Read idege IJobu 27 Bible Online

IJobu 27 - idege bible

IJobu 27

¹Ọọwa, iJobu à kịnyaa lẹla oyaya yẹkẹẹ,

²“M̀ jam ya nya ịlẹhị-ịlẹhị lẹnyị nya Ohe Oluhye ọlẹ kọ juwa hịhị, kọ yam chẹkpẹ ẹwụ, ọwa Agụgụ ọlẹ kọ họ ká ọhịhị lam ujujwo,

³nyori jaabwọ myị abwọ kam juwa hịhị, ká Ohe Oluhye juwa ya ịhụ ọdada ham,

⁴ugbọnụ nyam-ḿ ka hụ́ mẹẹ ya ẹla onyobyi ẹnẹnẹhẹ ka, ọnụ nyam-ḿ ka me ọnọọkịla ka.

⁵Ḿ ka myị kpá ẹnẹnẹhẹ nyori ẹla nyanụ à há lẹ kaka, m̀ godayị rịrị ẹ-ẹga kam ji gbee kị ka bwu ọpyị bam, jam ya nyori ḿ da ẹlẹlẹhẹ ka.

⁶Am yụbwọ chị abwẹla ọnyịịla nyam kpa am̀ giri-giri, m ka tụbwọ kpá ẹnẹnẹhẹ kaka: Bwu ẹnụtụrụ ịlẹ kị mam pyịyọ daalẹ lẹ, ọkịlẹtụ nyam á kpụm abyị jẹ kpong-kpong jẹ lẹka, chajị ọkịlẹtụ nyam la cheri-cheri.

⁷“Ká Ohe Oluhye a yẹ aluji nyam ịlẹ kịị tụm pyịpyị a yẹ akama lala angịnyị ịnyibyi.

⁸Chajị ịyẹ à tị́ ri ẹhị ọrịrị nya ọngọ jẹ Ohe-ka ụka kọ chị ukpo gbu? Ụka ká Ohe Oluhye a ye ọhịhị nyamwụ kpa wuu?

⁹Anụ ya ká Ohe Oluhye ka wo omyi ida nyamwụ ụka kọ chị eko nya ụbwọ ọdada?

¹⁰Ẹga nya Agụgụ ka kpaa ịpyọ-ọ̄? ị ka myị-ị̀ raabwọ wụrụ Ohe Oluhye ụka wuu-ú?

¹¹“M̀ ka mẹ ang jẹnụ jaabwọ ká ọngịrị nya Ohe Oluhye la, kam ya jenu obyi ọlẹ ká Agụgụ me.

¹²Yẹ wẹ, anụ wuu tị́ yẹ ang ịwẹ lịlọnụ, anyị tị́ tị̀ tị du kanụ mwọọgịlẹ juwa ya ẹla uchi-uchi ịlịịwẹ?

¹³“Ọlẹ ri jaabwọ ká Ohe Oluhye ka bwụ yẹ alabwẹla inyibyi akama, ang ọlẹ kị ka la bwu ẹga nya Agụgụ.

¹⁴Ó-ri kị ma anyị ká anyị nyaa á pye ju iru kpá abwọ myị abwọ, ẹwụ à tị ka ryaa wuu lẹ, anyị nyaa-á ka ye ang ri kpụ̀ ịlaa ka.

¹⁵Angị hihi nyaa ịlẹ kị be igu ọnụ nya ẹma nya ẹwụ ịịwa ka gbu igu nya ẹdụrụ, ịhụ ẹgu nyaa a tị ka bida kpong-kpong ka.

¹⁶Ọ ri nyịlẹhị angịnyị inyibyi ka tụ okpoko onyoowuru guru gbudum ha ịlaa, ị ka la iru nya ang ịnyangga ka kụrụ gụ ọngọngọhẹ wuu myị,

¹⁷alabwẹla ọnyịịla ịhyẹ a ka kụrụ ang ịnyangga ịịwa lẹ, angịnyị ịkpẹẹkpẹẹ ịhyẹ a ka chị okpoko onyoowuru ịịwa ebwo gịla awụlẹ lẹ.

¹⁸Ẹpwang ịlẹ ká angịnyị inyibyi ịịwa nwụ ha ịlaa la gile gile lala eke-iwu nya abakpa ịda apwụ lee lala a daa nya anyịhị ịlẹ kị kaa gbe ang ẹ-ẹrụ.

¹⁹Ẹnẹhẹ, ị ka ka ube kaka nune ẹ-ẹpwụ nya ụdụ nyaa, ị tị chahị kaka kụ abwabwọ.

²⁰“Ang oluhihi ịtụka ka bwaa mwaa lala ukpenyi lee ọhụụ nya enyi. Lụka nya epwodu jijijiiji ugbọchịrị ka warị ka hwaa kpa rụ byi pyịyọọ.

²¹Igbachịwụ o-bwu ọmwẹnụ-ụtụrụ ka gyaa peelee kpa rụ ka uhye-ọgba hi ẹpwa nyaa.

²²Igbachịwụ ka wẹ ka mịlaa nmoo la ọ-yaa ahyẹẹrwẹrwa ka, ị maga kpá dịịlaa nyọka bebe.

²³Igbachịwụ chaabwọ-igo juwa hụlọ ẹhụ jwaa, juwa daa ịkwẹ churum bwu ẹga kọ wẹẹ kwaa bwu.