Read idege IJobu 2 Bible Online

IJobu 2 - idege bible

IJobu 2

¹Ụka ọhẹ juwa ka alepwoohe wẹ kaka tụguru ẹ-ẹga nya Amkpaa. Ohe Onyobyi wẹ ẹpwụ nya ọjịra-jịra ọọwa ịnyịnyị.

²Ọọwa, Amkpaa-à tọọ wo yẹkẹẹ, “Ale ā bwubwu-u?” Ọọwa, Ohe Onyobyi a wẹ byoo yẹkẹẹ, “Ịịwẹ m wẹẹ ga kele warị tụ odehe-odehe da lẹ.”

³Ọọwa, Amkpaa a tọọ wo yẹkẹẹ, “IJobu ọnchẹ nyam ri ọngịnyị ọkpẹẹkpẹẹ, ọ-la abyị ka. Ọọ myị ẹrụ ham kpẹẹkpẹẹ. Ọngọngọhẹ-ẹ́ jam odehe kọ hiigu lala ọwa kaka. Ịnọ a dum ju nyọka yọọ akama tu ododu, ọ tị godayị kpọọ ham. Ahụ ayịdang yọọ pwụ ọlịịwẹ wẹẹ-ẹ́?”

⁴Ohe Onyobyi wẹ byi Amkpaa yẹkẹẹ, “Ẹhẹẹ, ang-ụdụ nya ọngịnyị à kaa ye egbeju-igu nyamwụ lẹ. Ọngịnyị ehe ka tụụbwọ hi ang myị ang kọ la nyọka chị ịlọmwụ da myị. A wahị kụrwọọ a tị́ du kọ wẹẹ myị ẹrụ hang ịnyị.

⁵Jwọọ ẹdụrụ yẹ mẹẹ. Ọ tị ka dong a-ahị nyang”

⁶Ọọwa, Amkpaa a byi Ohe Onyobyi yẹkẹẹ, “Ohiigu, iJobu tịị wẹ lẹ. Ọkẹnẹ-kẹnẹ ri a nwọọ kẹhị-kẹhị koo.”

⁷Ọọwa, Ohe Onyobyi a rụ bwu ẹga nya Amkpaa lẹ, ọ họ ká iJobu chị abẹ myị ịnyịrọ-ịnyịrọ lẹlẹ.

⁸IJobu kele ka hụhụ ẹ-ẹga nya agbụ lẹ, ọ juwa kpa une nya udiyo pwọ ịlọmwụ ị-ịnyịrọ lẹlẹ.

⁹Ọọwa, ahụ nyamwụ a byoo yẹkẹẹ, “A nụwa lirya ọkpẹẹkpẹẹ nyang ụ-ụwa wẹẹ? Do Ohe Oluhye mẹ, ká gbu mẹ.”

¹⁰IJobu wẹ byoo yẹkẹẹ, “A ya ẹla lala oluchi lụmẹ pyiiì! Aang ịnyịịla-ịnyịịla kem ahị ka ye myị bwu ẹga nya Ohe Oluhye ka. Ahị ka ye ịtịpyọ ịnyịnyị?” Ẹ-ẹpwụ nya akama nya iJobu wuu, ọ ya ẹla ọtịpyọ ba Ohe Oluhye ka.

¹¹Ụka ọọwa, aligu nya iJobu angị ịta wo oja nya akama nya iJobu. Ẹnyị nya aligu nyamwụ ịịwa ri Elifasị bwu epweji nya ịTẹman bala iBilidadị bwu epweji nya iChuwa and iSofa bwu epweji nya ịNaama. Ịwa angị ịwẹ myị ju awụlẹ lẹ, ị kele nyọka kpọọ ẹjẹ lẹlẹ.

¹²Ụka kị yẹ iJobu hwẹẹ lẹ, ị jọọ ogu yẹẹyẹẹ ka. Ị dọmwụ nyọka jẹ ida gboo lẹlẹ. Ị gu ịwụrụ nyaa ene, gu ịpyị chị egbeju ẹ-ẹpwụ nya ọjụjụ.

¹³Ụka ọọwa, aligu nya iJobu ịwẹ hụhụ tọọ ahị ọpyẹpyẹ irwiye bala odu irwiye la ọ-họ pyịm myị ka, chajị ị yẹ jaabwọ kọ juwa yẹ akama lụmẹ kaka ba.