Read idege IJobu 11 Bible Online

IJobu 11 - idege bible

IJobu 11

¹Ọọwa, iSofaa ọla ịNaama-à wẹ byi iJobu yẹkẹẹ,

²“Ọọwa ri ọngọhẹ-ẹ́ ka wẹng iru nya ala ịwẹ ká ya myị eji kpàtaaa wẹ ka-á? Ọ ye ya myị edo bala akpang du ká ri oku-ú?

³Ẹla o-ya hwolo-hwolo nyang ịwẹ ka ku angịnyị umọnụ-ụ̄ụ́? Kị ka dang o-taá nya ọ-ya ẹla hu Ohe Oluhye pwụchẹẹ ka-á?

⁴À byi ịlọng ká irya nyang wuu la kpakpa, kaahụ ayịdang la charị-charị ị-ịlahị nya Ohe Oluhye.

⁵Ang pyii ká Ohe Oluhye ka ya ẹla, kpa ọnụ nya ịlọmwụ wẹng ẹlẹwẹ.

⁶Ịnọ ọ ka mẹ ẹla ọjẹjẹ okpori-kpori jẹng. Ẹla ọjẹjẹ-ẹ́ la ụgbẹyị ookpokpo kem ka. Aa jẹ mẹ, Ohe Oluhye-é yẹng akama pwụ ẹga ká ịhọbịrị nyang ju iru ka ba lẹka.

⁷“À ka jẹ-ẹ̀ me ẹla-ịbaa nya Ohe Oluhye ẹpwụ, ká ka jẹ ụmụmẹ bala ẹga ká ọngịrị nya Agụgụ ba-á?

⁸Ẹla ọjẹjẹ nyamwụ la teneee kpoye nya uhye-ọgba, ịyẹ ā tị́ ka jụ họ myị? Ọ la kpori-kpori gụ ejegu wẹẹ, á tị jẹ ụwa jẹ ka.

⁹Ụmụmẹ nya Ohe Oluhye la udiyo gụ ọpyị, ọ ju ẹpwụ gbamgbam gụ Ihu ọtụka.

¹⁰“Ó-ri ká Ohe Oluhye-é tụng ju ube lee ọ-wụrụng eje ká ube nya eje, oowo à tị́ ka dọọ yi myị-ị̀?

¹¹Ohe Oluhye jẹ angịlẹ kị ri abala nya angịnyị, Ọ jẹ ang onyobyi ọhọhọ nyaa wuu kpẹẹkpẹẹ.

¹²Oluchi á ka jẹ-ẹ̀ jẹ ẹla myị kaka, jaabwọ ká obyiyó ọlẹpwamẹ-ẹ́ ka jẹ-ẹ̀ la mịlẹ́-mịlẹ́ lala ọlẹpwa ka.

¹³“Tụtụ hu ọkịlẹtụ nyang ha Ohe Oluhye, ká nịra ụbwọ kpaaa juwa bịlẹ ụbwọ ọdada bwu ẹga nyamwụ,

¹⁴ká tụ ọhọbịrị ịlẹ kaa họ kịnyaa hi ịlọng, tụ ịlẹ kị juwa ẹ-ẹpwa nyang mẹ.

¹⁵Aalẹ, oyoyi nyang ka myị, à ka godayị kpakpaakpa la uhi ojuju ka.

¹⁶Aalẹ, à deeri nya akama wuu, jaabwọ kịị deeri nya enyi ọmyị̀myị ọlụka nya ụhyọọ ụka ká inehe-é wẹ.

¹⁷Odehe nyang ka hụ́ tengteng gụ ahịgboo nya ẹnụ ọ-rịrị ẹ-ẹpwayịrẹtẹ, odu nyang ka hụ́ kpangkpang lala ahịgboo nya ahị ọpyẹpyẹ lụtụrụ.

¹⁸À ka hị ẹ-ẹpwụ nya okpunyi bala ahị ọdahịle, Ohe Oluhye ka chewu keng, bala ọ-ya ịnyọ ọmwụmwụ hang.

¹⁹À ka nune la ọ-chị uko nya ịngịngịhyẹ ka. Iru nya angịnyị ka wẹ kaka bịlẹng ká ka daa ụbwọ.

²⁰Alabwẹla tị lẹ, ahị ka haa korii, Ị́ ka ye ẹgẹhẹ bwu be myị ka. Ahị ọdahịle ọhẹ-ẹ́ ji haa dala igu ogbugbu kaka.”