Read idege IJobu 31 Bible Online

IJobu 31 - idege bible

IJobu 31

¹“M da ịlọm ọnụ nya ịlẹhị-ịlẹhị, nyọka kpa ẹhị nyam yẹ ọnyang ịhyaang-ịhyaang ẹnẹnẹhẹ ka.

²“Ịịyẹ tị ri ang ọlẹ ká Ohe Oluhye hunọ hahị-ị̀? Uri ọlanyị Agụgụ à tị́ ka nwụhị?

³Ohe Oluhye kaa du inyiribyi ọ mwaa bala ayịreji ọtata wẹ ẹga nya angịnyị inyibyi ịlẹ kị je Ohe ka.

⁴Ohe Oluhye-é jẹ ang myị ang ọlẹ kam kaa họ ka-á? Ọ yẹ ẹta-ẹdịyẹ nyam wuu.

⁵O ri kam jẹdịyẹ la ọnọọkịla, kam tị juwa kpa ẹpẹtẹ nyam jẹdịyẹ la agaga pyapaapya ka pịrị angịnyị ju hwaa ahị tụbwọ aalẹ:

⁶Ohe Oluhye a lam eje la abwẹla ọnyịịla, chajị ká Ohe lịlọmwụ ka jẹ ọngịnyị ọnyịịla ọ riri nyam mẹ.

⁷O ri kam ji kpata hi ụgbẹyị ọlayịchịng ọlẹ kọ ri ọnyịịla, lee ọ ri ká ang onyobyi ọhẹ a chịm ẹhị gbọgbọ, lee ori ka abwọ nyam á chịrị la ọhọbịrị aalẹ:

⁸Ohe Oluhye a họ ká ang-abwọ nya ẹrụ nyam ịlẹ kam be bala ịlẹ kam tọ wuu a ta ayịreji, ká Ohe Oluhye a ye ang iriri nyam ịlẹ wu bwu ụbwọ nyam ha angịkịla ịlẹ kị ka hi ugu nyaa ri.

⁹“Ó-ri ká ahụ nya ọngịnyị ọngọkịla-á chịm ẹhị gbọgbọ, kpụ kam kele kaka kụ ị̀nya gboo ọ-ọnang nya ọrụmwụ aalẹ,

¹⁰ahụ nyam ā yẹ ri ọngọ kpụ ang ha ọlẹng ọkịla ri, ká ọlẹng ọkịla-ā bá nọ balọọ.

¹¹O-nu ọngọkịla ahụ yẹ ri ang-ibyi oloyoyi kị ka yẹ ọngọ họ ịnyị akama pyii.

¹²Ibyi ọwẹ ri ila ọlẹ kọ ka rụm gbee pwụ obwila myị, ọ ka chị wu ang myị ang kam la myị.

¹³“Ó-ri kam yẹ ọnchẹ ọlẹng lee ọnchẹ ọnyang nyam ọhẹ-lọhẹ ba, kị wẹ kaka chị eru jum, m̀ ka ke ụrụ leru ọchịchị nyaa.

¹⁴Ó-ri kam ke ụrụ laa ka, ká Ohe Oluhye-é wẹ nyọka tọm ẹla ọọwa wo, m̀ tị́ ka họ anyị kam ka kụ gboo myị? Ẹla-ịyẹ m̄ tị́ ka ye wọọ?

¹⁵Ohe Oluhye ọlẹ kọ họm à họ anchẹ nyam ịnyịnyị lẹ, ọ họhị wuu lawụlẹ.

¹⁶“Ụka ọhẹ-lọhẹ-ẹ́ juwa kam pwa ọ-da okpehika ụbwọ ẹnẹnẹhẹ lẹka, ḿ da ahị ọdahile nya ịhụ-egu ẹkpa chọpyị ẹnẹnẹhẹ lẹka.

¹⁷Ḿm̀ tụ ang oriri rịrị ịlọm, pẹhi anyị-egbu gbu imyi ka.

¹⁸Bwu ụka-ụka nya ejwo nyam, m̀ kspa anyị-egu nwa bala ọ-da ịhụ-egu ụbwọ.

¹⁹“Ḿ yẹ ọlẹbyahị o-ye ang kụrụ ka, lee ọngọ jula ọhẹ-lọhẹ ka kọ ye ang ke ịnyịrọ ka,

²⁰M kaa ya ịwụrụ họọ, ịwụrụ ịlẹ kị kpa egbii nya ịmwụ nya ịlọm nụ họọ, ọọwa, ọọ mịla oja ham bwu ẹpwụ nya ọkịlẹtụ nyamwụ wuu lẹlẹ.

²¹Ó-ri kam hu ụbwọ nyam hwaa tụ ọnyị ogu ọhẹ-lọhẹ pyịpyị ẹnẹnẹhẹ lee ọ họ ri ẹnẹnẹhẹ lẹ, ịnọ tọ ri m jẹ kam jẹ ka la angị ka chị oku ham ọkọtị aalẹ,

²²Aalẹ Ohe á họ ka ukpunogu nya ụmwụchwọ nyam a hụla hi ụkpụrwọkọ, ká ugburu ụbwọ nyam a mwụ eku, kọ bene rụgbẹ rụgbẹ bwu ụmwuchọ mẹe.

²³M ka họ ang ịnyibyi ịlịịwẹ myị ka chajị m ju uhi nya akama nya Ohe Oluhye ọ ka wẹ chịm ọgụ.

²⁴M hu ọkịlẹtụ nyam ha ụdụ nya ọkpọko ịgọm ẹnẹhẹ lẹ-ẹ? Ẹnẹnẹhẹ. M byi okpoko ịgọm ẹnẹnẹhẹ yẹkẹẹ, Okpoko ịgọm ee, ahụ m hu ọkịlẹtụ ha da-ahị hile ẹnẹhẹ jẹ lẹẹ? E-ehe oyinaà tị́kpụ ọọwa.

²⁵Am a dọmwụ hi ọbọọchẹ hi chajị nya ọ ri mkpụ ụdụ lee ụgbụrụ-ụbwọ họ m la okpoko lụmẹ lẹ ẹnẹnẹhẹ lẹ.

²⁶M hu ẹhị nyam hwaa ka yẹ ẹnụ m raabwọ họọ chajị nya ahịgboo nyamwụ ọ chị ahị ịraapya ẹnẹhẹ, m tị raabwọ ha ọya chajị ụhị ọháha nya ahịgboo nyamwụ ẹnẹhẹ lẹka.

²⁷Ụka ọhẹ-lọhẹ a juwa ka ang ịwẹ kpam hwaahị la jwaa ihi ka kpịla ọ ju ụbwọ ọnụ nyọka gbịgba haa ẹnẹhẹ lẹka.

²⁸Ó-ri kam raabwọ ha ẹnụ bala ọya anyị ịwẹ lẹ aalẹ ọọwa ri m chịla ohu ọkịlẹtụ ha ẹga ká Ohe Oluhye ji kaka, ọlẹ kọ mẹjẹ m pwa Ohe rwaarụ lẹ. Ọlẹ ká angị leje ka ya eje nya igu wum myị, chajị ọ ri ọhọbịrị ọ-kpụ igu.

²⁹“Ụka ọhẹ-lọhẹ á juwa kam chị ọkẹkẹnị ụka ká aluji nyam juwa ẹnẹhẹ lẹka lẹka, lee ọ ri ẹla ọkpụm ịpyọ ụka ká ayịreji ọtata a wẹ chị angịlẹ kam wụ ẹjẹ ọgụ ka.

³⁰M dọmwụ kpa ọnụ nyam ọlẹ họ ang onyobyi la ọ raabwọ lee ma aluji nyam igu ma kpong-kpong ka.

³¹Angịlẹ wuu kị ji ẹpwa dọmwụ kaa yẹkẹẹ, Ọngọngọhẹ a ya ẹla onyobyi nya iJobu ka, chajị ọngọngọhẹ a hi kọ kaa ri ang ọlụbwọ nyamwụ ka lẹka.

³²Angga ịlẹ wuu kị chịpwụrụ bwu ẹgẹlẹ kam jẹ m kaa kpaa wẹ ẹpwa ka nọ-une, m myị ịkaa nọ une opeje ẹpwa ka.

³³M họ jaabwọ ká angịlẹ kị kpụ ịhọbịrị nyaa ịbaa ka, lala angịlẹ kị go ang nyaa ju amẹ nya ịwụrụ nyaa kpụ ibaa hi angịkịla ka.

³⁴Ụka ọhẹ-lọhẹ juwa kam ju uhi nya ala iya rụ lee ọkpa kụ nya angịnyị lee ọ ju uhi nya ẹhụ ọ hụlọ ju nyaa, ká ọọwa ka họ kam ka hụhụ ẹpwa chịng la okpehe ka odehe ka bala ọ ka tụ ọnụ nyam pịrị?

³⁵“Ọ ka ham lụmẹ ọ ri ká Ohe Agụgụ a ka yẹ ẹlẹhẹ ọtịpyọ nyam ya lẹ aalẹ ọ kpehe kọ ya mẹ. Ọ ka myịmyị ham ori ká ụpwụ ọhẹ a ji kị ka da ịnọ ma ka da ẹnyị nya ịlọm ụ-ụwa ka yụbwọ jwọọ ẹ-ẹpwụ, ka ọọwa mẹjẹ ẹla nyịlẹhị a wẹ kaam wẹẹ ya lẹ.

³⁶Ụka ọọwa m ka hwaa hwaa ka uhye ka hụ ụmwụchọ nyam ẹga ká ọng myị ọng wuu ka lọngịrị yaa myị. M dọmwụ ka hwaa kụrụ e-egbeju kị ka ri okpo nya adịrahụ nyam.

³⁷M ka tịrọnụ nya ẹla myị ẹla ọlẹ wuu kam họ ya jẹ Ohe Oluhye. Ma ka lọngịrị jẹ kele kịlahị nyamwụ lala adịrahụ ọlẹ kọ ri olegbeju nya epweji.

³⁸“Ó-ri kam hu ọpyị ọlẹ kam kaa kpaa wu ẹrụ yi oyi, lee nu ọngọlẹ kọ la ọpyị lagbụrụ. Ọlẹ kọ kpụ ká ayịdang nya ọpyị ọọwa cheko la ida ojeje jum aalẹ,

³⁹M nu ọngọngọhẹ ang-abwọ nya ẹrụ nyamwụ lagbụrụ ẹnẹnẹhẹ lẹka, lee ọ wu ayịdang hụ limyi ẹnẹhẹ lẹka, ọ ri kam tị họ ịnyị aalẹ,

⁴⁰ọkọkọ nya ịrayịsị iwiiti ọ-ka bwubwu lẹ, ejwo ā bwu kpehe, ọkọkọ nya ịbali lẹ, ụkọ ā bwu kịrịnyọọ mẹ.” Ịịwẹ ẹla oyaya nya iJobu à cheju lẹlẹ.