Read idege IJobu 16 Bible Online

IJobu 16 - idege bible

IJobu 16

¹Ọọwa, iJobu à ya ẹla myịmyị yẹkẹẹ,

²“M wo ẹla ị-kpa kpụ ọngịnyị ẹjẹ ịlịịwẹ kpá nwẹhị lẹ, angị gu ọngịnyị ogbo nya oturukpo ānụ ri lawụlẹ-awụlẹ wuu lẹ.

³Á ka kpụba la ẹla oyaya kaka-á? Ịnyam ri ọ-wọọnụ pilẹ, ahụ-ụ́ tị ya ẹla go kaka.

⁴Á ji iwe-ahụrụ nyam, kam ji ịnyang ịnọ m̀ dọmwụ ka ya ẹla ụma ọlala ịnyang. M̀ ka kpa omyi-ẹla ịnyịịla ịlala ịnyang, juwa chị egbeju kile-kile ịnyịnyị.

⁵Ọhụ ojuju nyam tị ka ya ọngịrị hang, ẹla ọlọnụ nyam ka kpụng ẹjẹ.

⁶“Ḿ ya ẹla ya, ọjụjụ gom hwóò ka, ḿ yọnụ bawụlẹ ba, ọ rịrịm am̀ kịrẹkpẹ.

⁷Ohe Oluhye ee, à num ọngịrị nyam wuu gbanggbang lẹ, à họ ugbiyegu nyam kpụ egwawụ-egwawụ lẹ.

⁸À họ m̄ kpụ egba-egba hi ekpinegu-ekpinegu kwoncho lẹ, anyabalịwụ hu ọọwa nya ang ibeenu nyori am nyị ri ọlọhọbịrị.

⁹“Ohe Oluhye hụlam hwẹẹhwẹẹ ẹ-ẹpwụ nya agbama nyamwụ, chị egbinụ-angịrị gogoogo jahị dam, ọwa oluji nyam kpa ẹhị ọnyọọngịrị yẹm.

¹⁰Angịnyị pyẹ ọnụ da kpokoo juwa yẹm, ị wam abwọ abaa juwa hu ẹpẹpẹ jum, ị họ kitim juwa bába jum.

¹¹Ohe Oluhye hum ju angịnyị inyibyi ụ-ụbwọ, ọ pẹhim ha alọkwọ.

¹²Ang wuu há ham ẹnẹhẹ lẹ, ọ tị wẹ kaka họm jígi-jìgi, ọ jum achụ-imyi dum abwọ yịgẹ-yịgẹ, ọ hu ịcha nyamwụ mem myị̀myịịmyị,

¹³daa chịm bwu ịkịka ọnyị myị ọnyị, bwurm ẹpwụ hurum-m, ebwu nyam yẹ gu e-eji bwọọọ, ọ́ tị jujwo nyam kpong-kpong ka.

¹⁴Ọ gbà mịlam bawụlẹ-bawụlẹ, yahị dam myị̀myịịmyị lala ọngọdẹwụ.

¹⁵“M̀ gá awụrụ nya owuru kụrụ, ya ịlọm hụhụ ẹ-ẹpwụ nya ekuruwa pwururu.

¹⁶M̀ jida lahị nyam wọ ọmẹ pẹẹẹ, ahị nyam mịrị kpukpuru lukpowu chịm.

¹⁷Ḿ tị họ ọngọhẹ ẹlẹhẹ nya abwẹga ka, Ohe Oluhye m̄m̀ raabwọ ha lọkịlẹtụ nyam wuu lẹ.

¹⁸“Ọpyị ee, ā yem mile tụ ọnụ pịrịm koo, aa ba kị wo eko nya ọkpẹẹkpẹẹ ọlala ọlẹ kam wẹẹ chị.

¹⁹Ọ la ịịwẹ la lẹ, olibeenu nyam juwa e-epwoohe, ọngọ ka chẹkpẹ jum ji uhye-ọgba.

²⁰Aligu nyam kpam họ, m̀ jida gbokiri ju Ohe Oluhye.

²¹Ang pyii ká ọngọhẹ ka kele kaka bịlẹ Ohe Oluhye wọnụ nyam ju, jaabwọ ká ọngịnyị bịlẹ wọnụ nya oligu nyamwụ ju.

²²“Ẹka ịmanyị-imanyị à tị́ hi-ì wẹ kam ka hu ang ẹdịyẹ nya ẹga kị jẹ-ẹ̀ nyà bwu kaka lẹ.