Read idege IJobu 23 Bible Online

IJobu 23 - idege bible

IJobu 23

¹Ụka ọọwa wẹ ẹla lẹ, ọ yẹkẹẹ,

²“Dọmwụ kpá gbee daalẹ ọlẹẹ ri ọlẹ wẹẹ, ala ịmwọ ya nyam bala eru ọchịchị nyam ri ujujwo bala egbeju-ọngịrị tụ Ohe Oluhye pyịpyị, chajị ọ yẹm akama kpoye nya ang onyobyi nyam ọlẹ kam họ Ọlẹ kpá kam dọmwụ chị eru chị jwọọ lẹ ọ ryoo ẹlẹlẹhẹ ka.

³O, ọtọm olujwo lụmẹ, Óo! hajị nyọlẹ kam jẹ ẹga kam ka yọọ ka, Ó-ri kam jẹ ẹga kọ kaa hụhụ leje ịnọ m ka kele ka ẹga nyamwụ.

⁴M ka hị eje nyam da ị-ịlahị nyam, ịnọ ọnyị nyam ka mịla ịwẹẹ ọdada tọọ.

⁵Ịnọ m ka jẹ ẹla ọlẹ kọ ka wẹm, ịnọ m ka wo etu nya ẹla ọlẹ kọ ka ya tam.

⁶Ọka myịị lam eje jaabwọ ká ọngịrị nyamwụ lụmẹ ka ba-a? E-ehe, ọkọkọ ọ ka tụtụ ke ụrụ lam.

⁷M jẹ́ myịmyị Ohe Oluhye ayịdang ri ọngọ leje nyam, ọ ka yẹ eje rụm ụka ookpokpo ọwẹ pyii lẹ. Ọ ka byim yẹkẹẹ, rụ kele nyang chọọ, a họ ang onyobyi ọhẹ-lọhẹ kpong-kpong ka.

⁸“Yẹ mẹ, m pịlahị nyamwụ ka ọmwụ-ẹnụ ụtụrụ, ma ọ juwa m yẹ ka, m pyịlahị nyamwụ ka ọmwụ ẹnụ obyi, m yọọ ụ-ụwa ka.

⁹Oye ụpụpịla ẹga kọọ họ ụkụrwọ tụ upwuriri m yọọ ka. M ji kpata koye ẹtẹ bala oye edii, yọọ ụ-ụwa ka ịnyịnyị.

¹⁰Ma kpọkpọokpọ ọ tị jẹ okele warị nyam wuu, jẹ ọgụ ẹpẹtẹ ọnyị myị ọnyị ọlẹ kam hu ma ụka kọ mam yẹ, kpá m ka la cheri-cheri, ya gbonggbong lala okpoko ịgọm.

¹¹M jam hu ẹpẹtẹ nyam kpa jẹdịyẹ ụ-ụgbẹyị nya Ohe Oluhye ọlẹ kọ ọwa ayịdang mẹjẹm, ọpyị gile koye upwuriri lee oye ụpụpịla ka.

¹²M tịrị-ẹkpẹhi ehile ọlugbọnụ nyamwụ ẹnẹnẹhẹ lẹka, M wu ẹla ọlọnụ bajẹ nya ụdụ ọkpụkpụ nyam.

¹³“Ma, ọwa a jẹ kaa yẹda myị kaka, lẹ o-owo a tị ka joo kpata myị mẹ? Ang myị ang kọ họọ, ọwa ọ kaa họ lẹ, oowo a tị ka kwoo iwe myị?

¹⁴Chajị obyi ọlẹ kọ me uhye nya nyam lẹ ọ ka họọ jịra pyii lẹ, obyi omeme ookpokpo ọhẹ ẹpwụ nya iru nya ịlẹ kọ la chajị nyam.

¹⁵Chajị nya ọọwa mjuhi ị-ịlahị nyamwụ.

¹⁶Ohe Oluhye a họ ká ọkịlẹtụ chịm pyepye lẹ, Agụgụ a hu uhi jum lẹ, Ọ họ kam da ẹpwụ hụ amẹ.

¹⁷Chajị ukpowu dagaga jum, ukpowu ọtụka mịlam a-ahị kpịlẹẹ.”