Read idege IJobu 20 Bible Online

IJobu 20 - idege bible

IJobu 20

¹Ọọwa lẹ, iSofaa ọla ịNaama-à wẹ iJobu ẹla yẹkẹẹ,

²“Ẹla oyaya nyang bịrịm ọkịlẹtụ chị̀kẹ-chị̀kẹ, Ọ tam-m̀ ta kam-m̀ wẹng ẹla lẹ.

³M̀ wo alibyi oyaya nyang, ido ā dom-m̀ wẹ lẹ, m̀ tị jẹ jaabwọ kam ka wẹng.

⁴“Ahụ ayịdang á jẹ bwu orogo-orogo, bwu ụka-ụka ká Ohe Oluhye da angịnyị wẹ odehe ọlẹ nya o-ri

⁵ụka nya ụya ọyaya nya alabwẹla onyobyi la kpii, ọkẹkẹnị ọchịchị nya ọngọ jẹ Ohe-ka ba i-ijata kem ka-á?

⁶Ị ka nwa gbọnọ-gbọnọ ya ẹtẹ kịla ohe kpá myị, ị ka luhye gbee kị ka ya egbeju kịla egbamwụ myị,

⁷ị tị ka ta ayịreji gbanggbang lala ịma-à byi ọ-ọhọ. Angịlẹ kị jaa wuu ene-ene ka chabwigo juwa ya ‘alẹ angịlẹ à tị́ rụ ka wuu?’

⁸Ee, ị ka myị táaa lala ụlaa, jaabwọ ká ọyị ọ-yẹ a-arụrụ lepwodu kaa la. Ị́ ka jẹ-ẹ̀ yẹhị gwaa myịmyị kaka.

⁹Angị kpẹhị nya ịlaa yaa ene-ene á ka yaa kaka, alẹpwa nyaa-á ka yẹhị gwaa kaka.

¹⁰Anyị nyaa ka nwụ uri tịrẹkpẹ ang-ụdụ ịlẹ wuu ká adaa anyị nu alẹbyahị tu ịmịmẹ.

¹¹Ịnyịlẹhị lẹ, ri onjwo lịwọ jugu-jugu kpá ẹnẹhẹ lẹ, ọ ka chị ukpo gbu hi ịmịla ra-ata lẹ.

¹²“Ó-ri nyịlẹhị ang onyobyi ọhọhọ lọọ ịpyọ kpá lala ịma, ọ ka ya ẹlẹlẹ bọọ pyẹẹ beji myị.

¹³Ọ́ ka myị-ị̀ tụ ẹlẹlẹ hyoo ka myị, ọ ka kpọọ nụwa ẹ-ẹpwụ ọnụ myị.

¹⁴Ụka ká ang oriri ọwẹ-ẹ́ pwụ ẹpwụ kpá, ọ yẹ ri ujujwo haa, ọ ka laa ujujwo lala ẹhwa.

¹⁵Ọngịnyị onyobyi da ụdụ da mile wuu, ọ tị ka kọ́ọ̄ hụrụ myịmyị, Ohe Oluhye ka họ ẹpwụ ka gwaa tuu gbee kị ka kọ oneeji.

¹⁶Ọ́ọ nyẹ ẹhwa nya ilo nyẹnyẹ, ẹhwa nya ọgbịjị tị ka nwọọ.

¹⁷Ọ́ ka ri ehe tata kpụ ọ ka ri ida nya okoji nya olivu, enyi-ẹmẹ nya ẹna bala inwa ịlẹ kị ka mwụ lala enyi ka[11].

¹⁸Ụkụrwọ ịlẹ kọ họ wuu, ọ ka tụ hyaa wụlẹlẹ la ọ-kpa ka ọnụ ka, iwe-é ka da họọ ọọ ri apyobwuna nya ọhị ọdada nyamwụ kpong-kpong ka.

¹⁹Ang odudu ri ọ tụ ikpehika pyị eji, ọ nu angịnyị ẹ-ẹpwa ịlẹ ká angịnyị nwụ gbịlẹ-gbịlẹ ha ịlaa.

²⁰“Ịpyọnụ nyamwụ-ụ́ la ọbaba ka lẹ, ọ ka jẹ-ẹ̀ hi ịngịngịhyẹ nọ u-uhye gbe ịlọmwụ ka.

²¹Ó-ri ang gbee chẹja-chẹja la ịngịngịhyẹ hi ka, lẹẹlẹ, ụdụ nyamwụ-ụ́ ka jẹ-ẹ̀ gu ẹnẹbịla ka, a ka tata kaka.

²²Ụka kọ kpụ ụdụ chakụ-chakụ, akama ka pwụ eji chọọ ọgụ lọmwaa, uhila nya akama ka tọọ ayịreji.

²³Ọ ri ang wu ẹpwụ kpọngkpọng odu mẹ, Ohe Oluhye ka du akama chọọ ọgụ, agbama nya Ohe Oluhye ka do lala enyi wẹ uhye nyamwụ.

²⁴Ọ ka rụnyẹ hi ikonggo oloje-oje, ịcha ọlẹ kị hya ụ-ụdụwa tị ka chọọ, bwurwọọ kpoye.

²⁵Ị gba ịcha ọọwa bwu oye ọkịla nya ịnyịrọ nyamwụ, ẹhị nya ịcha kpehe lịwọ biletete, uhi ojuju chọọ ọhị nụwa kem.

²⁶Ukpowụ kụ ịnya gbe ang-ụdụ nyamwụ wuu, ila ọlẹ kị dudu ju ka, ka bene kam kaka rwọọ, tụ ang ihihi ịlẹpwụ nyamwụ wuu.

²⁷Epwoohe ka chị ang onyobyi ọhọhọ nyamwụ ehe, odehe ka gbe ẹla jwoo.

²⁸Enyi ka myị̀ kaka go ẹpwa nyamwụ, agbama nya Ohe Oluhye ka do chwọọchwọọ lala ukpenyi.

²⁹Ẹbyi ọlẹ kọ ka họ alọkwọ à wẹ lẹ, ọwa-à ri ang ọlẹ ká Ohe Oluhye gà haa kị ka la lẹ.”