Read idege EHE ỌKPỤKPỤ 9 Bible Online

EHE ỌKPỤKPỤ 9 - idege bible

EHE ỌKPỤKPỤ 9

¹Ọọwa lẹ, Amkpaa-à byi iMosisi yẹkẹẹ, “Kele ka ẹga nya iFero Adịrahụ ká byoo mẹ, ịịlẹ am Amkpaa Ohe Oluhye nya ala iHiburu à ya lẹ: ‘Pẹ hi angịnyị nyam kị rụ, chajị kị kele kaka gbịgba ham mẹ.

²Ó-ri ká myị tụ hyaa ka, ká kịnyaa juwa dabwọ raa aalẹ,

³m̀ ka yụbwọ gunu bwula o-du ẹdụrụ onyobyi wẹ uhye nya iyo ileji nyanụ. Ẹdụrụ ọọwa ka jụ anyịrẹ bala ibyiyó bala angịrẹ ịkamẹlụ bala ịkpịlọ bala embiri nyanụ wuu.

⁴Ma, am Amkpaa ka họ ká ang ọdatị ka ji ẹpwarịrị nya iyo ileji nya ala Isirẹlụ bala iyo ileji nyanụ anụ ala Ijipiti. Iyo ọhẹ-lọhẹ nya ala Isirẹlụ-ụ́ ka gbu ka.’ ”

⁵Amkpaa dọmwụ hu ẹnụtụrụ nọ ụka ká akama ọọwa ka pwụ eji. Ọ yẹkẹẹ, “Ijuju oleeri ọlẹ m̄ ka ya akama ọọwa du chị ọpyị ọlẹ ọgụ lẹ.”

⁶Ụka ká ahị ọọnamwụ pyẹ lẹ, Amkpaa-à họ jaabwọ kọ ya lẹlẹ. Iyo ileji nya ala Ijipiti wuu gbu kpẹngkpẹng, ma, ịnya ala Isirẹlụ ọhẹ-lọhẹ á gbu ka.

⁷IFero du ẹrụ kaka tịtọ wọ chajị nya iwe-ahụrụ ọlọpyị nyamwụ. Ị ya joo iyo ileji nya ala Isirẹlụ ọhẹ-lọhẹ nyị gbu ka. Ti kpọkpọkpọ, iFero ngịrị ọkịlẹtụ nyamwụ ọngịrị, ọ́ myị tụhi ala Isirẹlụ rụ ka.

⁸Ọọwa lẹ, Amkpaa-à byi iMosisi bala Erọn yẹkẹẹ, “Chụ agbụ ẹ-ẹpwụtụbwọ ịmanyị-ịmanyị bwu agbila, ká iMosisi ā ya chị ka uhye pwururu ị-ịlahị nya iFero mẹ.

⁹Agbụ ịịwa ka yẹ la ekuruwa ẹ-ẹga myị ẹga nya Ijipiti. Ọọwa, iyi i-ju àbẹ à ka kụ angịnyị bala iyo ileji ịlọpyị nya Ijipiti wuu lẹlẹ.”

¹⁰Ịnyị, ị chụ agbụ kpuu lẹ, ị kele kaka godayị ị-ịlahị nya iFero lẹlẹ. Ọọwa, iMosisi à tụ hyaa chị ka uhye pwururu lẹ, ị yẹ la iyi i-ju àbẹ kụ angịnyị bala iyo ileji kpúukpùukpúu ị-ịnyịrọ iijata-ijata lẹlẹ.

¹¹Angị mwụ ịnwa-á hu ẹngkịlẹ kpụ ị wẹ ẹga nya iMosisi anyị myịmyị kaka ọọ-la iyi ịlẹ kị kwaa bala ala Ijipiti ịkịla wuu.

¹²Ma, Amkpaa ngịrị ọkịlẹtụ nya iFero ọngịrị. Ọ́ myị ke ụrụ la ọbịlẹ-bịlẹ nya iMosisi bala Erọn kpong-kpong ka, jaabwọ ká Amkpaa ayịdang ya deeji je iMosisi.

¹³Ọọwa lẹ, Amkpaa-à byi iMosisi yẹkẹẹ, “Aa chahị lụtụrụ gbegbegbe ka ẹga nya iFero ká byoo ya am Amkpaa Ohe Oluhye nya ala iHiburu nyị yẹkẹẹ, ‘Pẹ hi angịnyị nyam kị rụ chajị kị ka gbịgba ham mẹ.

¹⁴Ó-ri ịnyị ka aalẹ, m̀ ka du akama wẹ uhye nyang ahụ ayịdang tụ alegbeju ịtụkụ ying bala angịnyị nyang wuu. Ọọwa ā ka jẹ ká ọngọngọhẹ-ẹ́ jam odehe ọlẹ wuu kọ lala am kaka lẹlẹ.

¹⁵Ịnọ m̀ dọmwụ ka kpa ụbwọ ọngịrị nyam yẹng bala angịnyị nyang akama bwula ẹdụrụ ọlẹ kọ ka tanụ wuu ayịreji gbanggbang myị lẹ.

¹⁶Ma m̀ tị yẹng chịng juwa hịhị, chajị kam ka chị ọngịrị nyam ehe mẹjẹng bala chajị ká ẹnyị nyam ka ru ohi yịrị odehe ọlẹ wuu yịrị.

¹⁷A tị kịnyaa la o-juwa ku angịnyị nyam iwe, á myị tụụbwọ hyaa rụ ka.

¹⁸Lẹẹlẹ, ijuju amachanyị ịịlẹ, m̀ ka do ekpawẹ ịtụka-ịtụka ám̀ Ijipiti. Ụma nya ekpawẹ ịlịnyị-ị́ do ẹnẹnẹhẹ mwịijị kanụ kụ ọpyị nya Ijipiti ọlẹ lẹka.

¹⁹Aa du ẹrụ kaka kpa iyo ileji nyang bala ang myị ang ịlẹ ká la juwa ẹ-ẹrụ wuu ka ẹpwụ nya ụdaa mẹ, chajị ekpawẹ ịịwa ka do nwụ ọngịnyị ehe bala iyo oleji ọnyị myị ọnyị ọlẹ kọ juwa ẹ-ẹpwang ka.’ ”

²⁰Angịhyẹ ẹ-ẹpwụ nya alegbeju ịtụkụ yi iFero Adịrahụ ịlẹ kị ju uhi nya ọna ọdada nya Amkpaa chị agaga kaka kpa anyịhị bala iyo ileji nyaa wuu kele ka ẹpwang.

²¹Ma, angịlẹ ká ọna ọdada nya Amkpaa-á laa nya ẹla ka pẹhi anyịhị bala iyo ileji nyaa ụ-ụwa ẹ-ẹrụ.

²²Ọọwa lẹ, Amkpaa-à byi iMosisi yẹkẹẹ, “Hu ụbwọ nyang hwaa ka uhye-ọgba, chajị ká ekpawẹ ka do ẹ-ẹga myị ẹga nya ọpyị nya Ijipiti mẹ. Ekpawẹ ịịwa ka do mịla angịnyị ehe bala iyo ileji bala ang-ẹrụ ịlẹ kị juwa ẹ-ẹrụ nya ala Ijipiti.”

²³Ọọwa lẹ, iMosisi à hu ụbwọ nyamwụ hwaa ka uhye-ọgba lọgọdọ nyamwụ lẹ, Amkpaa-à du ịkpala bala ekpawẹ bala apya ọchịchị ọtụka-ọtụka wẹ eji lẹlẹ.

²⁴Ekpawẹ juwa dodo, apya juwa chị mànya-mànya bwu oye ọhẹ koye ọkịla lụka ọọwa. Ekpawẹ inyibyi ịlịnyị-ị́ do ẹnẹnẹhẹ mwịịjị ká ala Ijipiti ri ẹpwụma nya ịlaa lẹka.

²⁵Ekpawẹ ịịwa do kaka ta ang myị ang wuu ịlẹ kị ji ugbọdọda ẹ-ẹga myị ẹga nya Ijipiti ayịreji. Angịnyị ehe bala iyo ileji ta ayịreji ịnyịnyị. Ekpawẹ ịịwa hụla okoji ọnyị myị ọnyị hwẹẹhwẹẹ.

²⁶Ụ-ụwa ọ-ọpyị nya iGochin ẹga ka ala Isirẹlụ kụ kẹnẹ-kẹnẹ ekpawẹ à do kaka lẹlẹ.

²⁷Ọọwa lẹ, iFero à du ẹrụ kaka wụrụ iMosisi bala Erọn lẹ, ọ byaa yẹkẹẹ, “Am ayịdang la abyị ugbẹnyị lẹ. Ọhọhọ nya Amkpaa la kpakpa. Am bala angịnyị nyam họ tịpyọ lẹ.

²⁸Lẹ, raabwọ bịlẹ Amkpaa mẹ ká ịkpala bala ekpawẹ ododo ā kpụbahiihi mẹ. M̀ ka pẹhiinu rụ lẹ. Ánụ ka myịmyị-ị̀ hụ ám̀ kịlahị kaka.”

²⁹IMosisi wẹ byoo yẹkẹẹ, “Ahyaahị kam rụ bwu epweji ọlẹ kpá lẹ, m̄ ka hu abwọ nyam hwaa, juwa raabwọ ha Amkpaa lẹlẹ. Ọọwa, ịkpala bala ekpawẹ à ka kpụba, chajị ká ka jẹ kpangga ya Amkpaa a la odehe ọlẹ wuu lẹ.

³⁰Ma, am ayịdang jẹ kaahụ bala alegbeju ịtụkụ ying á ju uhi nya Ohe Oluhye Amkpaa lẹka.”

³¹Ụka ọọwa, ịrayịsị ịbali bala ìwú ịfụlakịsị wuu ta ayịreji, chajị ịbali ịịwa ga kpá ene lẹ, ìwú ịlụwa tị juwa ka wụrụ arụ lẹ.

³²Ógù nya ịrayịsị iwiiti anyị-ị́ tị bịrị ka, chajị ụka nya ọgaga nyaa á pwụ lẹka.

³³Ọọwa, iMosisi a yegiri bwu ẹga nya iFero kpehe hi epweji lẹ, ọ hu abwọ nyamwụ hwaa juwa raabwọ ha Amkpaa lẹlẹ. Lẹ, ịkpala ọkpụkpụ bala ekpawẹ ododo à bà lẹlẹ. Enyi-í tị myịmyị do gụ ọọwa kaka.

³⁴Ụka ká iFero yẹ ká enyi kpụba la ododo, ká ekpawẹ bà la ododo, ká ịkpala kpụba ịnyịnyị wuu lẹ, ọ họ ang ọtịpyọ myịmyị lẹlẹ. Ọwa bala alegbeju ịtụkụ yoo ngịrị ọkịlẹtụ nyaa ọngịrị lala olene-ene.

³⁵Lẹẹlẹ, iFero ngịrị ọkịlẹtụ nyamwụ ọngịrị, ọ́ myị pẹhi ala Isirẹlụ rụ ka jaabwọ ká Amkpaa ya deeji ene-ene bwula iMosisi.