Read idege IJobu 15 Bible Online

IJobu 15 - idege bible

IJobu 15

¹Ọọwa, Elifasị ọla ịTẹman à wẹ iJobu ẹla yẹkẹẹ,

²“IJobu ẹẹ, á jẹ ẹla ịnọ á ka ya ehwo nya ala ịlịịwẹ ka. À ya ẹla lala igbachịwụ à da.

³Ọngọ jẹ ẹla-aa da ịwẹẹ ododu ka, ọ́ọ̀ ya ẹla i-ju egbeju ka lẹ ka.

⁴Ó-ri ahụ-ahụ ịnọ ịngịngịhyẹ-ẹ́ ri uhi nya Ohe Oluhye ojuju, lee ihi nyamwụ ojuju kaka.

⁵Ang onyobyi ọhọhọ nyang a du ká byị ọnụ ọlịịwẹ lẹ, à ya ẹla lala ọlị̀kọnị.

⁶Ọnụ nyang a wẹẹ ya eje wung lẹ, oyina gum gu? Ọnụ-ọnụ nyang họ ibeenu tụng pyịpyị.

⁷“Ahụ ị ma wẹ odehe ọlẹ jene nya angịnyị ehe wuu lẹ-ẹ́? À ri ọgbahị nya ịgbọdọ-ọ́?

⁸À ya ụrụ kọ obyi ọlẹ ká Ohe Oluhye kaa me ịbaa-ịbaa-á? Ahụ ụbwọng à jẹ ẹla ẹ-ẹpwụ nya angịnyị ehe wuu lẹ-ẹ́?

⁹Kpakpaakpa lẹẹ, ẹla-ịyẹ á tị́ jẹ, kaahị-ị́ jẹ kpịlọ ka-á? Ọjẹjẹ nyang oyina ā tị́ kpa gụ ịnyahị lẹẹ-ẹ̀?

¹⁰Ẹla ọjẹjẹ nyahị á bwu am̀ alẹ kaka, angị ri ọgbahị nya adang à mẹ ẹla jẹẹhị lẹ.

¹¹“Ẹjẹ ọlẹ ká Ohe Oluhye wẹẹ kpụng á wung ẹpwụ ka-á? Ọnụ ọmịlẹ-mịlẹ ọ-kpa ya ẹla nyahị tang á nwang ka-á?

¹²Ịịyẹ tị́ wẹẹ dung ọkịlẹtụ kuukuu ịnyị? Ká ẹhị nyang wọ ọmẹẹ lala ahụ nyaa ri ododo?

¹³À juwa ju agbama ta Ohe Oluhye lẹ, ā wẹẹ kpa ọnụ ọpwọọ ya ẹla boo lẹ ka lẹ?

¹⁴“Ọngịnyị ehe olinyi e-egbeju la charị-charị ẹnẹhẹ lẹ-ẹ́? Ọngịnyị ká ọnyang kpa ẹpwụ ma tị́ ka họ anyị kọ ka la kpakpa ẹ-ẹga nya Ohe Oluhye myị?

¹⁵Alegu-ẹrụ ri alegu-ẹrụ, Ohe Oluhye-é dahịhilaa ka, ị́ la charị-charị a-ahị nyamwụ ka.

¹⁶Ọọwa, ā tị ya ịnya ọngịnyị ehe ányị lẹẹ mẹ! ọ byịbyị ká ị̀nwanị̀ juwa bá pyeee nyọka họ ang onyobyị lala ịnyaa juwa tịtọ nya enyi ọnwanwa.

¹⁷“IJobu ee, ke ụrụ kam ya ẹlẹhẹ jeng, Ẹla kam yẹ myị̀myịịmyị m̄ wẹẹ ka ya jeng lẹ.

¹⁸Ẹla ká angị jẹ ẹla mẹjẹm ịnyị, adaa igogo anyị à mọọ jaa lẹ, ị́ ya ẹlẹlẹhẹ kpịbaa ka.

¹⁹Ịwa-à ri angị la ọpyị lụbwọ-lẹta lẹ. Ọngọngọhẹ-ẹ́ bwu ẹgẹgẹhẹ kaka kpaa ụga ka.

²⁰“Ọngịnyị onyobyi kaa rị ebilo ẹ-ẹpwụ nya akama lọhịhị nyamwụ wuu, akama ọlẹ kị ya nalọ gbe ọngọ jujwọ-ẹpwụ à wẹ lẹ.

²¹Ọmọnyọ nya ang iluhi-uhi chọọ arụ ije, ụka ká ahị nwọọ gbọ̀ọ nyọka pyẹ pyọọ, alekpilo wẹ kaka bẹngkẹtị lọọ kem-m.

²²Ọ́ ka jẹ-ẹ̀ me irya nyọka kpehe bwu odolowu myị ka, ká ẹma ọlẹ kọ ka ryoo dụrụ ang lalẹẹ gboo.

²³Ogu nyamwụ ka ri ang oriri nya epwu,[10] ọ jẹ ká ẹnụ nya igu nyamwụ ji ọnaabwọ.

²⁴Akama bala imahị chi uhi jwoo, kụrwọọ chẹẹchẹẹ lala adịrahụ ọlọngịrị à wẹ lẹwụ.

²⁵Ajị nyọlẹ kọ go aga kụ egbirabwọ jahị da Ohe Oluhye, juwa yẹhị da Agụgụ bwee ịnyị.

²⁶Ajị nyọlẹ kọ chanya nya uya yahị da Ohe Oluhye, lọkụmada nya ẹwụ yahị dọọ myị̀myịịmyị.

²⁷“Ọwa ayịdang ri ang ju ama kpá, ọ kpụ ụdụ kpụ kpá ịnyịnyị,

²⁸Ọ kụ epweji ịlẹ kị kpụ egwawụ-egwawụ, ká angịnyị rụnyẹ rụ hi kpá, ẹwụ tị ka ta epweji ịịwa ayịreji wuu.

²⁹Ọ́ ka kpụ ụdụ ịịwẹ pyịyọọ ka, ang-ụdụ nyamwụ-ụ́ ka godayị rịrị juwa pyẹ yịrị ẹga wuu yịrị ịịwẹ pyịyọọ ka.

³⁰Ọ́ ka be bwu ukpowu myị ka, ila ka rwọọ lala okoji, igbachịwụ nya Ohe Oluhye ka tọọ ayịreji.

³¹Ọ́ da ịlọmwụ lụgbaa juwa dahịhile ụdụ nyamwụ, ọ ka kụ abwabwọ ụka ohyẹẹkpẹ.

³²Ene ka ụka nyamwụ ka họ jịra kpá, ọ ka ye uri nya ang onyobyi ọlẹ kọ họ. Ọ́ ka la anyị-apa ka.

³³Ọ ka lala alakọnụ ọlẹ ká egbe nyamwụ-ụ́ gaga ka kọọ wo hụrụ, ọ ka lala okoji nya olivu ọlẹ kọọ wo àpwụ hụrụ du kọ nwụ egbe ka.

³⁴Angịnyị inyibyi-í ka ma anyị ịlẹ kị ka wo ẹnyị-ehe nyaa ka, ẹpwa inwuro-nwuro ịlẹ kị kpa okpoko ochikiriju nwụ ka rụ ila ta ayịreji wuu.

³⁵Ang odudu ri ị kaa me obyi nya ang onyobyi, kụ ụwa hwoo họ ịnyịlẹhị. ọkịlẹtụ nyaa myị̀ lọnọọkịla kpọrịkọọ.”