Read idege IJobu 29 Bible Online

IJobu 29 - idege bible

IJobu 29

¹IJobu kịnyaa juwa ya ẹla yẹkẹẹ:

²“Ang pyii ká ọhịhị nyam ka la jaabwọ kọ la lụka ogbalẹ, ká Ohe Oluhye kaa kpẹhị rịrịm.

³Ụka ọọwa, otinika nyamwụ hu ahịgboo ham, ọọ ya ahịgboo ham ụka kam juwa jẹdịyẹ bwu ukpowu.

⁴Ụka ọọwa-à ri ụka kam pyẹ pyọọ, ká Ohe Oluhye juwa tam, kpam kini-kini nya oligu-oligu.

⁵Agụgụ juwa tam ụka ọwẹ, anjwo nyam dagaga jum ụka ọwẹ.

⁶M̀ ye enyi-ẹmẹ pwụụpwụụ bwu ẹga nya ịna bala ịmwụ nyam, ekeji nya olivu nyam ịlẹ kị rịrị ẹ-ẹga ọkwangga wẹwẹ lẹ, ị rụ ida myị ang myị ang lala enyi à dọba.

⁷Ụka ọwẹ ri ụka kam kaa kpehe ka ogirigba nya epweji, kaka hụ bala ịgabwọ ẹ-ẹga o-me ẹla.

⁸Ikolobya-á yẹm ịị tụ hi ẹga ham, angịgbahị ri angịgbahị, ịị wuleji jum ihi.

⁹Alegbeju kaa kpụba lẹla oyaya, hụ lọnụ-ujiji kem.

¹⁰Ịbagọ alihi anyị bà táaa, hụ́ ọnụ nyaa mẹẹ kpong-kpong ka.”

¹¹“Ọng myị ọng kọ wo ẹla ọlọnụ nyam kaa mịla oja ham, angịlẹ wuu kị yẹm kaa kpa ụbwọ u-uhye nya ang ịlẹ kam họ.

¹²Alẹbyahị chị eko nya ụbwọ ọdada wụrụm, m̀ daa ụbwọ họ ọbaba nyaa. anyị-egu ịlẹ kị la ọngọnọhẹ ka daa ụbwọ ka, m̀ daa ụbwọ ịnyịnyị.

¹³Angị ji ẹpwụ nya uhila nya akama kam daa ụbwọ, wẹ kaka mịla oja ham. M̀ họ ịhụ-egu jẹ chị ụmwẹhụ.

¹⁴M̀ hu ang ọnyịịla ọhọhọ kụrụ lala awụrụ, ẹla ọkpẹẹkpẹẹ ọhọhọ kụrụm lala awụrụ bala okpo.

¹⁵M̀ ri ugbẹhị nya alidu, ri ẹta ọ-jẹdịyẹ ha nya ikuku.

¹⁶M̀ ri adịda nya alẹbyahị, m̀ chẹkpẹ ju angga ịlẹ kị ji ẹpwụ nya akama.

¹⁷M̀ pyị alabwẹga inyibyi ụbwọ, gba angịlẹ kị wẹẹ tụ pyị ang kpehe kaka la ịlaa.”

¹⁸“Irya omeme nyam ri m̀ ka hi gbee kam ka bwu inyi uguchụụ, kam ka yụbwọ nọ ọ-ọba lokpunyi ẹ-ẹpwa nya ịlọm.

¹⁹M̀ lala okoji ọlẹ kọ da atẹ gbee kaka wu enyi ọyị, ká amwụ kaa kpụ abwọ nyamwụ.

²⁰Ịị chị ihi jum kịlahị-ịlahị, ọngịrị nyam ri onyeewe-onyeewe.

²¹“Ọng myị ọng wuu kaa ke ụrụ gbe irya ọlẹ kam ka jwaa, yọnụ bawụlẹ kem-m nyọka Igbachịwụ obwu ọmwẹẹnụtụrụ ka kwwo ẹla ọlẹ kam ka ya.

²²Ḿ ya kpá ịị ye ẹla ọkịla ọhẹ ka ya haju ịnyam kaka, ẹla nyam kaa waa ẹpwa.

²³Ịi ya ẹhị rịrị gbem lala alẹrụ ya ẹhị nọ gbe enyi ododo, pyẹ ọnụ da gbem lala enyi nya ụrwẹnụ ọlẹ kọọ kpụ ịnyịrọ nyìì.

²⁴M̀ chị ụmwẹhụ dụmwọọ ụka ká ọkịlẹtụ kpaa enyi, Ọyị ọlẹpwụ nya ẹhị nyam jwaa ọhụ.

²⁵Ḿ hụhụ kịrẹkpẹ lẹ, m̀ mẹ ụgbẹyị jaa, m̀ kpa ịlahị jaabwọ ká adịrahụ kaa kụ ịlahị nya angịdẹwụ nyamwụ, juwa ya ẹjẹ ọkpụkpụ haa lụka nya ọkịlẹtụ ọ-kpaa enyi ọwẹ.”