Read idege IJobu 19 Bible Online

IJobu 19 - idege bible

IJobu 19

¹Ụka ọọwa, iJobu à wẹ ẹla yẹkẹẹ,

²“Ánụ ka bà la o-hu akama ham bwula ọ-chịm ịcha la ẹla oyaya nyanụ kaka-á?

³Anụ mịlam do kịla ụka ohu kụrụ iwo lẹ. Ọ́ lanụ chọọ kpong-kong ka-á?

⁴Ó-riri kam họ abyị họ lẹẹ, oyina-à tị́ ri ẹla nyanụ-ụ̀?

⁵Anụ hu ịlọnụ nya oroohu-charịị, juwa hu akama nyam kụ ịlahị lala ang-ẹjẹẹ nya abyị ọlala nyam.

⁶Anụ-ụ̀ jẹ ọlẹ mẹ, Ohe Oluhye ọlẹ kọ da ụnya wum à hu abyị ọlẹ ham lẹ,

⁷Ịnọ, m dakọ gboo ya ‘Ị họm tu ọkịrọrọ lẹ-ẹ̄!’ ọngọngọhẹ-ẹ́ tị mịram ka. M̀ chị eko bịlẹ ụbwọ ọdada, ọngọngọhẹ-ẹ́ tị chị oku ham kaka.

⁸Ohe Oluhye chị ọ̀hwọọ̀ yẹm dada, kam ka ye ẹga chịpwụrụ kpoye ka. Ọ ya ukpowu ke ụgbẹyị ọchịpwụrụ bwu nyam.

⁹Ọ num ụdụ nyam wuu, tụ ihi ọlala ọlẹ ịnọ kọ ri okpo-adịrahụ nyam.

¹⁰Ọ hụlam hwẹẹhwẹẹ ịkịka ọnyị myị ọnyị wuu gbanggbang, hu ẹhị ọrịrịị-rịrị nyam latẹ-latẹ jaabwọ kịị hu okoji.

¹¹Ikẹjẹ-awụrụ nyamwụ wuru jahị dam, Ọ wam lala oluji onyobyi-obyi nyamwụ.

¹²Ọ du angịdẹwụ nyamwụ wẹ kị ka mwẹla tam, ị bá urwe yẹ ẹpwa nyam dada lẹ.

¹³“Ọ gu aanam wuu ahị gboo him, angị jẹm jẹ wuu ene-ene yẹm lala ọngga.

¹⁴Aanam wuu rụ hwẹẹẹ him, aligu nyam wuu nyẹẹkpẹ dam.

¹⁵Angị ju ụga ju ẹ-ẹpwa nyam deeri nyam Anchẹ anyang nyam hum lala ọngga o-bwu odehe.

¹⁶M̀ be ẹkọ wụrụ ọnchẹ nyam, ọ́ myị chupwu dam ka. ḿ bịlọọ-bịlẹ, ọ ri ọlịnyị-ọlịnyị.

¹⁷Ịhụ ọ-chị pwuu nyam nyí ahụ nyam oru, anyịnam ịlẹ kahị bwu igbeene ookpokpo á tụ bam myị kaka.

¹⁸Anjwo ichiche hum pwụchẹẹ, ị chẹhị yẹm, ị hụlọ ahụ jum.

¹⁹Aligu nyam ị-jum chwẹẹ wuu cheji bam, angịnyị ịlẹ kị ri alikẹjẹ nyam jahị kpata tụm pyịpyị.

²⁰M̀ ri ugba-ugba bala ekpinegu-ekpinegu kem, M̀ ri ogu kụ lahị kpa ang ri.

²¹“Aligu nyam ee, anụ yẹm ahyẹẹrwẹrwa chẹẹ mẹ, Ohe Oluhye à kpụm ẹkpa beji lẹẹ lẹ!

²²Anyị tị́ du kanụ juwa tụm pyịpyị jaabwọ ká Ohe Oluhye wẹẹ họm-m̀? Ánụ bem ri nwa ịlọnụ lẹka-á?

²³“Ang pyii kị ka da ala nyam ịwẹ ju ụ-ụpwụ, kị ka daa ju ẹ-ẹgẹhẹ nyọka kpa kpịtịya!

²⁴Ịnọ, kị ka gu ịna nya ala ịwẹ ba ẹjwọ u-uhye lẹẹ ẹga kị ka jẹ-ẹ̀ yịlẹ ẹnẹnẹhẹ kaka.

²⁵M̀ jẹ ká ọngọgbamkpehe juwa hịhị, ụka ohyẹẹkpẹ, ọ ka warị wẹ odehe kọ ka chị eje ham.

²⁶Ẹdụrụ-ụ́ rim ịmwụrụkpẹ ri kpá, ọlẹ kam jam lọhịhị wẹẹ lẹ, m̀ ka yẹ Ohe Oluhye ẹ-ẹhị.

²⁷M̀ ka kpa ugbẹhị nya ịlọm yọọ, ọ́ ka ri ọngga a-ahị nyam kaka. “Ọkịlẹtụ chịm pyẹpyẹ nyọlẹ kanụ wẹẹ yẹkẹẹ,

²⁸‘Ahị tụ ila rịrọọ mẹ, ọwa-à ju ọmwụ nya akama ịwẹ ha ịlọmwụ lẹ.’

²⁹Anụ tị kpahị ju ịlọnụ ẹ-ẹga nya ẹma nya ẹwụ mẹ, ẹma nya ẹwụ ọlẹ kọ ka yẹ angịnyị akama chajị nya ịhọbịrị nyaa. Ọọwa, anụ ka jẹ-ẹ̀ jẹ ká ọngọleje juwa lẹ.”