalẹ, m̀ ka yẹ ọpyị nyang ọlẹ wuu lẹpwụ-lẹpwụ akama bwula o-du arwa kaka myị ám̀ kpọrịkọọ.

³Ihu ịNayịlị ka myị larwa-arwa wuu. Arwa ịịwa ka pwụ ẹpwa nyang. Ị ka ju ka ikwee nyang, ị dọmwụ ka hwò chị ka ịbẹẹdị nyang ịnyịnyị. Arwa ịịwa ka gbajị ju ka ẹpwa nya alegbeju ịtụkụ ying, ị ka hwo mịla angịnyị nyang wuu, ị ka hwo ju ka ẹpwụ nya àya nya ila ị-kpa họ ịkaa bala ediyo ị-kpa họ ịkaa nyanụ wuu ịnyịnyị.

⁴Arwa ịịwa ka gbajị kụng u-uhye bala angịnyị nyang bala alegbeju ịtụkụ ying ịnyịnyị.’ ”

⁵Ọọwa lẹ, Amkpaa-à byi iMosisi yẹkẹẹ, “Byi Erọn kọ nịra ụbwọ nyamwụ kpaaa lọgọdọ koye nya ịba bala àya bala ẹmwụ-enyi ọnyị myị ọnyị, ká arwa ā kpehe bwu ụwa wẹ ẹga myị ẹga nya ọpyị nya Ijipiti mẹ.”

⁶Ịnyị, Erọn à nịra ụbwọ nyamwụ kpaa ka uhye-ọgba nya ẹga ká enyi ji Ijipiti lẹ, arwa à kpehe bwọọọ kaka pyẹ yịrị ọpyị nya Ijipiti wuu lẹlẹ.

⁷Ma, angị mwụ ịnwa nya ala Ijipiti tị jẹ kpa ịdachị nyaa họ lala iMosisi anyị. Ị họ ká arwa gba kpehe wẹ odehe ịnyịnyị.

⁸IFero Adịrahụ du ẹrụ kaka wụrụ iMosisi bala Erọn lẹ, ọ byaa yẹkẹẹ, “Anụ raabwọ bịlẹ Amkpaa kọ tụ iru nya arwa ịlẹ kịnyaa him bala angịnyị nyam mẹ aalẹ, m̀ ka pẹhi alịnyanụ rụ kele ka kịla iya họọ lẹ̀.”

⁹IMosisi byi iFero yẹkẹẹ, “M̀ myị lẹ. Ya ụka ọlẹ kọ hang nọ ham kam ka raabwọ bịlẹ wọnụ nyang ju bala alegbeju ịtụkụ ying bala angịnyị nyang chajị ká arwa ịwẹ ka tụ kịnyaa hiinu mẹ. Ẹ-ẹpwụ nya Ihu ịNayịlị kẹnẹ-kẹnẹ arwa à ka hi ji ụbwọọmwụ lẹlẹ.”

¹⁰Lẹ, iFero à wẹ yẹkẹẹ, “Ijuju oleeri ọlẹ ā ka raabwọ chajị nyam lẹ.” IMosisi wẹ byọọ yẹkẹẹ, “Ọ ka la jaabwọ ká ya wẹ, chajị ká ka jẹ ya ojiga ọhẹ-lọhẹ á lala Amkpaa Ohe Oluhye nyahị kpong-kpong ka.

¹¹Arwa ịwẹ ka tụ kịnyaa hing. Ị ka myị́ hi ẹpwa nyang bala ẹga nya alegbeju ịtụkụ ying bala angịnyị nyang ịnyịnyị. Ẹ-ẹpwụ nya Ihu ịNayịlị kẹnẹ-kẹnẹ ị ka hi ji ụbwọọmwụ lẹlẹ.”

¹²Ụka ká iMosisi bala Erọn rụ bwu ẹga nya iFero kpá, iMosisi raabwọ ha Amkpaa kọ ka tụ arwa ịlẹ kọ kpa yẹ iFero akama kịnyaa.

¹³Ọọwa, Amkpaa-à họ jaabwọ ká iMosisi bịlọọ lẹ, arwa ịịwa à gbu hi ẹpwa bala epweji bala ẹrụ nyaa wuu lẹlẹ.

¹⁴Ala Ijipiti tụ egu nyaa tuuu kaka kụ ogu gbudum ẹ-ẹga datị-datị. Lẹ, ẹga myị ẹga wuu à nyí oru pwuuu lẹlẹ.

¹⁵Ma, ụka ká iFero jẹ kị bé ẹgba nya akama ọwẹ lẹ, ọ ngịrị ọkịlẹtụ nyamwụ ọngịrị lẹlẹ. Ọ́ myị ke ụrụ la ọbịlẹ-bịlẹ nya iMosisi bala Erọn ka jaabwọ ká Amkpaa ya deeji ene.

¹⁶Ọọwa lẹ, Amkpaa-à byi iMosisi yẹkẹẹ, “Byi Erọn kọ ya ọgọdọ nyamwụ weji kpuuu mẹ aalẹ, ekuruwa ọ-la Ijipiti wuu ka ẹga kọ ba ka yẹ la ịlahịkpuu.”

¹⁷Ụka kị họ ịnyị, ká Erọn ya ọgọdọ weji kpuuu lẹ, ekuruwa ọ-la Ijipiti wuu à yẹ la ịlahịkpuu kaka kụ angịnyị ehe bala iyo ileji lẹlẹ.

¹⁸Ma, ụka ká angị mwụ ịnwa nya ala Ijipiti maga kị ka kpa ịdachị nyaa wụrụ ịlahịkpuu ịnyịnyị, ọ́ chịkpẹẹ haa myị ka. Ịlahịkpuu ịịwa juwa chị angịnyị chị, ị juwa chị iyo ileji chị ịnyịnyị.

¹⁹Ọọwa, angị mwụ ịnwa ịịwa à byi iFero yẹkẹẹ, “Akama olugbẹnyị ọle bwu ẹpwụtụbwọ nya Ohe Oluhye lẹ̀.” Ma, ọkịlẹtụ nya iFero hwo gbonggbong lẹ, ọ́ myị ke ụrụ la ẹla nya iMosisi anyị ka, jaabwọ ká Amkpaa ya deeji ene.

²⁰Ọọwa lẹ, Amkpaa-à byi iMosisi yẹkẹẹ, “Aa chahị lụtụrụ gbegbegbe kaka tọ iFero ụ-ụgbẹyị ụka kọ ka jẹ ka ogo, ká byoo Amkpaa nyị yẹkẹẹ, ‘Pẹ hi angịnyị nyam kị rụ, chajị kị ka gbịgba ham mẹ.

²¹Ọ́-ri ká myị tụụbwọ hyaa rụ ka aalẹ, m̀ ka du iru nya ịjị chịng ọgụ bala alegbeju ịtụkụ ying bala angịnyị nyang. Ịjị ịịwa ka hụ̀ ju wẹ ẹpwa nyanụ wuu. Ị ka myị̀ ẹpwa nyanụ anụ ala Ijipiti kpọrịkọọ. ánụ dọmwụ ka ye ẹgẹgẹhẹ ya ẹta dụrụ kpong-kpong ka.

²²Ụka ọọwa, m̀ ka họ ang ọdatị o-oye nya iGochin, ẹga ká angịnyị nyam kụ. Ḿ ka du ọjị ọhẹ-lọhẹ ka ụwa ka, chajị ká ka jẹ kam Amkpaa jam lọngịrị nyam ọ-ọpyị ọlẹ.

²³M̀ ka jẹ angịnyị nyam datị hị angịnyị nyang. Ijuju ụkụrwọ ọlẹbyẹbyị ọwẹ à ka họ lẹ.’ ”

²⁴Ọọwa, Amkpaa-à họ jaabwọ kọ ya lẹ, iru nya ịji a mwụ bwọọọ ju ka ẹpwa nya iFero bala ẹpwa nya alegbeju ịtụkụ yoo lẹlẹ. Ẹga myị ẹga ọ-ọpyị nya Ijipiti wuu bịrị ahị ọọ-la ịjị ịịwa.

²⁵Ọọwa lẹ, iFero à du ẹrụ kaka wụrụ iMosisi bala Erọn lẹ, ọ byaa yẹkẹẹ, “Anụ rụ kele ka kịla iya ha Ohe Oluhye nyanụ ám̀ ọ-ọpyị nya Ijipiti mẹ.”

²⁶Ma, iMosisi wẹ byoo yẹkẹẹ, “Eheehe, ọlịnyị-ị́ ka há koo. Ụma nya iya ịlẹ kahị kaa kịla ha Amkpaa Ohe Oluhye nyahị rigọgọ nya ala Ijipiti. Lẹ, ó-ri kị yẹhị, ị ka da ajwọ nwụhị.

²⁷Ẹla kahị ka jẹdịyẹ ka ugbileji ẹ-ẹpwụ nya ẹnụtụrụ ịta gbẹgbịlẹ kaka kịla iya ha Amkpaa Ohẹ Oluhye nyahị jaabwọ kọ dahị ehile ịnyị.”

²⁸IFero yẹkẹẹ, “M̀ ka myị hanụ kanụ ka kele ka ugbileji kaka kịla iya ha Amkpaa Ohe Oluhye nyanụ lẹ. Ma, ọkẹnẹ-kẹnẹ ri yẹkẹẹ, ánụ ka jẹ lụrụ ka. Anụ bịlẹ chajị nyam mẹ.”

²⁹Ọọwa, iMosisi à wẹ yẹkẹẹ, “Ụka kam rụ bwu ẹga nyang bwaaa lẹ, m̄ ka raabwọ bịlẹ Amkpaa chajị ká ịjị ịwẹ ka tụ kịnyaa hing bala alegbeju ịtụkụ ying bala angịnyị nyang ijuju lẹlẹ. Ọkẹnẹ-kẹnẹ ri yẹkẹẹ, aa jẹ myị̀myị ọwa nyị́ ka dahị lụgbaa ugbẹnyị bwula ọ-dahị yi la o-kele ka kịla iya ha Amkpaa kaka mẹ.”

³⁰Ọọwa lẹ, iMosisi à yegiri bwu ẹga nya iFero lẹ, ọ raabwọ bịlẹ Amkpaa lẹ,

³¹Ọ họ jaabwọ ká iMosisi bịlẹ bwu ẹga nyamwụ lẹlẹ. Ịjị ịịwa tụ kịnyaa hyoo bala alegbeju ịtụkụ yoo bala angịnyị nyamwụ wuu gbanggbang. Ọhẹ-lọhẹ á hi chị ọmwụ beji ka.

³²Ma, ugbẹnyị myịmyị iFero ngịrị ọkịlẹtụ ọngịrị, ọ́ myị pẹhi ala Isirẹlụ rụ ka.