Read idege IJobu 35 Bible Online

IJobu 35 - idege bible

IJobu 35

¹Ọọwa Elihu à kịnyaa lẹla nyamwụ oyaya yẹkẹẹ,

²“IJobu ee, à me irya ká ẹlẹwẹ hiigu wẹẹ-ẹ́? À ya lẹẹ ya ọwa nyị la kpakpa ị-ịlahị nya Ohe Oluhye,

³à myịmyị byoo ya ọ-kpa ịlọwa cheji ba hi ọhọbịrị nyị́ ju apyobwun nya ịngịhyẹ họwa ka.

⁴M̀ jam ka wẹng ẹla tụ́ aligu nyang ịwẹ wuu lẹ.

⁵“Hu ẹhị nya hwaa ká uhye-ọgba ká yẹ wẹẹ, yẹ jaabwọ ká egbamwụ la uhye gidogboo kaka ba wẹẹ.

⁶Á họ ang onyobyi họ, ọọwa-á wọ Ohe Oluhye ugbe ụpẹnị-ụpẹnị ka, á họ ang ịtịpyọ bawụlẹ-bawụlẹ u-uhye, ọ họọ ịngịngịhyẹ kpong-kpong myị ka.

⁷Á ri ọngịnyị ọnyịịla lụmẹ wẹwẹ wẹẹ, ọọwa ri ẹnmẹ ká ye dọọ-ọ́? Ịyẹ kpong-kpong ọ tị́ ka tịtọ wẹ ụbwọ nyang-ǹg wẹ-ẹ̀?

⁸Angịnyị ehe ịlala ahụ kem ọhọbịrị nyang à ka hu akama ha lẹ, angịnyị-angịnyị à tị ka ye apyobwuna nya ọngịnyị ọnyịịla oriri nyang lẹ.

⁹“Angị ji ẹpwụ nya ụhị ọyẹyẹ kaa mwu eru, ịị chị eko wụrụ ọngọ la ọngịrị ka da ụbwọ myị.

¹⁰Ị́ tịị jahị kpata towo yẹkẹẹ, ‘Ohe Oluhye ọngọ họm-m họ, kọọ ya ahị ọdahile ham lụka olujwo nyam tị́ ji ale-è? ka.

¹¹Ịị yọyị ka ẹga nya Ohe Oluhye ọlẹ kọ họ kahị jẹ ẹla gụ iyo ileji balsa ịchịnụ ka.’

¹²Ị́ chị eko chị gboo, ọọ hwaa ujiji, chajị ị ri angịnyị inyibyi i-hi ọbọọchẹ.

¹³Ohe Oluhye-éè ke ụrụ la eguru ida ojeje ka, Agụgụ-ụ́ hwaa tụ ida ojeje nya nya ịngịhyẹ ka.

¹⁴“Ọọwa, ā me kọ ka dọnụ wẹng ahụ iJobu lẹ-ẹ́? À ya ọwa nyị́ yẹ Ohe Oluhye ka, godayị kpọọ-ọ̀ wẹ mẹ, ọ ka ya eje rụng kpá ā ka yẹ.

¹⁵À me irya ịnyịnyị nyori Ohe Oluhye-éè yẹ ọngọ họ ọhọbịrị akama ka, nyori ọ́ yẹhị rịrị e-eji nya angị họ ang onyobyi ka.

¹⁶Ododu nya ẹla ā wẹẹ mịla ya lẹ, ẹla nya ájẹjẹ-ka ā wẹẹ ya wuu lẹ.”