Read idege IJobu 26 Bible Online

IJobu 26 - idege bible

IJobu 26

¹Ụka ọọwa, iJobu wẹ Bildadị yẹkẹẹ,

²“Ọhẹ ka a tị ka me ká ala iyaya nyang ịwẹẹ juwa dam ụbwọ kpá nyọlẹ kam dẹẹ hịnẹ-hịnẹ á juwa kọ dam ụbwọ kpá pyịnyẹng kụrụ ka.

³Ịnọ me ọ tị chịla ká ka ju ọngịnyị irya ọlịịwẹ, bala ọ họ ká oluchi ọ lala am ka jẹ ang ịnyịnyị tang.

⁴Oowo a tị dang ụbwọ nya ala ịlịịwẹ iyaya kpong-kpong? Olegbeju nya owo a tị ya irya ọwẹ hang ká kpa ya ụma nya ala ịlịịwẹ?”

⁵Ohe Oluhye la ụmụmẹ kpuu, alegu nya adahị igogo anyị ịlẹ kị gbu kpa tata lẹ, juwa hụ kpakpaakpa la uhi ojuju ụ-ụwa. “Ejegu ẹ-ẹga ọkụ ẹpwa nyaa ọlẹpwụ nya enyi olekpeleji nya ọpyị bala ang ịdịhụ ịlẹpwụ nyaa wuu ju uhi ịnyịnyị.”

⁶“Ejegu ẹga ká angị gbugbu ji ọlẹ kọ ri odehe nyaa ji lọhịlọhị ị-ịlahị nya Ohe Oluhye. Ịngịngịhyẹ á kpọọ ibaa hi ẹhị nyamwụ myị kpong-kpong ka.”

⁷Ohe Oluhye nịra egbamwụ ola oye nya ẹtẹ kpaa ya pịlẹ a-ababahwoo ọlẹ kọ ya ọtachị dọọ da, Ọ hu odehe ọlẹ wuu bala ọpyị ọlẹ rịrị ẹ-ẹga ká ịngịngịhyẹ ji ka lichi-lichi.

⁸Ohe Oluhye bwọ enyi ẹhị la egbamwụ ọchị ụka egbamwụ á tị gwene e-ekpeleji nyamwụ ka.

⁹Ohe Oluhye hu egbamwụ ị chị ụka maa ke ẹchị adịrahụ nyamwụ.

¹⁰Ọ họ odehe ọle rịrị ẹpwarịrị nya ihu ịtụka kpa chị egbamwụ bala ọpyị ebwo hi awụlẹ. Ọ-gbile ọya da ọlẹ kọ ri oyi nya ahịgboo bala ukpowu, ọ da ọya dagaga ju ihu ịtụka.

¹¹Ụka ká Ohe Oluhye a chị uhi ju ịgbọdọ ịlẹ kị ri ịtachị i-iwu egbamwụ kpa, ị kaa hụ kpakpaakpa la uhi ojuju ụka kọ kpaa ịkata.

¹²Ohe Oluhye kpa ọngịrị nyamwụ kụrụ ihu bwula ẹla ọjẹjẹ nyamwụ ọ kpa ta iyo ọtụka ọlẹpwụ nya Ihu ọtụka ọlẹ kị wụrụ Rahabụ ayịreji, chọọ eku kpiki-kpiki lẹ.

¹³Bwula ọhụ ọ chị pẹẹ nyamwụ ọkpa tụ eji la amwụ ọkpụ tuu hi egbamwụ, ọọwa egbamwụ a la kpengkpeng, jaabwọ kị kpa ehe tụ eji lẹ. Bwula ụbwọ ọngịrị nyamwụ ọkpa nwụ ilo ịtụka ịlẹ kị pyịpyị dịrọ dịrọ juwa rụ ụnyẹ kị ka be lẹ.

¹⁴Yẹ mẹẹ, ụpịlẹ nya ẹla ọpyịnyẹng a wẹ kam chụ ya chajị nya ọngịrị nyamwụ lẹ. Lẹ o-owo a tị ka jẹẹ ya jaabwọ ká Ohe Oluhye la ụmụmẹ bala ọ myị lọngịrị ka ba myị?