Read idege IJobu 24 Bible Online

IJobu 24 - idege bible

IJobu 24

¹“Ọlẹ ká Ohe Agụgụ ọlẹ kọ la ọngịrị gụ ang wuu, ọngọ ọlẹ kọ ọwa kaa cheje nya ang myị ang ọlẹ kọ họ, anyị a tị du kọ hu ẹnụtụrụ ọhẹ nọ nyọka la alabwẹla inyibyi eje ka-a? Ká angịlẹ kị jọọ kaa mwẹẹkpẹẹ godayị gboo odoodu-u?

²Angịnyị inyibyi ịhyẹ kaa hu ẹjwọ lẹẹ okoje ọlẹ kị ya wu eji ọ-oyi nya ọpyị ọlẹ kọ ri ọ ju ọbaba ẹjẹẹ da bwuru chajị kị ka la ọpyị gụ. Ị kaa myịmyị wu ịkpịlọ nya aanaa yi oyi kpa ka ju ka ẹpwụ iru nya ịnyaa.

³Ị wu anyịrẹ nya anyị ẹgụ kpa rụ ịkaa wu ịna nya ịhụ gu kpa ka nwụ ịlaa uri ịlẹ kị kpaa.

⁴Ịgu okpehika gbaa hi ụgbẹyị, kpaa ụbwọ taa ka ọka hi ang nya ịlaa, ịlẹ kị pwọku kị ka la, lẹ ikpehika ịịwa a mwẹẹkpẹ rụ ụnyẹ ka kpịbaa hi ang nya ịlaa lẹlẹ.

⁵Ọọwa lẹ ikpehika ịịwa a mwẹẹkpẹ yẹ ka lala anyịrẹ ịnyịịngịrị lẹ, ị rụ ka chụwa u-ugbileji juwa tịtọ nya ang oriri ha ịlaa bala anyị nyaa lẹlẹ.

⁶Ọọwa gbile ikpehika ịịwa ka họ ká odu kị juwa kaa kele ka ẹrụ nya ala ụdụ ka mwụ ambakpa nyaa bala angịkịla.

⁷Ang ịkụrụ-kụrụ kwaa amwụ kpụ kpuu ịrụ ka ube ka nọ une ji lọhị-lọhị, la oye ịngịngịhyẹ ke ịlaa hi ohu kpong-kpong ka.

⁸Ịnyịrọ nyaa kpụ chwẹẹchwẹẹ lenyi ọdodo i-inyiri dẹyị-dẹyị iluuhye nya ịgbọdọ, lohu haa gbee kị wu ajwọ ju ẹjẹ, chajị ka ịnyịrọ nyaa ka chị ila bwobwo chẹẹ. Chajị nyọlẹ kị ye kẹga ọ ka hiri egbeju kpẹẹ kaka.

⁹Angịnyị ịtụka inyibyi ịwẹ kaa kele ka gba ẹmẹ hi anyị nya ikpehika ịịwa ọ-ọnụ kpaa rụ ka ri anyịhị, ọọwa ri ọ ka nwụ ilaa uri ku-iwa nya uri ọlẹ ka ikpehika kpaa.

¹⁰Ọọwa lẹ ikpehika nya angịnyị ịwẹ a juwa ga tụ ẹga myị ẹga ji lọhị-lọhị la oye ang kụrụ kaka lẹlẹ. Ị juwa ga kele warị limyi-limyi la ọ kpa nya ang iriri ịlẹ kị hya bwu ẹrụ rụ ụ-ụwa ụ-ụbwọ kpa chụchụụ.

¹¹Ikpehika ịwẹ kaa hwo ida nya olivu, ịị họ alakọnụ ere, ị tị hụ limyi-enyi lụkpụrọkọ chaa ọhụ kịrẹ-kịrẹ.

¹²Bwu ẹpwụ nya epweji angịlẹ kị juwa gbu juwa juwa chị eru angịlẹ kị chị ẹbẹ ẹ-ẹpwụ nya ugbodu-okpukpuru juwa cheko tịtọ nya ụbwọ ọdada, ma Ohe Oluhye a tị myị ke ụrụ la abwọ ọrịrị nyaa ka.

¹³“Angịnyị inyibyi kaa pwa ahịgboo, ị́ jẹ ụgbẹyị nyamwụ nyamwụ ka, ịị ba ahịgboo ọọwa jẹ dịrẹ ụgbẹyị ọlẹ kọ juwa kpaa bwu ka.

¹⁴Ọngọ nwụ angịnyị kaa wuleji lewu-ụtụrụ, kọ ka nwụ alẹbyahị bala angị la ọbaba, alodu, ọ hu ang jẹdịyẹ nya oyi oyiyi.

¹⁵Ọlụya godayị gbe ewu-obyi, ọ ya ang ke ịlọmwụ a-ahị, juwa me irya ọngọngọhẹ nyị́ ka jẹ-ẹ̀ yọọ ka.

¹⁶Alodu aleyi be ang ene kaka yoyi, ahị pyẹ, ị tụ ịlaa kpịbaa, ị́ tịtọ nya ahịgboo ka.

¹⁷Ukpowu okpemkpem laa lala ahị ọpyẹpyẹ, ịwa bala ang iluhi-uhi nya odu ri okirikem nya awụlẹ.

¹⁸“Ọhịhị nya angịnyị inyibyi ịlịịnya lala awụụ nya ụcha ọlẹ kọ kaa go rịrị uhye nya ugbenyi. Ahyaahị lọmwaaa, ọhụụ nya ẹnyị a kaa mwọọ kpa rụ lẹlẹ. Ohe Oluhye gọlọ da ekpeleji nya ebwo nya ọpyị nyaa kpá ene-ene lẹ, ọngọngọhẹ á ka myị tụ ju ẹrụ nyaa chwẹẹ ka họ ụkụrwọ ẹ-ẹpwụ nya ẹrụ nyaa kaka.

¹⁹Jaabwọ ká ọchịpwuu kaa wulo ekpawẹ iwule-wule hụrụ, ịnyịnyị iworu à kaa ye angịnyị inyibyi mile lẹ.

²⁰Ẹla lụmẹ kpuu ịnamwụ ri ịnamwụ kọ hya chii mọọ-ọ́ dọmwụ kpịtịya nyamwụ kaka. Ekpunjuju ya ang nyaa ri kịrẹm, angịnyị inyibyi tụrụ hụrụ lala okoji.

²¹Ang odudu kọ lịnyị ri, angịnyị inyibyi ịịwa kaa tụ anyang ịtụma pyị-eji lee haa ri bala ịmyịmyị kaa họ ang ọnyịịla ha ịhụ ogu ka.

²²Kpọkpọọkpọ, Ohe Oluhye lọngịrị ka ta angị ịtụka ayịreji myị, Ọọwa ụka ká Ohe á hu ụbwọ nyamwụ hwaa ka uhye lẹ, ọhịhị nya ọngịnyị onyobyi ọlịnyị a kaa myị lẹlẹ.

²³Ọlẹ ká Ohe Oluhye hi iwe da haa lẹ, ịkaa da ịlaa lugbaa me kị be hi ang ịlahịhi wuu bala ọla okpunyi lẹ, tụụbwọ ka aalẹ, Ohe juwa kpa ẹhị rịraa jaabwọ kị juwa hu ẹta ẹdịyẹ nyaa ka ba.

²⁴Angịnyị inyibyi ịwẹ kaa yẹ ka ri angị ịtụka, kpụ ụdụ ru ohi ba lụka ọ kpyii ịwẹ odu ịnyị, ọ ka nọ chẹẹ lẹ ịkaa gbu wombooo lala ekeji nya ịrayịchị ịịlẹ kị chị kpá.

²⁵Ala ịịlẹ wuu kam ya wẹẹ, ọ ri kị la ịnyị ịlẹẹhị kaka lẹ, ọngọ ka jum ọlọnụ ọkịla lẹ myị lẹ akpehe warị ka byim ịnyị mẹ.”