Read idege IJobu 39 Bible Online

IJobu 39 - idege bible

IJobu 39

¹“À jẹ ụka ká ịmwụ ịlịgbọdọ kaa ma anyị-ị́? À yẹ ụka ká apyị kaa ma anyị-ị́?

²À jẹ jaabwọ kịị jẹnyị tata ka ba ene kị ka ma anyị-ị́? À jẹ ụka ọlẹ kịị ma ọnyị kpangga-á?

³À jẹ ụka kịị hiri bọdọọ ya arụụ kụ eji ene kị ka ma ọnyị nyaa-á?

⁴Anyị nyaa kaa nwa, ladịrẹ nyaa ya gbonggbong ẹ-ẹpwamẹ, ị́ rụ lẹ, ị́ tụtụm kaa nyà tịrẹkpẹ kaka.

⁵“Oowo tị́ họ ká ibyiyó ịlẹpwamẹ la ịlaa? Oowo tị́ yaa ori da kị la ịlaa juwa ga ri?

⁶Am à ya ẹpwamẹ haa kọ ka ri ẹpwa nyaa lẹ, kị ka kụ ụteeji ịlịma lẹ.

⁷Ịị ri hwẹ̀ẹẹ hi ọmọnyọ olepweji, ọngọngọhẹ-ẹ́ẹ̀ mwaa lala iyo ịlẹpwa juwa kpaa họ ang ka.

⁸Ịị ga tụ ịgbọdọ da juwa tịtọ nya ang oriri, ẹga kị ka ye apwụ bala amẹ ri.

⁹“IJobu ee, ẹna ọlẹpwamẹ ka myị aa mwọọ kpụ ọ-ka myịng ẹrụ-ụ́? Ọ ka myị-ị̀ hyehe ẹ-ẹpwụ nya iku nyang-ńg?

¹⁰À ka ju ọhẹ nyaa ori kpa wu ẹrụ myị-ị̄ị́? À ka tọọ tutu kaka wu ẹrụ hang myị-ị̄ị́?

¹¹Ẹna ọlẹpwamẹ la ọngịrị kpá odu ịnyị, à ka dahịhiloo, ya ọkịlẹtụ nyang nịrọọ kọ ka họ ụkụrwọ ọnyọọngịrị nyang hang-ńg?

¹²À ka dahịhile ọnyanya nyamwụ wẹ ẹpwa nyang, kpụ ọ-ka kpa ang-ẹrụ nyang nyà bwu ẹga kị rwaa-á?

¹³“Ọgbangkịrọ nyi achwọ kpakpaakpa lọngịrị-ọngịrị, ọ́ tịị há lala ọchịnụ-enyi ka.

¹⁴Ọgbangkịrọ-ọ̀ da eji gurụ ị-ịpyị, pẹ hyaa ká ịpyị à ka kpaa chị ila gbigbiigbi.

¹⁵Ọ́ jẹ kpá kpong-kpong ya ọngịnyị, lee iyo ọlẹpwamẹ nyị ka baa ene myị ka.

¹⁶Ọọ kpa anyị nyamwụ nmaanmaa lala ọwa nyaa maa ka, Ọ́ ryoo ẹla ó-ri ká abwọ-akama nyamwụ-ụ́ ri ododu ka.

¹⁷Am Ohe Oluhye a ya ẹla ọjẹjẹ too du kọ jẹ ka lẹ, ḿ gọọ ang ọjẹjẹ-ka.

¹⁸Ọ́ tị yẹta gu ụnyẹ ọrụrụ alẹ, ụnyịrẹ bala ọngọ kwọọ kụ á tị ka yọọ ẹ-ẹhị ka.

¹⁹“IJobu ee, ahụ a ya ọngịrị ha anyịrẹ du kị la ọngịrị ịịwẹ lẹ-ẹ́? Ahụ à ya adu jwaa ụ-ụkpụrọkọ huru-huru lẹ-ẹ́?

²⁰Ahụ à họ anyịrẹ kaa gbajị chirom-chirom lala ịyịrị, juwa chị uhi ju angịnyị lịhụ ọ-chị hụụhụ̀ụhụụ nyaa lẹ-ẹ́?

²¹Ị gba chị eji kwangkwang ọ-ọkpọọ, wuleji pwururu yahị da ka ọgbẹwụ lọngịrị nyaa.

²²Anyịrẹ ịịwa kaa hụlọ ahụ ju ang iluhihi chajị ịngịngịhyẹ-ẹ́ laa uhi-uhi ka, ịị ju uhi, rụ ụnyẹ tịrẹkpẹ hi ẹwụ ka.

²³Ịcha ịlẹpwụ nya agburuku juwa họ anụ chịka-chịka, ụwangga bala ọkpachị juwa ye hwoóhwòohwoó.

²⁴Anyịrẹ che gwọnggwọnggwọng kpa achụ wụ ịpyị hụrwa-hụrwa, ị chọnjịra yahị da ọgbẹwụ ụka kị wo opyike nya ẹwụ.

²⁵Ị́ wo opyike, ị kpa okwinyi tọ oru, ị́ pwụ ọgbẹwụ pwụ lẹka, ị tị wo oru nya ẹwụ hwẹ̀ẹẹ, ị wo ịkata ọkpụkpụ nya alegbeju nya angịdẹwụ.

²⁶“IJobu ee, ahụ a mẹjẹ ụpa jaabwọ kọ ka hụ̀, ụka kọ pyẹ achwọ nyamwụ maaa yahị da ka edii lẹ-ẹ́?

²⁷Ahụ à da idu ehile du kọ kaa kpa awụ nyamwụ ka nọ uhye nya ịgbọdọ lẹ-ẹ́?

²⁸Ọ kpa ẹpwa nyamwụ ka nọ u-uhye nya ajwọ, achinege nya ajwọ ri ube ọnyọọngịrị nyamwụ.

²⁹Ọọ yọyị bwu ẹga ogedee ọwẹ kọ kụ, juwa kpa ẹhị pịlahị nya iyo ọlẹ kọ ka wu ri.

³⁰Anyị nyamwụ kaa nwà ịwọ, ẹga ká ogu nya iyo-ó ji ā yọọ lẹ.”