Read idege IJobu 17 Bible Online

IJobu 17 - idege bible

IJobu 17

¹Olegu kpụm enyi, ụka nya igu nyam ji ọnaabwọ lẹ, iworu pyẹ ọnụ da gbem lẹ.

²Angị kpa angịnyị họ dagaga jum, ị wẹẹ kpam họ jaabwọ kọ háa, m̀ wẹẹ mwụrụ yaa chịng-ng ẹ-ẹpwụ nya olujwo ọ-tọm tọ.

³“Ohe Oluhye ee, ahụ lịlọng à ka godayị ham lẹ, ọngọkịla oyina-à tị́ ji ka godayị yubwọ nyam wẹ-ẹ̀?

⁴Ahụ-ahụ ká du ká aligu nyam-ḿ myị wo ẹla nyam ka, ahụ à tị̀tị̀ ka họ ị ka kụrụm ka lẹ.

⁵Ọngọngọhẹ kọ pwa aligu nyamwụ rwarụ ajị nya okpoko ọ-ka yeye aalẹ, anjwo nya ọngọọwa ā kpụ idu chwiichwii.

⁶“Ohe Oluhye họ m̄ ri ịhwẹ ọlọnụ nya angịnyị lẹ, ị́ warị, ị họ pwuu hụm a-ahị.

⁷M̀ jida ọọ-la ọjụjụ la ahị nyam tuku wuu, ụrụrụ nyam à hi kwẹẹ lẹlẹ.

⁸Alabwẹla ọnyịịla yẹm lẹ, ọ pyaa ọnụ, angị da ẹlẹlẹhẹ ka ju agbama ta angị jẹ Ohe-ka.

⁹Angịnyị ịnyịịla juwa họ ang ọnyịịla kịlahị-ịlahị, angị la charị-charị juwa la ọngịrị gụ olene-ene.

¹⁰“Anụ aligu nyam tị lẹ, anụ mwẹẹkpẹ kanụ ma ịlọnụ yẹ mẹ-ẹ̀, ḿ tị ka ye ọngọ jẹ ọhẹ bwu ẹpwụ nyanụ ka.

¹¹Ịnyam am jam ka cheju lẹ, ang ịlẹ kam me obyi nyọka họ wuu ri ododu, irya ọlọkịlẹtụ tà kpini-kpini.

¹²Aligu nyam hum olegu hwaa byim odu nyị ka ri ahị ọpyẹpyẹ, ahịgboo nyị wẹẹ wẹ lẹ, m̀ tị jam ẹ-ẹpwụ nya ukpowu.

¹³Ejegu à ri ẹga kam ya ẹhị rịrị ka lẹ, ụ-ụwa m̄ ka ya ọba da nune ẹ-ẹpwụ nya ukpowu lẹ.

¹⁴Iworu à ka ri adam ri wẹ lẹlẹ. Ekpunjuju ịlụwa m̄ ka wụrụ ịnam bala anyịnam anyang lẹ.

¹⁵Ẹhị ọrịrịị-rịrị ọhẹ-ẹ́ ji ham kaka, ị tị́ ka ye ọọwa bwu ale?

¹⁶Ẹhị ọrịrịị-rịrị ka bam ka iworu-ūú? ọ ka kele kaka mwụ ịnyọ tam ẹ-ẹpwụ nya ịpyị-ị́?”