Read idege IJobu 10 Bible Online

IJobu 10 - idege bible

IJobu 10

¹“Ọhịhị nyam chịm aga kpá pwẹ́ẹ̀pwẹẹ lẹ. M̀ ka chị eru nya ọjụjụ nyam gbagbịla, ya ẹla onyuujujwo ọlẹ kọ wum ọyị a-alegu.

²M̀ bying ahụ Ohe Oluhye yẹkẹẹ, Ā ya eje wum ịịwẹ ododu ka. Ya jem kam jẹ ẹla ọlẹ ká yụbwọ chị wẹẹ kpa jahị dam.

³Ọ kpụng ịpyọ nyọlẹ ká wẹẹ tụm pyị eji-í? À nyẹẹkpẹ dam am ọngịnyị ọlẹ ká họ lụbwọ nya ịlọng, juwa chị ọkẹkẹnị ju ọhọhọ nya alabwẹla.

⁴Ugbẹhị ọlala ịnya ọngịnyị ā la lẹ-ẹ́? À kaa yẹ ang jaabwọ ká angịnyị ehe kaa yẹ-ẹ́?

⁵Ọhịhị nyang la kpii lala ịnya ọngịnyị ehe-é? Ẹka nyang la pwụchẹkẹ lala ịnyahị-ị̄ị́?

⁶Lee ịyẹ tị́ du ká wẹẹ pịlahị nya abyị nyam, juwa tịtọ nyọka yem ẹla ịnyị-ị̄ị́?

⁷Ahụ ayịdang jẹ kam la abyị ka, ọngọhẹ-ẹ́ tị jam ka chịm da bwu ẹpwụtụbwọ nyang myị ka.

⁸“Ụbwọ-ụbwọ nya ịlọng ā kpa họm lẹ, à tị mwọọgịlẹ jahị kpata jam tam ayịreji.

⁹À tị́ kpịtịya, à mem me jaabwọ kịị kpa ume me ang, ee lẹ, à jam gom pwụrẹ-pwụrẹ yẹm la ọrụ nya ọpyị ọọwa lẹ-ẹ́?

¹⁰À yam yẹju ka ẹpwụ nya ịnam lala enyi, à họ ịnyịrọ nyam wukpa juwa nwà ụ-ụwa.

¹¹À ya ekpinegu bala ekpiiji nyam da yi awụlẹ, ya ahwiiyo bala ugba kụrụm kpẹmkpẹm.

¹²Ahu à ya ọhịhị ham bala ọ-họm ọnahị lẹẹ, bala ọ-chẹwụ kem du kam lẹẹ hịhị lẹ.

¹³“Tị yẹ-ẹ̀ wẹ mẹ, ang ịlẹ ká tịtọ ká ka họm wuu, à ya kpịbaa ọ-ọkịlẹtụ nyang. Ugbẹnyị lẹ, m̀ jẹ obyi omeme nyang ọọwa lẹ.

¹⁴Ḿ họ ang onyobyi lẹẹ, à tị́ wum, yẹm akama, á kaa myị-ị̀ hịnyọhi ham ka.

¹⁵Ḿ ri ọlabwẹla onyobyi lẹẹ, ịnọ inyiribyi ri ịnyam lẹ. Ḿ tị họ ang ọnyịịla họ, oyoyi bala akama à kaa myịm pwẹẹpwẹẹ lẹ.

¹⁶Ḿ maga kam hu egbeju kèmbee wẹwẹ, à dịrẹm lala ugẹbẹ à durwe nya iyo, bala o-juwa họ ụkụrwọ ịlẹbyẹbyị, chajị nyọka tụm pyị eji.

¹⁷À kaa họ ibeenu tụm pyịpyị ụka wuu, ikẹjẹ-awụrụ nyang juwa nwa kịlahị-ịlahị jahị dam, ẹwụ onyeewe-onyeewe āà da tam lẹ.

¹⁸“Ang pyii kam ka gbu o-okube ẹnụmwụ, ene ká ọngọhẹ ka yẹm jẹm ogu nya ọngịnyị ehe.

¹⁹O-hum bwu okube kpụrụrụ kaka ju eji, dọmwụ hagụ ọ-mam-m̀ ma wẹ odehe lẹ.

²⁰Yẹ jaabwọ ká ẹnụtụrụ nya ọhịhị nyam la pwụchẹkẹ wẹẹ! Bà him kam la ịlọm chẹẹ ẹnụtụrụ ihihi ịmanyị-ịmanyị ịwẹ

²¹ene ḿ ka hu ang ẹdịyẹ ọnyànya ka kele ka ẹpwụ nya ukpowu nya ọpyị ọlẹ kọ ri odolowu mẹ.

²²Ọpyị ọọwa ri ẹga ọlẹ ká odu-ù hi ọngịnyị, ká ukpowu ohite-hite bala ojígī-jìgī ji, ká ahịgboo juwa dala ukpowu kaka.”