Read idege IJobu 38 Bible Online

IJobu 38 - idege bible

IJobu 38

¹Ọọwa, Amkpaa-à wẹ iJobu ẹla bwu ẹpwụ nya ugbochịrị yẹkẹẹ,

²“IJobu ee, oowo ā tị́ ri nyọka da ẹla ọjẹjẹ nyam uya lehwo nya ala ịlẹ ka wẹẹ ya ene-è?

³Aa kụ giri-giri nya ọlẹng-ọlẹng mẹ, m̀ wẹẹ ka tọng ịtọ lẹ, aa wẹm jaabwọ kam ka tọ kaka ba mẹ.

⁴A juwa ụka kam da ọmwụji nya odehe ọlẹ-ẹ́? À tị́ jẹ ang lụmẹ lẹ, ya kam wo mẹ.

⁵Á ka dayi lọjẹjẹ kaka, tị ya kam wo wẹẹ, oowo me ẹpwụ ojuju nya odehe ọlẹ? oowo tị́ dori nya odehe ọlẹ?

⁶Ale ị tị ya ịtachị i-wu odehe kpa yi eji? Oowo tị́ ya ẹjwọ ọlọtụpịrịhyo nyamwụ ju eji

⁷ụka ká ịdịchụ nya ewu-ụtụrụ juwa mwu eje lawụlẹ, ká alegu-ẹrụ da iwuru nya ọkẹkẹnị?

⁸“Oowo tị́ tụ ogirigba nya ihu ku nyọka wu enyi kpa, ụka kọ gba kpehe pwurum bwu ẹpwụ nya ọpyị?

⁹Am à ya egbamwụ kụrụ ihu, ya ukpowu daba rọọ mẹnẹ-mẹnẹ lẹ.

¹⁰Am à hu ọbaba nya ihu nọ, da ụgbẹyị chọọ kọ ka kpoye nya ụwa kaka lẹ.

¹¹M̀ byi ihu yẹkẹẹ, ‘Ẹgẹlẹ mẹ ịnyị. Ā mwụ kpoye nya ẹgẹlẹ koko, ẹga ká ka gu agbụ ba à lẹẹ ịnyịnyị lẹlẹ.’

¹²“IJobu ee, mwiiji nyọlẹ kị mang, à da ahị ọpyẹpyẹ ehile ya nyị pyẹ mẹ, lee o-byi alụtụrụ ya ụka nyamwụ nyị họ lẹ, kpụ ị jung ihi ẹnẹhẹ lẹ-ẹ́?

¹³À da ahị ọpyẹpyẹ ehile ẹnẹhẹ byoo ya nyị há hwooo pwụ ọbaba nya odehe, ká angịnyị inyibyi nyị ye ẹga kpịbaa u-ukpowu ka jẹ lẹẹ-ẹ́?

¹⁴Ahị ọpyẹpyẹ họ ká ikiti bala ẹga ọkpọọ la gede-gede, lala ugbọọnụ ọmwụba nya awụrụ ịna oluhye nya ume.

¹⁵Ahịgboo kaa chị angị inyibyi ochuchuu, ọ du kị jẹ-ẹ̀ họ ang onyobyi nyaa ka.

¹⁶“IJobu ee, à jẹ pwụ ụgbụ ịlẹ ká enyi nya ihu kaa kpehe bwu yẹ lẹ-ẹ́? À jẹdịyẹ lẹpẹtẹ nyang bwu ọpyị olekpelji nya ihu ọtụka ẹnẹhẹ lẹ-ẹ́?

¹⁷À jẹ ogirigba nya igu-ú? À jẹ ọnang o-bwu ka ẹpwu nya ukpowu okpẹmkpẹm-ḿ?

¹⁸À jẹ jaabwọ ká odehe la gbamgbam kaka ba-á? Á jẹ lẹ, à ya jem mẹ.

¹⁹“Ale ahịgboo à kaa bwu kpehe? À jẹ ẹga ká ukpowu nọ ẹpwa-á?

²⁰À ka jẹ-ẹ̀ kpa ahịgboo bala ukpowu ụgbẹyị ka ẹpwa nyaa-á? À jẹ ụgbẹyị nya ụwa-á?

²¹À ka jẹ myị, chajị ị tị́ mang ene nya ụka nyaa, á ri ọngịnyị ọlalẹ kaka.

²²“À jụ ka ẹpwụ nya ukuna nya ekpawẹ ihule-hule ẹnẹhẹ lẹ-ẹ́? À yẹ ẹga kam ya ekpawẹ ju ụjị-ị́?

²³M̀ taa guru gbe ẹnụ nya ẹla, gbe ẹnụ ká uya bala ẹwụ ka da.

²⁴Ale ahịgboo à tịị kpehe bwu? Alẹ igbachịwụ ọlọmwụ-ụtụrụ à tịị kaa da bwu?

²⁵“Oowo tị́ da ụgbẹyị ọlẹ ká enyi ododo ka bwu? Oowo tị́ da yẹ ọgụ ọlẹ ká ịkpala ka tụda?

²⁶Oowo tị́ do enyi ẹ-ẹga ká angịnyị á kụ ka, u-ugbileji ọlẹ ká ọngọngọhẹ-ẹ́ ji ka?

²⁷Enyi tị́ bwu ale ka ọpyị ọchọhụ kwangga, du ká amẹ dọmwụ nya ọ-ka bwubwu?

²⁸Enyi ododo la adịda-á? Oowo tị́ ri adịda nya amwụ ọkpụkpụ?

²⁹Oowo tị́ kpa ẹpwụ ma ẹjwo nya enyi? Oowo tị́ ri ịnịna nya owiri-wiri ọlẹ ká ohe kaa họ?

³⁰Enyi ọọwa chị ẹjwọ kpọnchị lala ẹjwọ, du ká uhye nya ugbenyi kaa nune kịtọchịị.

³¹“À ka jẹ-ẹ̀ chị ịdịchụ ịPịlayedisi ori bawụlẹ-ẹ́? À ka jẹ-ẹ̀ yi ịdịchụ Oriyọn ori hi awụlẹ myị-ị̄ị́?

³²À ka jẹ-ẹ̀ kpa ịdịchụ ụgbẹyị lụka ọnyọnyọọnyị myị-ị̄ị́? À ka jẹ-ẹ̀ ya je ịdịchụ ịBẹya ịtụka bala ichiche ẹga kị ka ji-í?

³³À jẹ ehile ịlẹ kị wu uhye-ọgba kpa ụ-ụwa-á? À ka họ ehile ịlịnyị họ ụkụrwọ am̀ odehe myị-ị̄ị́?

³⁴“À ka jẹ-ẹ̀ dakọ gboo ya ẹla ta egbamwụ, kị ka do enyi hụng myị-ị̄ị́?

³⁵À ka jẹ-ẹ̀ byi apya nyị chị mẹ, kpụ ọ ka wẹ kaka cha arụụ eji hang, bying yẹkẹẹ, ‘M̀ lẹẹ lẹ, ayịbam-ḿ’?

³⁶Oowo tị́ ya ẹla ọjẹjẹ ju ọngịnyị ọ-ọkịlẹtụ lee ọ-ya ang ọjẹjẹ ju ọngịnyị i-irya?

³⁷Oowo tị́ jẹ ẹla kpụ kọ ka jẹ-ẹ̀ wa egbamwụ họhẹ heeye myị, kọ ka jaa kpata kpụ kị ka do enyi myị,

³⁸chajị ká ekuruwa ka yẹ lịwa mọngọ-mọngọ myị?

³⁹“À ka da urwe nya ang oriri ha ugbẹbẹ, ká agba nya ugẹbẹ ka ye ang ri wu ẹpwụ

⁴⁰ụka kị kpịbaa ụgbụ nyaa, lee ọ-kụ ịnya ụ-ụwa uku nyaa myị-ị̄ị́?

⁴¹Oowo tị́ kaa ya ang oriri ha ipyeekpo ụka kị juwa ga limyi kpaa nwụ, ká anyị nyaa-á juwa chị eko nya imyị jum-m̀?