Read idege IJobu 28 Bible Online

IJobu 28 - idege bible

IJobu 28

¹[12] “Anụ tị́ jẹ lẹ, ẹga kịị gba okpoko onyoowuru bwu ji, ẹga kị kaa hyà okpoko ịgọm ji ịnyịnyị.

²Ịị gba oje bwu ẹpwụ nya ịpyị, ịị ye ịkọpa bwu ẹpwụ nya ajwọ.

³Angịnyị jẹ jaabwọ kị ka tụ ukpowu kịnyaa, juwa bá pyeee ka ẹga ikpori-kpori nya odehe, kị ka teleko nya ajwọ ịnyịịla.

⁴Ịị da ọpyị ụgbụ pyooo hwẹ̀ẹẹ hi ẹga ka angịnyị kụ, ẹga ká ọngọngọhẹ-ẹ́ kaa chịpwụrụ bwu ka, juwa dịrẹ ori ọlẹ kọọ kpaa da ịlayịịlọ gbee kị ka pwụ ọjọjọ.

⁵U-uhye nya ọpyị ịị wu ẹrụ ang lẹ, e-ekpeleji nya ọpyị-ọpyị ọọwa hwẹ̀ẹẹ ịị tụ ukpilo nya ila ju nyọka be ajwọ ịlụwa ene yịgẹ-yịgẹ lẹ.

⁶Ịị ye ẹjwọ ịsafaya bwu ẹpwụ nya ajwọ ịlọpyị, okpoko ịgọ tị ji ẹpwụ nya ọrụ nya ịsafaya ọọwa.

⁷Ụ̀pa ọhẹ-ẹ́ hụ̀ kaka yẹ ẹga o-bwu kaka gba ang ịwẹ ẹnẹnẹhẹ lẹka, Upwu-ú ọhẹ-ẹ́ yẹ ụwa ka.

⁸Iyo ọnyẹẹgẹga ọhẹ-ẹ́ jẹdịyẹ bwu ẹgẹwẹ ka, ugẹbẹ ọhẹ-ẹ́ ya ẹtụ chị ụwa ka ịnyịnyị.

⁹“Angịnyị-angịnyị à kaa be ajwọ ịnyịịngịrị lẹ, ị jẹ-ẹ̀ ye ọmwụ nya ịgbọdọ kpete-kpete.

¹⁰Ị da ụgbụ bwu ẹpwụ nya ajwọ, bá pyee kaka wu ajwọ ịnyịịla ọyị.

¹¹Ịị da ihu ịyọ[13] gbee ka pwụ ẹga kị mwụ bwu, kị ka gba ang-ụdụ ịkpịbaa ịlụwa.

¹²“Ale ị tị́ ka ye ẹla ọjẹjẹ bwu-ù? Ale ang ọjẹjẹ à tị́ ji?

¹³Ọngọhẹ-ẹ́ jẹ ụgbẹyị o-bwu ka ẹga nyamwụ ka, chajị ị́ ka yoo bwu ẹga nya angịnyị ehe ka.

¹⁴Ụjẹ-ẹmwụ ya ‘Ọ́ jam ẹ-ẹga nyam ka.’ Ihu ọtụka ya ịnyịnyị yẹkẹẹ, ‘Ọ́ jam ẹ-ẹga nyam koo.’

¹⁵Okpoko ịgọm ọlahịchịng á ka jwọọ ra myị ka, ị́ ka jẹ-ẹ̀ nwụ uri nyamwụ lokpoko onyoowuru ka.

¹⁶Ọ ju apyobwuna gụ okpoko ịgọm ọlahịchịng ịlẹ wuu kịị kpa ọpyị nya Ofii, ọ kpịnya gụ onikisi bala ịsafaya kị ri ajwọ ịnyịịla-ịnyịịla.

¹⁷Ọ ju apyobwuna gụ okpoko ịgọm, ị ka jẹ-ẹ̀ ya rịra ịjang nya okpoko ịgọm ka.

¹⁸Ajwọ ikoralụ bala ịjasịpa tị́ ri ịyẹ a-ahị nya ẹla ọjẹjẹ? ọ ju apyobwuna gụ ōgbè ụma ọnyị myị ọnyị.

¹⁹Ẹjwọ itopasị nya Itiyopyiya gwoo kuu ka, ọ ju apyobwuna gụ okpoko ịgọm ọlahịchịng.

²⁰Ee lẹ, ẹla ọjẹjẹ tị bwu ale tị̀ tị̄? Ale ahị tị ka ye ang ọjẹjẹ bwu?

²¹Ị Ọ kpịbaa hi ẹhị nya ang ọhịhị ọnyị myị ọnyị, ọchịnụ-ụ́ hụ̀ nanaana, ọ́ ka jẹ-ẹ̀ yọọ myị ka.

²²Igu bala ayịreji ọtata anyị wẹwẹ lẹ, oja-oja nyamwụ kem ị wo lụrụ lẹ.

²³“Ohe Oluhye ụbwọọmwụ à jẹ ụgbẹyị nyamwụ lẹ, ọwa kem à jẹ ẹga ká ẹla ọjẹjẹ nọ ẹpwa lẹ.

²⁴Ohe Oluhye à kaa yọyị pwụ ọbaba ọnyị myị ọnyị nya odehe lẹ, ọọ yẹ ang myị ang wuu e-ekpeleji nya ẹnụ.

²⁵Ụka kọ ya ọngịrị ha igbachịwụ kọ ka da, kọ chị eje jaabwọ ká enyi ka lụmẹ kaka ba,

²⁶ụka kọ da enyi ehile ẹgẹgẹẹga kọ ka do, bala ẹga ká apya ka chị bwu,

²⁷Ụka ọọwa kpangga ọ yẹ ẹla ọjẹjẹ, wụlọọ yẹ kpete-kpete hwoo ya yeji lẹ.

²⁸“Ọọwa, Ohe Oluhye à byi angịnyị ehe yẹkẹẹ, ‘Ihi nya Ohe Oluhye ọjuju à ẹla ọjẹjẹ lẹ. Ang onyobyi ọhọhọ ọnyẹẹkpẹ da à ri ang ọjẹjẹ lẹ.’ ”