Read idege IJobu 36 Bible Online

IJobu 36 - idege bible

IJobu 36

¹Ọọwa, Elihu à kịnyaa lẹla ọyaya nyamwụ yẹkẹẹ,

²“Anụ ju ugbodu kanụ ya ụka da ham pyịnyẹng wẹẹ, chajị m la ẹla ọhẹ ọlẹ kam ka ya ẹla wọnụ nya Ohe Oluhye ju.

³M ka mẹ ang ọjẹjẹ nyam jẹng jaabwọ kọ ju ẹpwụ ka ba, m tị ka mẹjẹng jaabwọ ká ka jẹ ya Ohe ọngọ họm họ nyị ri ọlabwẹla ọnyịịla.

⁴Ẹla nyịlẹhị ọlam ọlam a wẹ kam wẹẹ ya tang lẹlẹ ọnọọkịla ọhẹ-lọhẹ á juwa kpá pyịnyẹng kaka bala ọ jịra-jịra kpẹẹkpẹẹ gụ wuu a wẹẹ ya ẹla tank lẹ.

⁵“Yẹ mẹẹ Ohe Oluhye lụmẹ-ụmẹ, ẹpwụ nya ọngịrị kpá kwahị ka, ma ọ tị yẹhị da ọngọ ookpokpo ọhẹ-lọhẹ bwee ka. Ịngịngịhyẹ a tị hyoo la ọjẹjẹ ka.

⁶Ohe á kaa myị angịnyị inyibyi kaa ryehe tata gbee lụmẹ ka, ma ọ tị kaa hu ang ọlẹ kọ pwọ ku ịkpẹhika haa.

⁷Ohe Oluhye á kaa tụ ẹhị ọ kpa rịrị nyamwụ rụ hi alabwẹla ọnyịịla ịlẹ kị jwoo ihi ka, ma ọ kaa ya iwe da haa ịkaa hụhụ juwa gbeji lala ịdịrịhụ bala ọ kaa hu ihi ọ lala ịdịrịhụ haa pyịyọọ gbe oyi myị oyi.

⁸Ó-ri ká alabwẹla ọnyịịla á juwa a-agba juwa yẹ akama, ká ịgbọgọlọ nya akama jwaa á bwọ bala ata,

⁹ụka ọọwa Ohe a wẹẹ mẹ ịhọbịrị nyaa jaa bala ịbachẹ ihihi nyaa lẹ.

¹⁰Ohe Oluhye wụrụ arụ nyaa da dodo, họ kị ke ụrụ la ọna ọdada nyamwụ lẹ ọ daa ọna byaa nyị hwabwọ la ang onyobyi ọhọhọ mẹ lẹlẹ.

¹¹Ó-ri kị myị ke ụrụ la Ohe Oluhye kị myị ẹrụ họọ, aalẹ ẹnụtụrụ ihi-ẹkpẹ nyaa ị ka ya ụya ẹpwụ nya ụdụ ọkpụkpụ ẹka ọ hi ẹkpẹ-ẹkpẹ nyaa ịla la okpunyi bala ịpyọ ọkpụkpụ nyang myị ang.

¹²Ma ọ tị ri kị myị ke ụrụ ka, ẹma nya ẹwụ ka taa ayịreji, ịka gbu la ọjẹ ang ọkpọmwụ ka.

¹³Angịlẹ kị jẹ Ohe Oluhye ẹpwụ ọkịlẹtụ nyaa ka, ka-a juwa kịlahị la agbama ọ juju. Ọ dọmwụ ri ká Ohe Oluhye á yaa akama, ịkaa myị-ị bịlẹ ụbwọ ọdada bwu ẹga nyamwụ ka.

¹⁴Ịkaa chị ukpo gbu jwọrị ụka kị ri anjwo ikolobya bala ịyẹẹnọ wẹẹ, ọọwa lẹ ọhịhị nya a myị ẹpwụ nya oyoyi lẹlẹ.

¹⁵Ohe Oluhye kaa mẹ ang jẹ angịnyị ehe bwula ọya iwe ká ịka yẹ akama.

¹⁶“Ohe kaa kpa akama mẹ ang jẹ angịnyị ehe? Ohe Oluhye kaa kpa akama chị angịnyị ịlẹ kị juwa yẹ akama da, ọ tị kaa kpa ọtụpyịpyị họ ka ụrụ nyaa wụrụ da dodo.

¹⁷Ohe Oluhye gbang kpehe bwu ẹpwụ nya akama. Kpang kele ka hụhụ ẹ-ẹga ọlẹ kọ ju ẹpwụ gbam ọpịrịng ju lụdụ bala ang iriri ụma ịlẹ kị hang myị tebwuru kẹwụ pyịyọ-pyịyọ lịngịngịhyẹ ọ ku iwe kaka lẹlẹ. (Lee)

¹⁸Ohe Oluhye ye akama nyang wuu kpa rụ lẹ ọ hu ang myị ang ịlẹ kị hang wuu hang ku ọmwakpa nya akama ọọwa lẹ ọ họ ká tebwuru nyang myị la ụma nya ang iriri ịlẹ kị kpụ ụdụ lụmẹ lẹlẹ.

¹⁹Ma lẹẹlẹẹ a tị wẹẹ ye akama yẹẹyẹẹ jaabwọ ka angịnyị inyibyi ịkịla kaa yẹ lẹ. Ọọwa lẹ Ohe Oluhye a ye eje wung wẹ yẹng akama ọlẹ ká a ka jẹẹ be hi akama ọọwa ọlẹ kọ-ọ hu hang myị kaka.

²⁰Kpahị ju ịlọng ká dụmwọ dụmwọ, ịkẹjẹ awụrụ nya Ohe juwa a myị ká ụdụ ọ kpụkpụ bala okpoko a kpang hwahị ka. A tị myị ká angịnyị a bịrịng lokpoko ojwikiri ọ-ọkpa wang ka.

²¹IJobu eko ọchịchị nyang á la ịka chwọọ pwo ku ịngịngịhyẹ ọlẹ kọ ka dang ụbwọ bwu ẹpwụ nya ang oluhihi myị lẹẹlẹẹ ka. Ụdụ ọkpụkpụ nyang á ka lọngịrị ju ịngịngịhyẹ ọnyịịla họ hang myị ka. Ọngịrị nyang ọlẹ ká la kpá wuu lụmẹ kahị ka wẹẹ, á ka dang ụbwọ ụka ọlẹ myị kaka.

²²“Yẹ mẹẹ, Ohe Oluhye luhye gidogbo ẹpwụ nya ụmụmẹ ọlala, ọ myị lọngịrị pwẹẹpwẹẹ. Oowo a tị ri ọngọmẹjẹ lala ọwa? Ọngọhẹ á ji ịnyị ka.

²³O-owa a tị mẹ ụgbẹyị jẹ Ohe jaabwọ kọ ka bwu họ ang? Ọ-ọngọngọhẹ ka. Oowo à tị́ ka lọngịrị byi Ohe Oluhye yẹkẹẹ, Ohe a chakpa họ ang tịpyọ lụmẹ wẹẹ? Ọngịnyị ehe ọhẹ a ji ịnyị ka.

²⁴iJobu á kpịtịya ká hu Ohe hwaa ka uhye logbo ogwogwo, chajị nya ụkụrwọ nyamwụ ịlẹ kọ họ hahị wuu, ịlẹ ká angịkịla kaa kpa mwu eje gwogbo họọ mẹ.

²⁵Ọng myị ọng wuu yẹ ụkụrwọ nya Ohe Oluhye ịlẹ kọ họ ma ịtị yẹ ụkụrwọ nyamwụ kpá hwẹẹẹ bwu ẹga ọlụrụ nyịlẹhị ịlẹhị.

²⁶“Yẹ mẹẹ, Ohe Oluhye ri ọtụka bala ọ hye hye lụmẹ ka kpoye, ahị lọngịrị ka jẹẹ chaabwọ lee jẹ jaabwọ ká ọngịrị lụmẹ ka ba myị ka. Ọngịnyị ehe ọhẹ-lọhẹ a lọngịrị ka jẹẹ bwuru ẹka ogugu nya Ohe Oluhye dodehe myị kpá ẹnẹnẹhẹ kaka.

²⁷Ohe Oluhye a gbile enyi ba ịlọmwụ ka uhye, ọ kụ ụwa myịmyị yaa latẹ nya enyi ododo lẹ. Ọ waa lala ịtinjwo lẹ ọ daa wụrụ wụrụ lẹ, ori enyi ododo lẹlẹ.

²⁸Ohe Oluhye tụbwọ hi enyi bwu uhye nya egbamwụ warị we ịpyị bwọọọ mwụ aba ba lẹ, enyi a do ha angịnyị ehe ẹga myị ẹga lẹlẹ.

²⁹Ọ-ọwaà tị́ ka lọngịrị jẹ ụgbẹyị ọlẹ ká Ohe Oluhye bwu pyẹ egbamwụ maa, myị-ị lẹẹ, jaabwọ kaa chịpwụrụ chị uhye-ọgba eku myị-ị? Oowo à tị́ ka ya jaabwọ ká apya kaa chị chegbamwụ eku, ká ịkpala kaa kpụ tọọ da bwu ẹpwohe ẹ-ẹga ọlẹ kọ kụ ẹpwa myị-ị? Ọngịnyị ehe ọhẹ a ji ịnyị kpong-kpong ka.

³⁰Yẹ mẹ, Ohe họ ká ẹjwọ nya ịkpala nyamwụ chịpwụrụ tụ egbamwụ da wuu. Ọ hu ukpowu ke ọmwụ nya Ihu ịtụka kpaa ịbaa, lẹ ọtụbwọ hyaa laa chị ọwu kpịlẹẹ rụwa lẹlẹ.

³¹Chajị jaabwọ ká Ohe bwu kpa ẹpwoja ịlodehe wuu, lẹ ọ họ ká ang iriri dịda kpọchọkọọ du kị la ang iriri mwụ aba ba a wẹ lẹlẹ.

³²Ohe Oluhye kaa wu ịkpala pyẹẹ kpa a-abwiye-abwiye nyamwụ doo ẹrụ kaka kpụ ang.

³³Arụ ogugu nya Ohe mẹjẹ ukpenyi juwa wẹ, ịna ri ịna, ị jẹ enyi nyị ji ọnaabwọ lẹ.