Read idege IJobu 14 Bible Online

IJobu 14 - idege bible

IJobu 14

¹“Ẹnụtụrụ nya ọhịhị nya ọngịnyị-ehe ọlẹ ká ọnyang kpa ẹpwụ ma, la wure-wure bala ọ-myị la akama.

²Ahị lala àpwụ nya okoji ọlẹ kọọ wụrụ arụ, kọ tịị gbu piloo ahyaahị. Ahị kaa myị yịra-yịra lala arụrụ.

³Ohe Oluhye ee, ụma nya ọngịnyị ọpwụrẹ-pwụrẹ ọlala am ā ka wụrụ kaka godayị nyọka leje bala ahụ lẹ-ẹ́?

⁴Ang ọcharị-charị ka jẹ-ẹ̀ bwu ẹpwụ nya ọngịnyị ehe o-ju ibyi-í? Ọ́ ka jẹ-ẹ̀ lịnyị myị ka.

⁵À chị ẹnụtụrụ nya ọhịhị nya ọngịnyị ehe nọ, à hunọ ịnọmba nya ọya ịlẹ wuu kị ka hị kaka ba, à hu ụka nyaa nọ, doo gbanggbang lẹ, ị́ ka jẹ-ẹ̀ hị kpoye nya ọọwa myị kaka.

⁶Lẹẹlẹ, tụ ẹhị nyang kịnyaa ká bahyaa chẹẹ mẹ, kị jẹ chị kẹ̀kẹ jụ ụkụrwọ ọnyọọngịrị nyaa lala ọlụkụrwọ ọlẹ kị diroo-diro gbee ká ụka nyaa ka họ jịra mẹ-ẹ̀.

⁷“Okoji lẹ, ahị ọdahile juwa họọ wẹẹ, ị́ chọọ deeji, ọ ka myịmyị-ị̀ be myị wẹẹ.

⁸Atẹ nyamwụ-ụ́ chị okwirichi juwa ị-ịpyị wẹwẹ, ká ẹchụ nyamwụ-ụ́ gbugbu,

⁹enyi-í do, ọ ka be myịmyị, nwà kaka ri okoji onyeewe.

¹⁰Angịnyị-ehe tị lẹ, ị́ gbu kị jwaa eji lẹ, egbahị nyaa go lẹ, ọhẹ nyaa-á hi kaka.

¹¹Jaabwọ ká ihu ọtụka kaa nwụ dụmwọ-dụmwọ, ká ọ̀bá kaa chị ọhụ kịra-kịra linehe,

¹²ịnyịnyị-ịnyịnyị angịnyị à la lẹ, ị́ gbu lẹ, ịị wuleji kaka hịhị kaka. Ị́ nụwa nọ gbee ká uhye-ọgba ka chịpwụrụ, ị́ ka jẹ-ẹ̀ gu achwọ bwu ẹga kị yaa nọ kaka.

¹³“Ang pyíiì ká ka chị ang kem nụwa e-ejegu, kam ka kpịbaa gbee ká agbama nyang ọwẹ ka myị, ká ka hu ụka nọ ọlẹ ká ka kpịtịya nyam myịmyị.

¹⁴Angịnyị gbu kpá, ị ka myịmyị-ị̀ hịhị wẹẹ-ẹ́? Ịnọ ahị ọdahile tị́ ka ji ham kpụ m̄ ka godayị gbe ụka kam ka lịlọm bwu ẹpwụ nya akama lẹ.

¹⁵Ụka ọọwa, á be ẹkọ wụrụm, m̀ ka myị, ẹla nyam am ọngọlẹ ká họ lụbwọ nya ịlọng tị́ ka kpụng ịpyọ lẹ.

¹⁶Ụka ọọwa, à wụla ọgụ-ẹpẹtẹ nyam ọnyị myị ọnyị yẹ, á tụtụm ka ya ẹhị rịrị e-eji nya ịhọbịrị nyam kaka.

¹⁷À ka hịnyọhi abyị nyam ya ang gwaa nọ ka ọka, à ka yịlẹ ang ịtịpyọ ịlẹ kam họ wuu.

¹⁸“Jaabwọ ka ịgbọdọ ịtụka kaa chị ụka mịla ejị, ká ẹjwọ ọtụka kaa rị nmuru-nmuru bwu ẹga kọ nọ ene,

¹⁹bala jaabwọ ká enyi kaa ri ajwọ jọọjọọ, ká ọhụụ nya enyi kaa tụ ịpyị tuu kpa rụ, ịnyịnyị-ịnyịnyị ā kaa họ ẹhị ọrịrịị-rịrị nya ọngịnyị kaa ri ododu lẹ.

²⁰Á kụrụ ọngịnyị lọngịrị nyang, ịnyamwụ myị kam, à yọ́ọ ịkpangkachị ụka kọ gbu, à kwoo rụ ka obyibyi pyịyọọ.

²¹Anyị nyamwụ-ụ́ nwa kaka lehe ị-ịlahị, ọ́ ka jẹ-ẹ̀ jẹ ọọwa kaka, ị́ chị oyoyi chị jwaa ju, ọ́ juwa ka yẹ lẹhị nya ịlọmwụ kaka.

²²Ọjụjụ ọlịnyịrọ nyamwụ kem ọ jẹ lẹ, ohyuu ọlẹpwụ nya ịlọmwụ kẹnẹ-kẹnẹ mẹ ịnyị.”