Read idege IJobu 4 Bible Online

IJobu 4 - idege bible

IJobu 4

¹Ọọwa, Elifasị ọla ịTẹman ọlẹ kọ ri oligu nya iJobu à wẹ byi iJobu ẹla yẹkẹẹ,

²“Ḿ ya m̄ ya ẹla tang mẹ, ọkịlẹtụ ka wụng ẹjẹ gụ olene-é? Ḿ ka yọnụ nyam bawụlẹ myị kokoo.

³Ahụ ọngọ mẹ ẹla jẹ iru nya angịnyị, à da angị la ọbaba ụbwọ,

⁴Ẹla ọlọnụ nyang wu angịnyị kpa, du ka angị juwa hwahị godayị kpakpa, angị dẹwụ-dẹwụ dayị giri-giri.

⁵Tị yẹ wẹ-ẹ̀, akama wẹ chịng ọgụ lẹ. Á ju ugbodu myị kaka, ọ ji uhye uhye nyang ugbẹnyị lẹ, ọkịlẹtụ kpụng enyi lẹ.

⁶Á ju ihi nya Ohe Oluhye ịnọ á ka la ahị ọdahịle ka-á? Á hịhị kpẹẹkpẹẹ ịnọ ọọwa-á du ká la ẹhị ọrịrịị-rịrị ka-á?

⁷Gbè wẹẹ̀, ọlabwẹla ọnyịịla ọhẹ ta ayịreji ẹnẹhẹ lẹ-é? Ọngọ kpẹẹkpẹẹ ọhẹ ri enyi gu-obyi ẹnẹhẹ lẹ-ẹ́?

⁸Ẹla ọlẹ kam yẹ-ẹ̀ wẹ wuu lẹ, angị ya ang onyobyi tọ kaa wụ ang onyobyi ọọwa-ọọwa tịrẹkpẹ.

⁹Ohe Oluhye-é chị ịhụ pwuu, ịị ta ayịreji. Ọ da igbachịwụ nya agbama nyamwụ, taa tuu hụrụ.

¹⁰Ị ka hwọnụ, juwa warụ lala egabẹ ịnyịịngịrị myị, Ohe Oluhye tịị wo angịrị nyaa bwula ọ-táa ọnụ ku.

¹¹Egabẹ ịnyịịngịrị-ị́ ye iyo wu ri kaka lẹ, ị gbu hụrụ lẹ. Anyị nyaa nyí epepe rụ wuu.

¹²“Ẹla ọhẹ kpụm ẹpwụ ịbaa-ịbaa jam, Ị chịm ayị nya ọọwa kwiii.

¹³Lụka nya une ọ-nọ pyịịị lepwodu, ẹla ọọwa wẹ lala ụlaa kaka chịm ahị-une.

¹⁴Uhi ọtụka-ọtụka jum, m̀ hụ́ kpákpaakpa, ekpinegu nyam hụ́ chwẹkẹ-chwẹkẹ.

¹⁵Ọhụ wẹ kaka dam a-ahị pilele, Egbe-ihu go gurum.

¹⁶Ọhụ ọọwa ba táaa lẹ, m̄ yẹ ịngịhyẹ godayị rịrị ụ-ụwa yuuu lẹlẹ. Ḿ tị jẹ ang ọọwa ogu datị ka. Eji chị nyóoo lẹ, m̀ tị wo omyi ọhẹ kọ yẹkẹẹ,

¹⁷‘Ọngịnyị ehe ka jẹ-ẹ̀ ri ọlabwẹla ọnyịịla ị-ịlahị nya[3] Ohe Oluhye-é? Ọ ka jẹ-ẹ̀ la charị-charị ẹ-ẹga nya Ọngọlẹ kọ họọ họ myị-ị́?

¹⁸Angị ri anchẹ nyamwụ ilepwoohe riri lẹ, Ohe Oluhye-é dahị hilaa ka. Alegu-ẹrụ ri alegu-ẹrụ, Ọ ye abyị kpaa.

¹⁹Ee lẹ, angị ri ẹkpa-ọpyị, ká ọpyị-ọpyị ị kpa dọmwụ uji nyaa, kịị gbu pwụrẹrẹ lala ibiritete, Ohe Oluhye à ka dachichi dahịhile lẹ-ẹ́?

²⁰Ọngịnyị ka jam lụtụrụ, ọ tị ka gbu ene nya obyi myị, ịnyamwụ myị pyịyọọ la ọjẹjẹ ka.

²¹Ị́ hwoo ụtẹ-ẹgbọng lẹ, ọọ gbu lẹlẹ. Ma, ọ́ tị jẹ ẹlẹlẹhẹ ka.’”