Read idege IJobu 30 Bible Online

IJobu 30 - idege bible

IJobu 30

¹Anjwo ichiche ịgbẹdẹdẹ juwa kpam họ, angị ri ịkpa oleji nyam ịnyị-ị̄! Adaa anyị dọmwụ tụm ànyị, ị nwa kpụ m̄ ka chwaa nyọka bajẹ ta ibwu i-gbe ịkpịlọ nyam ka.

²Apyobwuna nya ịyẹ ọngịrị nyaa-à tị́ ju? Angịnyị kị la ukuru nyka jụ ịngịngịhyẹ họ kaka!

³Angịnyị ká ẹbyahị ya limyi nwaa lụmẹ gbee kị kaa be atẹ nya ekeji ịnwụ ọnwụ ri lodu, ụ-ụwa ugbileji ẹga ká ọpyị nwọnwụ kịragba ịnyị.

⁴Ị juwa kaa ga tụ ugbileji da, chị apwụ bala ọgba atẹ nya ekeji ịlala nya ang oriri nyaa, bala ọkpa ịhyẹ ẹpwụ nyaa tụ ịla ju wo.

⁵Iru nya angịnyị lụmẹ-lụmẹ á myị hi iwe ha angịnyị inyibyi ịwẹ nyọka kụ ẹpwụ taa ka, du ká ẹga myị ẹga kị ka alepweji kaa kwaa rụ. Ị kaa juwa rụ ụnyẹ kwaa, juwa chaa ukwa jaabwọ kị kaa chị oyi ụkwa.

⁶Ị rụ ka kụ ẹpwa ẹpwụ nya ikpokpo nya ịgbọdọ bala ẹpwụ nya ajẹ ịlẹ wu ịkịka nya ajwọ ịtụka.

⁷Ị kaa juwa cheko la eru omwumwu u-ugbileji bwu ẹpwụ nya amẹ kpehe lala iyo kị kaa wu iru nyaa ju ẹga ookpokpo kị chaawụlẹ chị juwa tụ awụlẹ pyịpyị.

⁸Ekpilo nya anyị alẹng nya angịnyị ịlẹ kị la irya ka, ká angị ịwa a tị ri ẹnyị ka, ọlẹ ká ọngọngọhẹ a tị jaa ka. ịkpa ịgbọdọ nyaa enyiri nyịlẹhị ịlẹhị, kwaa rụ hi ẹpwụma ọnyị myị ọnyị lẹ.

⁹Lẹẹlẹẹ wẹẹ, am ị kaa mwu eje gu lẹlẹ. Ịhwẹ ị kaa kpam ya lẹlẹ.

¹⁰Ị nyi ẹkpẹ dam rụ hwẹ̀ẹẹ him, ị dọmwụ kaa chị ide hụm a-ahị.

¹¹“Chajị Ohe Oluhye chị eduru nya uda nyam, ọọwa m la ụbwọ ọdada kaka lẹlẹ, ịhọ ká ọngịrị wuu gụm myị lẹ ị họm ang ọlẹ kọ haa lẹlẹ.

¹²Ogu nya iru nya angịnyị gba mịlam nmoo, ị kum lakụ-lakụ, chị ẹkpa ịlẹ kị ka kpụm.

¹³Ị chịm ọkpalo-kpalo, juwa tịtọ kị ka tam ayịreji, ọngọ ka daa otàaá-á ji ka.

¹⁴Ị pwụ eji bwọọọ lala ịnyaa bene ugulọ ene jụ warị, wẹ kaka kpụm ẹkpa beji kpàlị-kpàlị.

¹⁵Uhi ojuju yẹm jiíí lẹ, ihi ọlala nyam hụ̀ peelee lala ọhụ à dọọ hụrụ, ụdụ nyam tụ́ tùuu rụ lala egbamwụ.

¹⁶“Ọhịhị nyam ru ịmwụrụkpẹ hi igu ogbugbu lẹ, ẹnụ nya akama ọyẹyẹ nyam yẹm juju lẹ.

¹⁷Lodu ẹnụ myị ẹnụ ekpinegu kaa juwa lọm hyuhyu lala ụka kị-ị kpa ang bwurwaa iwa. Ang ọjụjụ á pwuru him ka, ịwẹ ekpiiji a juwa kaa chịm angịrị mwụmwụ-mwụ lala ekpunjuju lẹlẹ.

¹⁸Ohe Oluhye wum kịrẹkpẹ lọngịrị ọngịrị gbile awụrụ nyam juwa ụ-ụkpụrọkọ, tọọ pịrịm gbanggbang, Ọ chịm ori jaabwọ kị kaa gbile u-ụgbọnụ nya ukotu ju ọngịnyị ụkpụrwọkọ, lịnyịrọ nyam pyị kpanya kpanya wuu lẹ.

¹⁹Ohe Oluhye hum hwaa lẹ ọ chị pyi ju ka ẹpwụ iwa (ịtọpyị) lẹ: Ọ kpam weji bẹdẹẹ lala ekuruwa bala agbu nya ila lẹlẹ.

²⁰“Áhyu Ohe, m be ẹkọ wụrụng, ma Á tị myị wẹm kpong-kpong ka, m raabwọ Hang, a Á tị myị ke ụrụ lam ka.

²¹Ma ọlẹẹlẹẹ lẹ a la ujwo nmanmaanma tam juwa tụm pyịpyị lụmẹ lẹ: jaabwọ kpá ká ụbwọ ọngịrị nyang lụmẹ ka ba, a chị-ẹjẹ kpá hwọọ hwaa jua kpa tụm pyịpyị la ọ yẹm akama ịnyịnyị.

²²A họ ka igbachịwụ hum kpa ka uhye peelee lẹ, ọ juwa kpam rụ lẹlẹ: ọọwa lẹ a họ ịgbachịwụ ọnyọọngịrị bala ịhwẹ-ẹnyị a a wẹẹ kpam ga kele warị lẹlẹ.

²³Ee, am ayịdang jẹ ká Á juwa ka ye ọhịhị nyam kpa rụ ka ejegu ẹnụtụrụ ookpokpo ọhẹ, ẹga ọlẹ kọ ri ẹpwa ọlẹ ka nwụlanọ ha angịnyị ehe ịlẹ wuu kị da ịhụ am odehe ọlẹ lẹ.

²⁴“Ọlẹ kam lẹẹ lẹ, m họ ịngịngịhyẹ nyọka họ ọngịnyị ọlẹ kọ juwa ẹpwụ nya ụkama ang onyobyi, kọ ọngọọwa be ẹkọ wụrụm nya ụbwọ ọdada ẹnẹnẹhẹ lẹka.

²⁵M ka jida chajị nya angịlẹ kị juwa ẹpwụ nya akama ka-a? Ẹla nya angịlẹ ká ẹbyahị yẹ ka tọm olujwo lụmẹ.”

²⁶Tị yẹ mẹ, ụka kam yẹ ẹhị rịrị gbe ang ọnyịịla, ang ọtịpyọ warị gẹgịlẹ: Ụka kam godayị gbe ahịgboo, lẹ ukpowu a kaa pwụ eji warị kem lẹlẹ.

²⁷“Ọkịlẹtụ nyam ji ẹpwụ nya akama ọtụka-ọtụka, ọ́ọ la ọmwịịnyọ ụka ọhẹ-lọhẹ kaka. Ẹnụ myị ẹnụ wuu ri akama akama ham pyịyọọ.

²⁸Ịnyịrọ nyam chu obiri kpọnyọọ ọ la ẹdụrụ, ẹnụ a tị chịm ka lee ọ chịpwuu ka: M godayị rịrị ẹpwụ iru nya ọjịrajịra nya angịnyị wuu cheko nya ụbwọ ọdada.

²⁹Eko ọchịchị nyam ri nya ụbwọngee lala ịnya ikirom bala ogoriigo u-ugbileji.

³⁰Ugbịnyịrọ nyam mwẹẹkpẹ yẹ kpọnyọọ lala ukpowu, lọọ pyẹ pyapya wuu lẹ. Ekpinegu nyam rụ ila wuu ọ-ọla ọchịpwuu bala eju ọ họm họ lẹ.

³¹Lẹẹlẹẹ wẹẹ ọmyị nya ẹnwụ odudu nyam bala omyi nya uhule nyam ọ kpa mwu eje nyam wuu ri ịnya ida ọbaba lala angị bida nya angị gbugbu.