Read idege IJobu 18 Bible Online

IJobu 18 - idege bible

IJobu 18

¹Ụka ọọwa, iBilidadị ọla iChuwa à wẹ iJobu yẹkẹẹ,

²“Ọ tị́ ka tata ba ányị ene ká ka ya ẹla nyang cheju-ù? á kpụba wẹẹ ịnọ, ahị tị́ tị̀tị̀ ka ya ẹla ịnyịnyị lẹ.

³Ahị meng ịmwụ-ụ́? Ahị ri alẹjị a-ahị nyang-ńg?

⁴Ahụ-ahụ à wẹẹ kpa ịlọng ẹkpa reji la agbama ojuju lẹ. Angịnyị ā rụ hi odehe ọọ-la agbama nyang mẹ-ẹ̄ẹ́? Lee ịgbọdọ ā tị́ gu cheji chajị kọ wung ẹpwụ me?

⁵“Ẹhẹẹ, ahịgboo nya angị họ ang onyobyi myị̀ dẹyị-dẹyị lẹ, ila nyaa-á ka jẹ-ẹ̀ wuru myị́ ẹnẹnẹhẹ kaka.

⁶Ahịgboo ọlẹpwang nyaa ka yẹ ri ukpowu, otinika ọlọkụkụ nyaa mịrị pwẹ̀m.

⁷Ịmịla ọlala ẹ-ẹpẹtẹ nyaa pwuru dẹwụ-dẹwụ, obyi omeme nya ịlaa ị kpa wu ịlaa eri lẹ.

⁸Ị jẹ kaka ju ka ẹpwụ nya ụgbọwụ, ụgbọwụ waa a-atiye-atiye kem.

⁹Ụnya waa i-ichẹtẹ kị̀rẹm-m, kpaa ụ-ụwa gogoogo.

¹⁰Ị da ori nọ gbaa, ị da ụnya ụ-ụgbẹyị nyaa.

¹¹Ang iluhi-uhi chị uhi jwaa oyiye-oyiye, juwa chị ụnyẹ jwaa ọpẹ-ọpẹ.

¹²Imyi ọnwụnwụ naa ọngịrị gbanggbang, akama kụ ọlọyị gbaa.

¹³Ẹdụrụ onyobyi ta wuuịnyịrọ nyaa ayịreji, maa abwọ bala ata ri kiri-kiri.

¹⁴Ị wulaa eji rụ bwu ẹpwa ẹga kị kụ lokpunyi ene-ene, gbilaa kpịla-kpịla kaka gbu igu olejiri-ejiri.

¹⁵Ọng myị ọng ka ye ẹpwa nyaa kụ myị, ụka kị ya ịsọlụfọ nyi hụ ẹpwang ọọwa nyọka da ịlọ kpọọ ba kpá.

¹⁶Ị godayị lala ekeji— atẹ nyaa gbu e-eji, abwọ nyaa nwọnwụ u-uhye.

¹⁷Ehe oruru nyaa myị gbanggbang ẹ-ẹga myị ẹga, ọngọngọhẹ-ẹ́ kpịtịya nyaa kaka.

¹⁸Ị ka kwaa hi odehe ọlẹ, bwu ahịgboo ju ka ẹpwụ nya ukpowu.

¹⁹Ị́ ma anyị ịhyẹ lee anyị ịtụma, nyọka la angị wo ẹnyị-ehe nyaa ọ-ọpyị nyaa ka.

²⁰Iwe-ahụrụ nya ọhịhị nyaa ọwẹ tà atịra, angị bwu ọmwẹnụ-ụtụrụ lalaala ka ju ka ọmwẹnụ-obyi wuu gbu oje-oje chajị nya ọọwa.

²¹Ịịwẹ iwe-ahụrụ nya alabwela onyobyi, ịwa angị jẹ Ohe Oluhye ka à kaa la lẹ.”