Read idege IJobu 21 Bible Online

IJobu 21 - idege bible

IJobu 21

¹Ụka ọọwa iJobu a wẹ yẹkẹẹ,

²“Anụ ke ụrụ la ala nyam ịlẹ kam lẹẹ ka ya mẹ, ká ọlẹ a ri ẹjẹ-ọkpụkpụ ọlẹ ịnọ kọ chịla kanụ-ụ ka kpụm lẹ.

³Anụ-ụ̀ ju ugbodu kpọọ mẹ m juwa ka ya ẹla lẹẹ, ụka kam ya kpá, ọ ri kọ hanụ anụ ka juwa kịlahị la ọkpam họ bala ọhụlọ ahụ jum myị.

⁴“M jam kpa ẹla ta ọngịnyị ehe ọ linyi-egbeju ọhẹ-lọhẹ ka. Ịyẹ tị du kam ka ju ugbodu myị kam ka wụ ẹjẹ ka, ụka kam la ang ọkpọmwụ ọnyịịla ka jẹẹ ya.

⁵Anụ wo ẹla ọlẹ kam wẹẹ ka ya u-uhye nya ang ọlẹ kọ họm mẹ, anụ ka ku, ejiri ka wunu, anụ dọmwụ yụbwọ bọnụ.

⁶Ụka kam dọmwụ me irya nya akama nyam, jaabwọ kọ lụmẹ ka ba, uhi kaa jum lịnyịrọ nyam chewo kpakpaakpa.

⁷“Anyị a tị du ka Ohe Oluhye hi iwe da ha alabwẹla inyibyi kị juwa hịhị, ri ehe tata, chị okwirichi, yẹ ri angị ịtụka myịmyị kpụ-ụdụ?

⁸Alabwẹla inyibyi ịịwa ma anyị la anyị nyaa nwa taa ịkaa juwa kaa hụhụ dagaga jwaa, ịkaa ri ehe tata kpụ ịkaa kpa ugbẹhị nyaa yẹ anyị ịtụma nyaa ịlẹ kị nwa gbẹgbịlẹ wuu.

⁹Ẹpwa nyaa be hi ang ịla uhihi, ịla okpunyi ẹ-ẹpwa nyaa.

¹⁰Anyịrẹ ịkpa olo nyaa bala iyo ịlẹpwa ịkịla wuu kaa juwa jị ẹnyị ma anyị ụka myị ụka wuu, ịkaa pwaanyị ka.

¹¹Anjwo ichiche nyaa juwa ka kpehe la ogu ookpokpo tuu lala ịkpịlọ ka kọ ayịlọ, anjwo nyaa juwa kaa mwu eje juwa chewo.

¹²Anjwo ichiche nyaa go eba bala ang-abwọ ị kpa mwu eje ẹchẹ datị-datị juwa du, juwa mwu eje, juwa ya ụya leewo ọchịchị juwa chị ọkẹkẹnị.

¹³Angịnyị inyibyi ịwẹ bịrị ahị ọpyẹpyẹ ọnyị myị ju ụdụ ọkpụkpụ nyaa, gbee kị ka gbu rụ yẹtẹ yẹtẹ ka ejegu nyaa la okpunyi.

¹⁴“Kpọkpọọkpọ, ịwa tị ri angịlẹ kị wẹẹ byi Ohe Oluhye yẹkẹẹ, ‘Rụ kele hi ẹga nyahị. Ahị tịtọ nyọka jẹ ụgbẹyị nya ehile nyang ka.

¹⁵Oowo a tị ri Agụgụ ene, kahị ka gbịgba họọ? Apyoobwuna nya ịyẹ ahị tị ka ye ọ ri kahị raabwọ họọ kpong-kpong?’

¹⁶A tị́ yẹ mẹẹ, angịnyịà tị́kpụ-ụdụ lọngịrị nya ịlaa koo. Obyi omeme bala irya nya alabwẹla inyibyi ịwẹ la ụrụ hwẹẹẹ him.

¹⁷“Ụka ịmanyị à tị́ yẹ ká alabwẹla inyibyi chị ukpo gbu ịlẹ jwọrị lụka ọkpahị ju ka ẹnẹhẹ lẹ? A yẹ ká Ohe Oluhye yẹ alabwẹla inyibyi akama ẹpwụ nya agbama ojuju nyamwụ ẹnẹnẹhẹ jẹ lẹẹ? E-ehe.

¹⁸Ụka ịmanyị anụ tị yẹ ká ịgbachịwụ ọtụka bala ụbọchịrị go alabwẹla inyibyi ị-ịwẹ kpa rụ lala ewoo nya ekeji nya ambakpa bala ewoo nya ekeji nya irayịchị ịlẹ kị chị kpá ẹnẹhẹ lẹ? Ọlịnyị a ji kpong-kpong jẹ ka.

¹⁹“Anụ myị yẹkẹẹ, ‘Ohe Oluhye nyị tụbwọ hi uri nya ang inyibyi nya adịda anyị ju ịtọ nọ gbaahị gbe-ahị nya anyị nyaa ká anyị a ka yẹ akama nya adaa da-chichi? E-ehe.’ Ohe Oluhye a tụtụ yẹ adịda anyị angịlẹ kị họ ang onyobyi a yẹ akama lịlaa, chajị kị jẹ nyị yẹ akama ọ-ọla ịhọbịrị nyaa.

²⁰Lẹ ká Ohe Oluhye Agụgụ a yẹ okilo nya enyi nya agbama nyamwụ haa nwa lịlaa chajị kị jẹ mẹ.

²¹Ụka ká ọngịnyị á gbu kpá lẹ, ọ lọngịrị jẹẹ me irya chajị nya okpunyi nya anjwo nyamwụ wẹẹ-ẹ? E-ehe. Ụka ká ẹnụtụrụ bala ọya nyamwụ á chọnụ kpá lẹ ọọwa á chịkpẹẹ kaka.

²²“Ọngịnyị ehe ọhẹ-lọhẹ a jam kọ lụmẹ-ụmẹ kpụ ọ ka lọngịrị mẹla jẹ Ohe Oluhye myị kaka, Yẹ wẹẹ, kọ ọwa ụbwọọmwụ akaa la eje nya angịlẹ kị juwa epwoohe.

²³Angị ịhyẹ juwa ká ịnyịrọ nyaa la gogo kpa be hi ang ịluhihi ịnyị myị ịnyị wuu gbee kị gbu dụmwọ ẹpwụ nya okpunyi.

²⁴Ọ ye ang oriri ọlahịchịng kaa ri lịnyịrọ nyamwụ hwo chị ugba chị kpọngkpọng, ịnyịrọ nyamwụ ju eyo, ahụ-iyo ọlẹpwụ nya ukpunogu kpụ-enyi jugba-jugba ụka wuu.

²⁵Angị ịkịla tị juwa kị chị ọkẹkẹnị kpá ẹnẹnẹhẹ lẹka, ịhịhị la ọkịlẹtụ onyuujujwo tị gbu ẹpwụ nya ọkịlẹtụ onyuujujwo ịnyịnyị.

²⁶Angịnyị ebwo ịmyịmyiiye ịwẹ á gbu ịkaa jwaa eji ẹpwụ nya ọpyị ookpokpo, ụmụma nya punju-ju ookpokpo a tị kaa ryaa lẹ.

²⁷“Anụ yẹ mẹẹ, m jẹ irya nyanụ wuu lẹẹ, obyi omeme nyamwụ ri ọ họm ang onyobyi.

²⁸Chajị anụ tịtọ wo yẹkẹẹ, ‘Ale ẹpwa nya olegbeju onyobyi ọwẹ a tị ji-i?’

²⁹Anụ kaa tọ angịlẹ kị tụ-aaha kpehe ka epwoja ịkịla kaa? Ala iya dodehe lee ija ịlẹ kị kaa nya ka janụ lẹ, anụ tụmwụ myị laa ka-a?

³⁰Ó-ri anụ jẹ kpọngkpong wẹẹ ká Ohe Oluhye tọchị go alabwẹla inyibyi guru gbe ẹnụtụrụ nya ayịreji ka-a?

³¹Oowo-à tị chị-ẹje kpá bwuru ọhọbịrị bala abwẹla ọhọ tịpyọ nya alabwẹla onyobyi ya joo a-ahị nyamwụ myị-ị? Oowo à tị́ nwọọ uri nya ang ịtịpyọ ịlẹ wuu kọ kaa họ tịrẹkpẹ họọ?

³²Kpọkpọọkpọ ị tị ka kpọọ ka ju ka ẹpwụ nya iworu ọlẹ kị gbe eji ụ-ụwa.

³³Ụka kị jwoo eji iworu kpá, ọrụ ọpyị ọ chịrị-chịrị mwụ-ẹkpẹ kpọọ ịpyọ. jaabwọ ká angịnyị ehe la kpá wuu ịtị go kpọọ chị, á ka jẹẹ wa iru nya ụnọ nya angịnyị ịlẹ kị ji ẹkpẹ nyamwụ bala ọ rụ ji ịlahị nyamwụ juwa gbe iworu nyamwụ kpa myị kaka.

³⁴“Anyị anụ tị ka họ kanụ ka jẹẹ kụm ẹjẹ myị la ala ịlọnụ iyaya ihi deji ịwẹ! Ala ịlẹ kanụ wẹm wẹ wuu rị ịnịịkịla omeme gbang-gbang!”