Read idege IJobu 3 Bible Online

IJobu 3 - idege bible

IJobu 3

¹Ụka ohyẹẹkpẹ lẹ, iJobu à dọmwụ nya ẹla oyaya lẹ, ọ gọlọ ju ẹnụtụrụ ọlẹ kị mọọ

³“Inyiribyi ā kpụ ẹnụtụrụ ọlẹ kị mam, ụtụrụ ā byị odu ọlẹ kị jẹnyị nyam!

⁴Ẹnẹwẹ kpangga-ā yẹ ri ukpowu, Ohe Oluhye ā dọmwụ kpịtịya nyamwụ kpụkpụ kpong-kpong kaka, ká ahịgboo ā ji ha ẹnụtụrụ ọọwa ẹnẹnẹhẹ kaka.

⁵Owu ọchịchị bala ukpowu okpem-kpem ā ye la, egbamwụ ā tụ biroo, ká ohite-hite nyamwụ ā ke ahịgboo nya ẹnụ hyoo.

⁶Odu ọọwa ka le—yịlẹ odu ọwẹ hi ẹnụtụrụ ịlẹpwụ nya ẹka ọwawa, ā myị kị wọọ jula ẹnụtụrụ ịlẹpwụ nya ọya ọhẹ-lọhẹ kaka.

⁷Odu ọọwa-ā dọmwụ ta ụma, ọngọngọhẹ ā wo pyee liwuru ọdada ẹnẹwẹ ka.

⁸Alijiga ịlẹ kịị gọlọ ju ahyẹnụ ā gọlọ ju ẹnẹwẹ, ịwa angị mwụ ịnwa ịlẹ kịị wu ugbiriyo bwọ eji myị.

⁹Ịdịchụ nya ewu-ụtụrụ nya ẹnẹwẹ ā chu obiri kị hụ́ ka, ā myị ká ahị a pyẹ odu ọwẹ ka.

¹⁰Ohe Oluhye ā gọlọ ju odu ọwẹ nyọlẹ kọ myị kị mam, du kam ji ẹpwụ nya akama ịlẹ lẹẹ wuu alẹ.

¹¹“Ịyẹ tị́ du kam gbu o-okube, nyọlẹ kị mam kpá bwaaa ka ene-è?

¹²Ịyẹ tị́ du ká ịnam hum nọ a-ata nyamwụ-ụ̀? Ányị tị́ du kọ ya ẹmẹ ham nyẹ kpong-kpong ene-è?

¹³Ḿ gbu lẹẹ ụka ọọwa lẹ, ịnọ ḿ ka la ọmwịịnyọ alẹ lẹka-á?

¹⁴Ịnọ m̀ ka juwa nune nyam lala alegbeju bala ịdịrịhụ ị-nwụ ẹpwa ịtụka iligbalẹ ịlẹ kị kpụ egwawụ-egwawụ-ụ̀ wẹ alẹ lẹ.

¹⁵Ịnyịnyị m̄ ka juwa nune nyam lala ịdịrịhụ ị-kpụ ụdụ ịlẹ kị ya okpoko ịgọm bala okpoko onyoowuru ju ụjị ẹ-ẹpwa nyaa lẹ.

¹⁶Ịyẹ tị́ du kị jum eji lala ogu-ọnyị ọlẹ kị pwọpwọ, ọlẹ kọọ hị kpụ ọ-ka yẹ ahịgboo ẹ-ẹhị ka-à?

¹⁷Ẹ-ẹpwụ nya iworu lẹ, angị inyibyi-í tụtụm kaa ye angịnyị uyawụ kaka, angịlẹ ká ịnyịrọ chaa pyẹpyẹ kaa la ọmwịịnyọ.

¹⁸Angị ri alagba ri, í gbu lẹ, ị la ịlaa lẹ, ịkata nya alegbeju ị-kpaa yẹ ụhị myị gbanggbang.

¹⁹Angịtụka tụ angị ichiche juwa wuu lawụlẹ, anyịhị la ịlaa bwu ụbwọ nya ayịbaa ụka ọọwa.

²⁰Ịyẹ tị́ du ká angị ji ẹpwụ nya akama tụtụm kịnyaa juwa hịhị wẹẹ? Ahịgboo tị́ ju apyobwuna nya ịyẹ ha angị ji ẹpwụ nya ọjụjụ.

²¹Ị tịtọ nya igu kekeeke, igu tị wẹ ka, ị dịyọ nya igu gụ ọlẹ ká angịnyị kaa dịyọ nya ang-ụdụ wẹẹ.

²²Ugbodu kpaa ịịlẹ nyììì ụka ká igu pwaa eji, kị kpaa ka nọ i-iworu.

²³Ịyẹ tị́ du ká Ohe Oluhye ya ọhịhị ha angịlẹ kọ ya ijuju nyaa kpịbaa? angịlẹ kọ ya akama bá iku yaa dada.

²⁴Ịhụ ọ-chị byị̀ịị ọwẹ mẹ ịnyị, ḿ ri ang myị ka, eru omwumwu nyam tá iru lala ọhụụ nya enyi.

²⁵Ang ịlẹ kam ju uhi nyaa-à chịm ọgụ lẹẹ lẹlẹ. Ang myị ang ịlẹ kam kaa chị uko nyaa wuu à họ tam wẹ lẹlẹ.

²⁶Ḿ la okpunyi ka, ḿ la ịnyọ ọmwụmwụ ka, ḿ da ọhụ rwẹẹ myị kaka, akama kẹnẹ-kẹnẹ à rịrịm lẹẹ lẹlẹ.”