Read idege IJobu 12 Bible Online

IJobu 12 - idege bible

IJobu 12

¹Ọọwa lẹ, iJobu à wẹ iSofaa ẹla yẹkẹẹ,

²“Hyẹ̀ẹ́ẹ̀! angịnyị ịlahịchịng chọ́ọ̀! Ụka odehe nyanụ-ụ́ myị, ẹla ọjẹjẹ tị́ ka myị ịnyịnyị!

³Anụ wo mẹ! M̀ jẹ pwụ ẹga kanụ jẹ-ẹ̀ wẹ ịnyịnyị. ale m̄ tị́ hi ụ̀nyẹ́ gụụnụ-ụ̀ wẹ-ẹ̀? oja nya odo bala ugbẹma anụ wẹẹ ja lẹ.

⁴Am à dachichi ri ẹla ẹlẹhụ nya aligu nyam lẹẹ lẹka-á? Am ọlabwẹla ọnyịịla ọlabyị-ka ọlẹ kam raabwọ ká Ohe Oluhye kaa wẹm— m̄ dachichi ri ẹla ẹlẹhụ nya aligu nyam lẹẹ lẹka-á?

⁵Ọ-kpa angị ji ẹpwụ nya akama họ chakpa-à chị angị hụ lokpunyi kpẹẹ. Ọngịnyị chị ụchụụ wẹẹ ka mịla eji mịla lẹ, ị cha chii gwoo gbaá.

⁶Alagbụrụ kaa hụ lokpunyi, angị du agbama ju Ohe Oluhye kaa nọ lọpịlẹyị, ojiga ọlẹ kị dahịhile à tị ri ọngịrị nyaa lẹ.

⁷“Ánụ tọ iyo ileji towo, ị ka mẹjẹẹnụ, ó-ri ịchịnụ ri, ị ka ya jenu.

⁸Ang ịwụlọọ-wụlọ ịlịpyị dọmwụ ka mẹjẹẹnụ, iyo ịlẹpwụ nya Ihu ka ya jenu ịnyịnyị myị.

⁹Ọnyị myị ọnyị nya ang ịwẹ wuu jẹ ká Amkpaa-à họ ụkụrwọ ịwẹẹ wuu.

¹⁰Ẹ-ẹpwụtụbwọ nyamwụ ọhịhị nya ang ọdịhụ ọnyị myị ọnyị tụ ịnya ọngịnyị ehe à ji lẹ.

¹¹Jaabwọ ká ẹlẹlẹ à kaa jẹ ịpyọ ọlala nya ang oriri, ịnyịnyị ụrụ à kaa ma ẹla owowo yẹ lẹ.

¹²Ọgbahị à jẹ ẹla okpori-kpori lẹ, Ọngọ chị ugoba à tịtị jẹ ọkpẹẹkpẹẹ lẹ.

¹³Ohe Oluhye tị la ẹla ọjẹjẹ bala ọngịrị. Ọwa-à la irya bala ang ọ-jẹ rige-rige lẹ.

¹⁴Ang myị ang ká Ohe Oluhye-é tụrụ ju eji, ọngọngọhẹ-ẹ́ ji mọọ nwụ myị kaka. Ọ́ wu angịnyị ju agba, oowo tị́ ka gbaa kpehe myị?

¹⁵Ọ́ wu enyi ododo kpa, ẹga myị ẹga wuu kaa chị ọhụ kịra-kịra, ọ́ tụbwọ hyoo weji, enyi tị myị̀ yịlọlọọọ tụ ẹga ku.

¹⁶“Ohe Oluhye lọngịrị la, ọọ kụrụ-kụrụ, angịlẹ kị pịrị ju tụ angị kaa pịrị angịnyị ju ji ekpeleji nya ọngịrị nyamwụ.

¹⁷Ọọ nu angị ju angịnyị irya ẹla ọjeje nyaa, bala ọ-họ ká angịleje ịtụka kaa họ ẹla uchi-uchi

¹⁸Ọ kaa pwọ ịdịrịhụ ịwụrụ nyaa, ya ịpwụ chaa ọ-ọhị lala alagba.

¹⁹Ọọ nu angịkiliya ihi ọlala nyaa, bala ọ-pwọ angịtụka ọmwụ cheji.

²⁰Ọọ tụ ọnụ nya angịlirya i-ju ọdahịhile ku, bala o-nu angịgbahị ẹla ọjẹjẹ.

²¹Ọọ hu oyoyi ju alegbeju ịtụka, bala o-nu angịtụka ọngịrị nyaa.

²²Ọọ chị ang ịkpịbaa ịlẹpwụ nya ukpowu ehe, ahịgoo nyamwụ pwụ ẹga ka ukowu okpemkpkem ji.

²³Ọọ họ ká ẹpwụma ka la ọngịrị, ọ tịị taa ayịreji kpọkpọọkpọ. Ọọ họ ká ụma ka pyẹ ẹpwụ kịlahị, ọ tịị nyaa epepe.

²⁴Ọọ ye ẹla ọjẹjẹ nya alegbeju nya ụma kpa rụ, du kị juwa chị ịbalo tụ ang-ang da.

²⁵Ọọ họ ị kaa ma kpokpookpo ẹ-ẹpwụ nya ukpowu la o-ye ahịgboo ka, juwa yata lala angị nwa ere.