Read idege IJobu 37 Bible Online

IJobu 37 - idege bible

IJobu 37

¹“Iru nya igbachịwụ okuuu du kam ju uhi ọkịlẹtụ nyam du kpuukpuu.

²Anụ angịnyị wuu anụ ke ụrụ lomyi nya Ohe Oluhye ọlẹ kọ kpa ẹla ta ikpala bwu ọnụ nya ịlọmwụ jaabwọ kọ họ iru mẹ.

³Ọọ chị apya u-uhye-ọgba kpowu, ahịgboo nyamwụ kaa bwu ọbaba nya odehe ọhẹ ka ọkịla.

⁴Ụka ká omyi nyamwụ á kam kpá, ọ kaa kpa omyi olihihi nyamwụ ọnyịịla ọwẹ kpụ ikpala lọngịrị ọngịrị ụka ọwẹ ọkaa wu apya ọchịchị kpa ụka ka kị wo omyi nyamwụ ka.

⁵Ohe Oluhye kaa kpa omyi nyamwụ kpụ ịkpala lẹbyẹbyị lẹbyẹbyị ọ kaa họ ang ịtụka ịlẹ ka ejiri kaa weji ọlẹ kahị jaa ya kpa myị ka.

⁶Chajị ọ kaa da ekpawẹ ehile nyị do chị wẹ odehe mẹ ọ kaa byi enyi nyị do mẹ ukpenyi a kaa do ọtụka-ọtụka kpá chị angịnyị egbija lẹlẹ.

⁷Ọ kpa ụkụrwọ nya angịnyị ehe ịlẹ kị họ kaka bwẹnggbẹ dayị rịrị ekilo, chajị ká angịnyị ka mwụ ịnyị kị tị ka jẹ ụkụrwọ nyamwụ.

⁸Ụka ọọwa lẹ iyo ịnyịịngịrị ịlẹ kị ji ẹpwamẹ akaa rụ ju ka ẹpwụ nya agbụ bala ajẹ nyaa lẹ, ịkaa hi juwa hi ịgbachịwụ ịtụka lẹlẹ.

⁹Igbachịwụ ọtụka kpehe bwu ube nyamwụ, ọhụ da pileleele kpa ohu ọhọh warị.

¹⁰Ọhụ ọchị pwuu nya Ohe Oluhye họ ká enyi chị ẹjwọ, enyi ịlọ̀bá bala ihu chị ẹjwọ kpọnchị.

¹¹Ọ họ ká enyi myị̀ egbamwụ pwẹẹpwẹẹ lapya chị kpowu-kpowu.

¹²Egbamwụ juwa jẹ dagaga ju jaabwọ ká Ohe Oluhye ya. Ịị họ ang myị ang ká Ohe Oluhye daa ehile ẹ-ẹga myị ẹga nya odehe olẹ wuu.

¹³Ohe kaa do enyi nyọka ya enyi ju ọpyị, lee nyọka yẹhị akama, lee nyọka họhị ọnahị.

¹⁴“IJobu ee, wo lẹẹ wẹẹ, chịkụ chịng ká me irya nya ụkụrwọ ẹbyẹbyị nya Ohe Oluhye ịtụka ịlẹ kọ họ wẹẹ.

¹⁵“IJobu, ahụ ayịdang jẹ ụgbẹyị ọlẹ ká Ohe Oluhye bwu họ egbamwụ kị wẹẹ jẹ pyị dagaga juu? A jẹ jaabwọ ka Ohe da ehile ọlẹ kọ họ ka apya wẹẹ chị hwo-hwo-hwo tụ egbamwụ da-a?

¹⁶A jaabwọ kọ họ ká egbamwụ godayị rụụwa uhye ọgba kpọọọ kpá pyị gile ka, ụkụrwọ ẹbyẹbyị ọ lahị bwu nya Ohe Ọngọlẹ kọ jẹ ang wuu kpẹẹkpẹẹ myị?

¹⁷E-ehe, ụka ká ịgbachịwụ ọlẹ kọ da bwu oye ediyii á chịla kpakpaakpa lụmẹ lẹ, ịwụrụ ịkụrụ-kụrụ nyang a ka yẹng akama la ọ chịpwuu lẹlẹ.

¹⁸iJobu a ya ká lọngịrị ka da Ohe Oluhye ụbwọ pyẹ egbamwụ maa rụwa u-uhye-ọgba họọ lọọ lọngịrị lala ịnyọ myịị?

¹⁹“Mẹ jẹhị jaabwọ kahị ka bwu ka ẹga nya Ohe ka ya ẹla tọọ mẹ iJobu, chajị ahị angịhyẹ wẹẹ ahị ri alidu kpá chwiichwii ẹ-ẹpwụ nya olegu.

²⁰Ọngọhẹ á ka pịrịm ju nyọka ya ẹla ta Ohe ka. Ee, kị kele ka byi Ohe ya am nyị tịtọ nyọka ya ẹla tọọ. Anụ ya ká ọngọhẹ chị uchi am odehe ọlẹ ká igu ogbugbu mọọ-ma kpụ ọka tịtọ ká Ohe Oluhye ka nwọọ ta ayịreji?

²¹Ụka ọhẹ juwa ká ahịgboo nya ẹnụ a ji kpata kẹkpẹ nya egbamwụ ẹga kọ chị owu, ka igbachịwụ a tụ egbamwụ rụ hi ahịgboo, ọngịnyị á kaa yẹ ẹhị rịrị ahịgboo ịluhye nya egbamwụ ịjịga-jiga da myụrụ myụrụ ịwa myị ka.

²²Bwu oye nya ẹtẹ ụhị ọhaha nya okpoko ịgọm a kaa kpehe pwọọ lẹ, ịnyịnyị Ohe Oluhye a kaa kpehe bwu ẹtẹ lahịgboo kụrwọọ awụrụ la ụhị ọhaha lala okpoko ịgọm ọlẹ kọ la uhihi lẹ.

²³Ọngịrị nya Ohe Agụgụ lụmẹ ka kpoye ahị lọngịrị ka tụ jwọọ chwẹẹ lee wọọ ọyị ka, ọ myị la eje nya abwẹla ọnyịịla ọ lala lụmẹ Ó-ri ọlabwẹla ọnyịịla mwụ aba ba.

²⁴Chajị nya ọọwa a du ká angịnyị ehe wuu ju uhi nyamwụ ẹga myị ẹga lẹ. Chajị ọ ke ụrụ la angịlẹ kị pịrị ịlaa ju ẹpwụ ọkịlẹtụ ịwa nyị jẹ ẹla lụmẹ wẹẹ ka.”