Read idege IJobu 34 Bible Online

IJobu 34 - idege bible

IJobu 34

¹Ọọwa, Elihu a yẹkẹẹ,

²“Ẹnwa alẹng ị-jẹ ẹla, anụ ke ụrụ wo ẹla nyam wẹẹ, anụ angị jẹ ẹla ịtụka ịịwa, anụ wo mẹ-ẹ.

³Anụ tị́ jẹ lẹ, ụrụ kaa ma ẹla ọlẹ ko wo yẹ, jaabwọ ká ọnụ à kaa jẹ ang oriri ọlịpyọ datị.

⁴Ahị wụlayẹ ịlịlọhị kahị jẹ ọlẹ kọ hiigu mẹ, āhị kpẹhị chịng kahị jẹ ịnya ọngọ hagụ kahị chị eje họọ mẹ.

⁵IJobu lẹẹ, ọwa ya ọwẹ nyị́ da ẹlẹlẹhẹ ka, Ohe Oluhye nyị yọwa chẹkpẹ ẹwụ, nọwa ang nyọwa ododu.

⁶Ọwa lịlọmwụ yẹkẹẹ, ‘Ḿ da ẹlẹlẹhẹ kpá kaka, ị tị wụrụm ọlọnọọkịla, akama nyam-ḿ la uda ọhọhọ kaka, ḿ tị jẹ ang onyobyi ọhẹ kam họ kpong-kpong ka.’

⁷“Anụ yẹ ụma nya ọngịnyị ọlala iJobu kpá ẹnẹnẹhẹ lẹ-ẹ́? Ọ hu ịlọmwụ gẹdẹẹ yẹhị da Ohe Oluhye bwee.

⁸Ọ ju ogu ẹdịyẹ ta angịnyị inyibyi, ọ yẹjula alọkwọ

⁹Ọ tị́ ya lẹẹ yẹkẹẹ, ‘Ọ ju apyobwuna ha ọngịnyị ehe nyọka maga nya irya nya Ohe Oluhye ọhọhọ ka.’

¹⁰“Anụ ke ụrụ lam wẹẹ, anụ jẹ ang. Iyachii kele ká Ohe Oluhye ka họ ang onyobyi, agụgụ á kaa họ ịngịngịhyẹ ọtịpyọ ka.

¹¹Ọọ nwụ ọngịnyị uri nya ang ọlẹ ká ọngọọwa họ, jaabwọ kọ pwoku ọngịnyị ọ kaa họ ẹ-ẹga nya ọngọọwa lẹ.

¹²Ịnyịlẹhị ọhẹ-ẹ́ ji gụ ọwẹ kaka, Ohe Oluhye-é họ ang onyobyi ka, Agụgụ-ụ́ ka jẹ-ẹ̀ chị eje chị ọkịrọrọ ẹnẹnẹhẹ ka.

¹³Oowo tị́ gụ Ohe Oluhye kpụ kọ ka hu Ohe Oluhye kpẹhị rịrị odehe? Oowo tị́ hu odehe rịrị kpẹẹkpẹẹ ene-è?

¹⁴Ó-ri kọ wa olegu nyamwụ wii, kọ tịrị ịhụ ọdada ọlẹ kọ ya ha angịnyị ẹkpẹ rụ bẹẹ?

¹⁵Ịnọ ang ọhịhị ọnyị myị ọnyị wuu ka gbu, angịnyị ehe ka tịrẹkpẹ ye ri ọrụ nya ọpyị.

¹⁶“Ó-ri kanụ jẹ ẹla tụbwọ aalẹ, anụ wo mẹ, anụ ke ụrụ wọ ẹla ọlẹ kam wẹẹ ya.

¹⁷Ó-ri ká eje ọkpakpa-á há Ohe Oluhye ka, ọ ka rị adịrahụ mị-ị̄ị́? Agụgụ ọlabwẹla ọnyịịla anụ byi ịlọnụ kanụ ka ya eje wu lẹ-ẹ́?

¹⁸Oowo dala Ohe Oluhye à tị́ byi adịrahụ ọhẹ myị yẹkẹẹ, ‘À ri ọngịnyị ohideeji lụmẹ pyiiì?’ Ọọwo dala ọwa-à tịị byi alihi myị yẹkẹẹ, ‘À chakpa ri ọlọkwọ lụmẹ?’

¹⁹Ọọ họ ẹla oye-oye ha laegbeju ka, ọọ chị oku ẹchụ-ọma ha alụdụ tụ alẹbyahị pyịpyị ka, chajị ọwa-à họ ọng myị ọng wuu lẹ.

²⁰Lẹhị ọ-mwụbiri ị ka gbu, lepwodu jijiiji ị́ gbu, ịnyaa myị kam, ọ kaa tụ angịtụka kịnyaa lịlọmwụ, ọngọhẹ-ẹ̀ dọọ ụbwọ ene ka.

²¹“Ohe Oluhye yẹ jaabwọ ká angịnyị juwa hịhị, ọ yẹ ọgụ-ẹpẹtẹ nya ọnyị myị ọnyị wuu.

²²Ẹga ochowu ọhẹ-ẹ́ ji ọlẹ ká owu ọchịchị ọlụwa lụmẹ kpụ ọ-ka jẹ-ẹ̀ kpụ angị họ ang onyobyi ịbaa hi Ohe Oluhye myị ka.

²³Ohe Oluhye-é chị ụka ọhẹ nọ datị ha angịnyị ehe nyọka kele kọ ka laa eje ka.

²⁴Ọ kaa pwọ alegbeju ọmwụ cheji, ọọ diro ọngọhẹ kaka dịrẹ ẹla nyaa ene ka. Ọ go angịkịla kwiwa chooo.

²⁵Ọ jẹ ụma nya ọhịhị ọlẹ kịị hị, Lẹẹlẹ, ọ daa ahị kụrụ eji, taa ayịreji lodu jijiiji.

²⁶Ọọ yẹ angị inyibyi akama u-ugbọdọda, chajị nya ang onyobyi ịlẹ kị họ,

²⁷chajị nyọlẹ kị tịrẹkpẹ hi ụgbẹyị nya Ohe Oluhye, gu ahị gboo hi ehile nyamwụ.

²⁸Ọhọhọ nyaa du ká alẹbyahị chị eko wụrụ Ohe Oluhye, ọ tị wo ẹkọ ọlẹ kị wẹẹ be bịlẹ ụbwọ ọdada bwu ẹga nyamwụ.

²⁹“Ó-ri ká Ohe Oluhye-é yẹ chịng, oowo tị́ ka kpọọ abyị myị-ị̀? Ó-ri kẹ yahị chị ọka, oowo tị́ ka yọọ ẹ-ẹpwụ ẹhị myị? ọ kpa angịnyị kpa ụ-ụbwọ, ọ kpa ụma lẹpwụ-lẹpwụ kpa ụ-ụbwọ.

³⁰Ọwa-à kaa da olegbeju oriri nya ọngọ jẹ Ohe-ka yi, chajị kọ ka kpa angịnyị kaka wu eri ka lẹ.

³¹“IJobu ee, à ya ịhọbịrị nyang je Ohe Oluhye, kpụ ā byoo ọwa nyị́ ka myịmyị-ị̀ họ ịnyị kaka-à wẹẹ lẹ-ẹ́?

³²À byoo nyị mẹ abyị nyọwa jọwa chajị kọọwa nyị ka myịmyị-ị̀ họ ịnyị kaka-á?

³³Ọlẹ ká pwa ẹla nya Ohe Oluhye deeji lẹẹ, à dahịhile ká irya nyang ahụ Ohe Oluhye à ka họ-ọ́? Ahụ à ka chụ ọlẹ kọ hang lẹ, aam koo, kịnyaa ká ya jehi ang ọlẹ ká jẹ mẹ.

³⁴“Angị lirya wuu ka myị jum, angị jẹ ẹla ịlẹ kị wo ẹla oyaya nyam ka yẹkẹẹ,

³⁵‘Ájẹjẹ-ka nya iJobu a wẹẹ kpọọ ya ẹla lẹ, ẹla myị ẹla ọlẹ kọ ya wuu-ú la egbeju ka.’

³⁶Á wụla ẹla myị ẹla ịlẹ ká iJobu ya wẹ gbee pwụ ọbaba, ẹla nya ọngịnyị onyobyi kpá cheri-cheri ọ wẹẹ ya.

³⁷IJobu, á họ ang onyobyi, à ya egbeju-ọngịrị ọlala bọọ u-uhye, à ya ẹla ba Ohe Oluhye a-ahị nyahị wuu.”