Read idege IJobu 13 Bible Online

IJobu 13 - idege bible

IJobu 13

¹“M̀ kpẹhị nya ịlọm yẹ ang ịwẹ wuu ene-ene, ụrụ nyam wowo, m̀ tị je etu nyaa wuu ịnyịnyị.

²M̀ jẹ pwụ ẹga kanụ jẹ-ẹ̀ wẹ ịnyịnyị. Ale m̄ tị́ hi ụ̀nyẹ́ gụụnụ-ụ̀ wẹ-ẹ̀?

³Agụgụ m̄ la ẹla ka ya ta lẹ. Ọ hám kam ka ya ẹla ta Ohe Oluhye ayịdang kọ ka jẹ ọchacha nyam.

⁴Anụ tị lẹ, anụ kwom-kwo la ịnịịkịla nyanụ; abala nya aletiji anụ wuu à ri lẹ.

⁵Ánụ ya ọnụ bawụlẹ lẹẹ ịnọ, anụ tị́ ka lala angị jẹ ẹla lẹ!

⁶Anụ ke ụrụ la ẹla ọdịrẹ-dịrẹ nyam, kanụ jẹ eje ọlẹ kam wẹẹ la.

⁷Ohe Oluhye anụ wẹẹ me ịnịịkịla ha lẹ-ẹ́? Anụ juwa kpa ịnịịkịla omeme chẹkpẹ jwoo-ọ?

⁸Anụ ka godayị leje yọọ dada-á? Anụ à ka ye eje nyamwụ la họọ lẹ-ẹ́?

⁹Ohe Oluhye-é wụlaanụ yẹ kpẹẹkpẹẹ, ànụ ya kanụ ka be gịlala myị wẹẹ-ẹ? Anụ me kanụ ka jẹ-ẹ̀ pịrọọ ju jaabwọ kanụ kaa pịrị angịnyị ju-ú?

¹⁰Anụ họ ẹla oye-oye ịbaa-ịbaa wẹwẹ, Ọ́ ka dayi la ọ-kpụnụ abyị kaka.

¹¹Ụmụmẹ nya Ohe Oluhye ka chị uhi junu. Uhi nyamwụ ọlẹ kanụ ka ju ka wunu ejiri.

¹²Etu ịdada nyanụ-ụ́ ju apyobwuna ka lala agbụ nya ila ọlẹ kọ wuru kpá. Ịwẹẹ ẹla nyanụ ịwẹ-ẹ́ la giri-gir ka.”

¹³“Anụ bà táaa chajị kam jẹ ya ẹla wẹẹ. Jaabwọ kọ lam lẹ, ọ lam mẹ.

¹⁴M̀ nwụlanọ nyọka ya egbeju nya ịlọm ju o-odo lẹ.

¹⁵Ohe Oluhye-é ka nwụm nwụ, ọ kịnyaa mẹ-ẹ̀, Ịyẹ m̄ tị la ka dahịhile wẹẹ? Tị kpọkpọọkpọ, m̀ ka leje gba ịlọm kpehe ị-ịlahị nyamwụ.

¹⁶O-ju ugbodu ya ẹla tọọ nyam ọlẹ à wẹẹ ka chịm chịda wẹẹ lẹ, chajị ọlabwẹla onyobyi ọhẹ-lọhẹ aa pwụ ijata nyamwụ myị ka.

¹⁷Anụ ke ụrụ kanụ wo ẹla nyam, kanụ kpa ẹla ọọwa ụ-ụrụ kpẹẹkpẹẹ mẹ.

¹⁸M̀ nwụla eje nyam nọ kpá lẹ. M̀ jẹ myị̀myị kam ka ri oku.

¹⁹Oowo tị́ ka jẹ abyị nyam ọhẹ bwuru dodehe-ēè? Ó-ri ká ụpịlẹ nya ọhẹ-ẹ́ ji ịnyị aalẹ, m̀ ka ya ọnụ bawụlẹ kem, kam ka gbu lọnụ ujiji.”

²⁰“Họ ang imiiye ịlẹ kam wẹẹ ka bịlẹng mẹ aalẹ, m̀ ka jẹ-ẹ̀ wẹ ịlahị nyang myị lẹ.

²¹Hwabwọ la ọ-yẹm akama ká hịnyọ la o-rum ịrụ la uhi ọ-chịjum mẹ.

²²Aalẹ, ká ya ẹla tam jene kam ā wẹng mẹ lee ḿ tị ka ya jene lẹ kaahụ ā wẹm mẹ.

²³Ụma nya ịhọbịrị ịlanyị m̄ tị́ họ-ọ̀? Ehile ịlẹ kam bịrị à tị́ léē?

²⁴Ịyẹ tị du ká nyẹẹkpẹ dam, hum lala oluji nyang ịnyị-ị̀?

²⁵À tụtụm ka jum am uguru-ụpwụ ọlẹ uhi-uhi-í? À ka myịmyị-ị̀ tụm am uwoo nya ogbi pyịpyịị-ị́?

²⁶À da ụpwụ onyobyi-obyi bam, juwa gbe ájẹjẹ-ka ịlụka nya enjwo nyam jum.

²⁷À jum odo a-atiye-atiye, juwa kpẹhị tụ ẹta-ẹdịyẹ nyam da bala o-ju ọgụ-ẹpẹtẹ nyam ẹjẹẹ.

²⁸“M̀[9] chachwọ gbada-gbada wuu lala okoji o-ru ịmwụrụkpẹ, lala awụrụ ọlẹ ká apịlẹ ri.”