Read idege IJobu 22 Bible Online

IJobu 22 - idege bible

IJobu 22

¹Ụka kọọwa Elifajị ọla Tẹmam a wẹ yẹkẹẹ,

²“A ya ká ọngịnyị ehe ọhẹ ka jẹẹ họ ịngịhyẹ ọlẹ kọ ka ju apyobwuna ha Ohe Oluhye myịị? Ọngọlẹ kọ dọmwụ jẹ ẹla kpá ha ka gbeng, ẹla ọjẹjẹ nyamwụ ọọwa ju apyobwuna ha ịlọmwụ kem.

³A me ká Ohe Oluhye Agụgụ la apyobwuna bwu ẹpwụ nya ọlabwẹla ọnyịịla oriri nyang lee ọ họ hiigu nyang, kị ye ụgbẹyị ọhẹ ka kpụng abyị ka, tị họ kọ ye apyobwuna?

⁴“A me ká Ohe Oluhye lang eje bala ọ-yẹng akama chajị nya uhi nyamwụ ká ju bala ọ ri ọnchẹ nyamwụ ọ chịla ọ hu ọkịlẹtụ ha ká ri a du?

⁵Á jẹ ká ang onyobyi ọhọhọ nyang a lụmẹ a du ka-a? Ọhọbịrị nyang a la ọbaba lee ọ chụ me ka.

⁶Chajị a pwọ anyịnang alẹng ang ịkuru-kuru hi ịnyịrọ nyaa ji lọhị lọhị.

⁷Angịlẹ kị imyịẹnyi nwụ kpá lịnyịrọ chaa pyẹpyẹ á myị chị enyi haa nwa ka, a myịmyị wu ang oriri kpa hi ang ịlẹ kị imyi nwụ.

⁸Ị wẹẹ ọdada aji ka, a kpa ọngịrị nya iwe ahụrụ nyang họ ká ya angị ịtụka ịlẹ kị baba lụmẹ la ang myị ang ịlẹ kị tịtọ, ahị iwe da ha alụdụ nọ ẹpwa ẹga myị ẹga ịlẹ kọ haa.

⁹A ku ịhụ egu hi rụ la abwabwọ hi ịlọng, a jẹ hyuu ẹpwụ nya ang onyobyi kpá kpụ a tụ anyị egu pyị-eji niaa ang lagbụrụ.

¹⁰Aajị nya ịlẹ wuu a du ká juwa ẹ-ẹga ọlahịhi lẹ, ọọwa a juwa ẹpwụ nya akama wẹ lẹlẹ.

¹¹Ahịgboo nyang wuu yẹ ri ukpowu dagaga jung lẹ, a jẹ yẹ oyị yẹyẹ kaka. Ukpeenyi ọtụka-ọtụka myị biring wuu lẹ.

¹²“Ohe Oluhye lịlọmwụ a kụ ẹpwa ụ-ụwa ẹ-ẹpwoohe ọlẹ kọ la uhye gụ ang wu kaa? Tị yẹ mẹ-ẹ, ọ tị juwa chẹhị kpẹẹ wẹ eji ka ye ịdịchụ jaabwọ myị abwọ kị juwa ẹga ọ luhye ụ-ụwa e-egbamwụ kpá ka ba wẹẹ.

¹³Chajị nya ọọwa du lẹ ká byi ịlọng yẹkẹẹ, ‘Ohe Oluhye ji ẹga ọ lụrụ lụmẹ ọ tị ka họ anyị kọ ka ka jẹ ang ọlẹ kam jam họ myị mẹ? Ọ ka lọngịrị jẹẹ yọyị bwuru ukpowu ọ chị ụka ọkpọrị-kpọrị nya egbamwụ ịwẹ bwuru ka la angịnyị eje myịị?’

¹⁴Egbamwụ ịchị-ụka kpori-kpori ịwẹ ọ ka jẹẹ yọyị kpoye nyaa myị ka, ọyị ọyẹyẹ nyamwụ mela epwoohe ẹga kọ juwa ga jẹdịyẹ wụlayẹ kịlẹlẹ kem.

¹⁵“A tịtọ ká ka hịhị dịrẹ ọgụ ẹpẹtẹ onyogo ọlẹ ká angịnyị inyibyi chịpwụrụ bwu-ú?

¹⁶Ene ká ụka nyaa ka pwụ kpá, ị gbu kpaarịị ta ayịreji hụrụ.

¹⁷Ị lẹẹ byi Ohe Oluhye yẹkẹẹ, ‘Ba hiihi chịng pyííì! Ịyẹ Agụgụ à tị ka jụ họhị-ị họ myị-ị̀?’

¹⁸Ohe Oluhye à tị họ ị pyẹpyọ́ọọ lẹ. Am ka wawii hi irya onyobyi omeme nya angịnyị inyibyi ịlịwẹ.

¹⁹“Ụka ká alabwẹla ọnyịịla-á yẹ ayịreji ọtata nyaa, ịị chị ọkẹkẹnị, angị jẹ ang onyobyi ọhẹ-lọhẹ ka kaa hụlọ ẹhụ jwaa.

²⁰Alabwẹla ịnyịịla yẹkẹẹ, ‘Ẹhẹẹ, aluji nyahị ta ayịreji lẹ, ila ta ang ịlala nyaa ayịreju hụrụ ịnyịnyị lẹ.’

²¹“IJobu ee, họ ọkpunyi bala Ohe Oluhye, ká kpụba la o-hwoo lala oluji nyang mẹ, ụgbẹyị ang à ka há hang myị lẹlẹ.

²²A chuchu mẹ m raabwọ hang ká ke ụrụ la ehile bala ang ọ mẹjẹ nyamwụ ká kpa ẹla nyamwụ ẹ-ẹpwụ ọkịlẹtụ nyang mẹ.

²³O-ri ká nya tịrẹkpẹ chị Agụgụ ọgụ ká kpa ịlọng ka eji dụmwọọ ka mwụ abwẹla ọtịpyọ nyang wuu rụ hwẹẹẹ hi ẹpwa nyang,

²⁴Aalẹ a ka wa okpoko-ịgọm lala ọrụ ịpyị, bala okpoko-ịgọm nya ọfị lala egbanjwọ ịlẹpwụ ogo.

²⁵Myị ká Ohe Oluhye Agụgụ a tụtụ ri okpoko-ịgọm bala okpoko-onyoowuru ọlẹ kọ kpụ-ịnya lụmẹ mẹ.

²⁶Ụka ọọwa lẹ aalẹ Ohe Agụgụ ụbwọọmwụ a ka ri ọkẹkẹnị nyang lẹ, a ka lọngịrị hu ẹhị nyang hwa-a ka uhye yẹ ẹhị rị-rọọ kpakpaakpa myị lẹlẹ.

²⁷Ó-ri kọ lịnyị lẹ, ụka myị ụka ká raabwọ họọ ọ ka wo lang, ọọwa lẹ a ka họ ọnụ ọmyịmyị nyang jịra ahaahị lụka ọlẹ kọ pwọ ku lẹlẹ.

²⁸Ang myị ang ká chị eje ká ka họhọ, aalẹ ang ọọwa ka kịlahị hiigu hang, ụgbẹyị nyang ọnyị myị ọnyị ká a ka chịpwụrụ bwu ka myị

²⁹Ó-ri ká byi angịlẹ kị tụpyị-eji yẹkẹẹ, ‘Anụ wuleji’ ụka ọọwa Ohe ka chị ọngọọwa da lẹ.

³⁰Ọ ka chị angịlẹ kị dọmwụ họbirị da, angị ịwa gba kpehe bwula abwọ nyang ọla cheri-cheri.”