Read idege IJobu 33 Bible Online

IJobu 33 - idege bible

IJobu 33

¹“IJobu ee, ke ụrụ dụmwọ ká wo ẹla myị ẹla ọlẹ kam wẹẹ ka ya mẹ.

²Lẹẹlẹẹ m nwụla kpaá ọ hi pịnyẹ kam ka wẹ ẹla lẹ Ala ịlẹ kam ka ya wuu nọ wẹ u-uhye nya ateju nya ẹlẹlẹ nyam gedee lẹ.

³M jam da ịwẹẹ nyam am la abwẹla ọnyịịla nya ọkịlẹtụ ọọwa lẹ m mwẹẹ yoo dodehe gbada lẹlẹ.

⁴Olegu ịgọgọ nya Ohe Agụgụ a họm lẹ, ọwa da ịhụ nya ọhịhị jum a du kam lẹẹ hịhị lẹ.

⁵Ó-ri ká lọngịrị ka da ịwẹẹ myị lẹ aalẹ. nwụla ịwẹẹ nyang nọ mẹ ká kẹwẹ ka godayị rịrị ị-ịlahị nyam mẹ.

⁶iJobu, Am bala ahụ la ookpokpo ị-ịlahị nya Ohe Oluhye, ahị datị hi awụlẹ ka. Ọrụ ọpyị ọlẹ ká Ohe kpa họng, ọwa ịkpa họm ịnyịnyị lẹ.

⁷Yẹ mẹẹ, ọbaba a ka ju uhi nyam ka, a tị me irya ya am nyị lọngịrị ọhẹ juwa ka tụng pyị-eji ka.

⁸Ẹla nyịlẹhị, m wo ala iyaya nyang ịlẹ ká ya wuu.

⁹Chajị a yẹkẹẹ, abwọ nyam la cheri-cheri m họ ang onyobyi ọhẹ-lọhẹ ka, Ọhịhị nyam la cheri-cheri, m bịrị ehile ọhẹ-lọhẹ ka.

¹⁰Ma kpọkpọọkpọ Ohe Oluhye tịtọ kọ ka ye iwe nyọka mwẹla tam, ọọwa lẹ, ọwẹẹ họm ẹla lala oluji nyamwụ lẹlẹ.

¹¹Ohe jum odo la ekeji á tiye, ọọwa lẹ ẹta ẹdịyẹ ọnyị myị ọnyị kam hu ọ kụ kee juwa gbem lẹlẹ.

¹²IJobu yẹ mẹẹ, ugbẹnyị ala nyang a jẹ tịpyọ ta kpong-kpong, nya ala ịwẹ ka ya ta Ohe Oluhye hu ụbwọ nọ ụ-ụrụụ gụ ahịgboo wẹẹ lẹ. Ohe Oluhye lụmẹ gụ ọngịnyị ehe ọnyị myị ọnyị wuu.

¹³Anyịà tị́du ká chị ala ba Ohe Oluhye, ka juwa da ịwẹẹ yẹkẹẹ, Ohe Oluhye a kaa myị-ị wẹ ọngọngọhẹ ẹla kaka, chajị nya ọlẹ ka Ohe a wẹng ẹla ụbẹẹtụ ọnyị myị ọnyị ka lẹlẹ.

¹⁴Chajị Ohe Oluhye ya ẹla myịmyị mọọ ya, ma kpọkpọọkpọ, ọngọngọhẹ á tị myị ke ụrụ ka.

¹⁵Ụka ká angịnyị a juwa nọ une lodu. Ohe Oluhye kaa ẹla taa ẹpwụ nya ụlaa ọlala bala ọyị ọyẹyẹ.

¹⁶Ohe Oluhye họ ka angịnyị ehe ke ụrụ la ẹla ọlẹ kọ ya, ọọwa lẹ ọ jwaa uhi la ọna dada nyamwụ lẹlẹ.

¹⁷Ohe họ ọlẹ nyọ-ka hu angịnyị abwọ la angịnyị iwe la ọhọbịrị bala ọka chị angịnyị da bwu ẹpwụ nya ọbọọchẹ ohihi nyaa.

¹⁸Ụka kọ hi kpá pịnyẹ ịnọ ká angịnyị wẹẹ ka gbu kị ka jwaa eji iworu lẹ, Ohe chaa da O chị ọhịhị nyaa da hi ayịreji ọ tata nya ẹma nya ẹwụ.

¹⁹Ohe Oluhye yẹ ọngịnyị akama wọọ ụgboji la ẹdụrụ bala ang ọjụjụ ụka ka nọnọ u-uhye nya ịbẹdẹ nyamwụ họ kọ hụ kpakpaakpa la uhi ọjuju la adịrẹ hwọọ nye-nye.

²⁰Chajị nya ẹdụrụ ọlẹ kọ jwọọ du ká ang oriri ọlẹ kpá kọ kaa họọ lụmẹ á mọọ ma la oriri kaka.

²¹Ịnyịrọ nyamwụ myị hi kpá kirogboo lala akịrakpa, la ekpinegu hi-ehe wụlẹ wụlẹ lala ụka kị ka jẹẹ waa.

²²Ohi pịnyẹẹ kọ ka gbu lẹ, angịlẹ kị kaa ta ọnyịnyị ayịreji juwa godayị gboo ụ-ụwa e-ejegu.

²³“Ọhẹ ka olegu-ẹrụ ọhẹ ka warị ka da ọngịnyị ehe ụbwọ, ọlegu ẹrụ ọhẹ ẹ-ẹpwarịrị nya iru nya ụnọ ukuku nya alegu-ẹrụ ọlẹ ka kpụ angịnyị ehe ịtịya nya ang ọlẹ kọ ri ụkụrwọ nyaa kọ chịla kị ka họ ka warị.

²⁴Ẹ-ẹpwụ nya ahyẹẹrwẹrwa lẹ olegu-ẹrụ a byi Ohe Oluhye yẹkẹẹ, Gbọọ kpehe mẹ chuchu, a myị kọ rụ ka ejegu lẹka.

²⁵Ịnyịrọ nyamwụ myịmyị ka la jwọjwọ jaabwọ ka la ụka ọlẹ kọ ri onjwo, la kpọngkpọng lala ụka kọ ri onyjwo ọkolobya.

²⁶Ụka ká ọngọlẹ ká ẹdụrụ jụ à raabwọ, Ohe Oluhye ka ke ụrụ lọọ, ọ ka gbịgba ha Ohe Oluhye la ọkẹkẹnị chajị nyọlẹ ká Ohe Oluhye hu ọkụrụ họọ kpoye nya igu.

²⁷Ọọwa lẹ ọ ka juwa mwu eje ị-ịlahị nya uche nya angịnyị wuu yẹkẹẹ: Ịnọ m họbịrị Ohe á tị myị yẹm akama jaabwọ kam họ tịpyọ ka ba ka, ọ chị ọhịhị nyam da.

²⁸Ohe Oluhye gbe ugbodu okpukpuru nyam kpehe hi ejegu, ọọwa lẹ m lẹẹ hịhị daalẹ kpọkpọọkpọ lẹlẹ.

²⁹Yẹ mẹẹ, Ohe Oluhye họ ang ịlẹ maa họ, kịla ugbabwọ imiiye dọmwụ lee ugbabwọ ịta myị.

³⁰Ọ chị ọhịhị nya ọngịnyị da, ọ họ kọ chị ọkẹkẹnị chajị nyọlẹ kọ juwa la ọhịhị myịmyị kịlahị wẹ.

³¹“iJobu ee, ke ụrụ ká wo myịmyị, ba kem m juwa ka ya ẹla.

³²Ma ori ka la ẹla ka ya lẹ, aalẹ á wẹm kam wo mẹ. Aalẹ m nwụla kam ka chị oku hang ya ẹla nyang hagụ lee eje a wung ka.

³³Ọ tị ri ká la ẹlẹlẹhẹ ka ya ka aalẹ, tịtị ba keem kam mẹ ang jẹng chajị ká a ka jẹ ẹla.”