Read idege IJobu 40 Bible Online

IJobu 40 - idege bible

IJobu 40

¹Ọọwa, Amkpaa-à byi iJobu yẹkẹẹ, “IJobu a ka ba la ọ-bá ẹla tam am Ohe Oluhye Agụgụ lẹ lee à tị́ la ka wẹ wẹẹ?

²Ó-ri ká juwa ka lam eje nyọka ye abyị ọkpụkpụ nyam am Ohe Oluhye Agụgụ lẹ, aalẹ a tịtị wẹ ịtọ ịlẹ mẹ-ẹ̀.”

³Ụka ọọwa, iJobu a wẹ Amkpaa lẹ, ọ yẹkẹẹ,

⁴“Am ọngịnyị o-ju la ẹlẹlẹhẹ ka ọlẹ, ẹla-ịyẹ m tị ka la jẹ-ẹ̀ wẹng? M yụbwọ kụrụ ịlọm ọ-ọnụ lẹ.

⁵M ya ẹla myịmyị ma ya lẹ, ḿ ka myịmyị ya gụ ọwẹ kaka.”

⁶Ụka ọọwa, Amkpaa a wẹ iJobu ẹla bwu ẹpwụ nya ụgbọchịrị ọtụka-ọtụka lẹlẹ.

⁷Nwụla ịlọng nọ lala ọlẹng ká tụ ugba pịrị ọhụ mẹ. M juwa ka tọng ịtọ lẹ ká ka wẹm mẹ.

⁸iJobu, ọọwa ri a myị kwẹẹ ịlẹhị ya am nyị ri ọngọ họ ẹla tịpyọ lẹ, ahụ a ri ọlabwẹla ọnyịịla lẹ, ịnyị ka le?

⁹A lọngịrị lala am Ohe myịị? omyi nyang kpụ ịkata lala ịkpala jaabwọ ká omyi nyam kaa kpụ myịị?

¹⁰Ori ịnyị lẹ tụbwọ aalẹ kele ká họ ịnyangga la ogbo nyang bala okolobya ọrụrụ nyang, ká họ ịnyangga la ihihihi ọlala bala ụmụmẹ nyang mẹ.

¹¹iJobu du ukpenyi nya agbama nyang kpehe mẹ, ká kpehị dịrẹ angịlẹ wuu kị ji iwe-ahụrụ oluhye gidogboo juwa hi ọbọọchẹ ká pwọ angị lịnyị kpuru wẹ eji bẹdẹẹ mẹ-ẹ.

¹²Ẹla nyịlẹhị, kụ ehị yẹ angịlẹ wuu kị kpa ịlaa ka uhye lọbọọchẹ ohihi ká pwaa kpuru. Angịlẹ kị byi ịlaa ịwa nyị ri angị ịtụka myẹ gurwọjọọ, taa wẹ eji kị me ịlaa ang ihi cheeji ju apyobwuna ka.

¹³Jwaa eji ká tụ ụgbẹyị kwaa e-ejegu ụ-ụwa ẹpwụ ukpowu odehe nya angị gbugbu mẹ.

¹⁴Ụka ọọwa lẹ aalẹ am Ohe lịlọm a ka gwo-ogbo hang nyori a ri ọngọ ọtụka, M tị ka myị jung nyori ọngịrị nya ịlọng a kpa kụrụ lẹ.

¹⁵Chị ẹhị ka yẹ lẹẹ, me irya ju iyo ịtụka lala Inyi-enyi anyị wẹ, jaabwọ ká am Ohe họng, ịnyịnyị m họọ lẹ, Ọwẹẹ chị amẹ bala apwụ ri lala ẹna.

¹⁶Yẹ mẹ nyamwụ ọlẹ kọ la ji egbata, ọngịrị nyamwụ tị juwa ẹpwụ nya ekpiiji ịla ugbẹpwụ nyamwụ

¹⁷Ọ kaa wule ọgbẹ ọkịhụ nyamwụ eji kọngbọọ (kịrọgbọọ)? lala okoji nya isida ọla iLibanọn, Ekpiiji ilegbata nyamwụ a wu ekpinegu nyamwụ kpa lẹ.

¹⁸Ata nyamwụ la ịngịrị lala ije ịlẹ kị bwuru iwa ká enyi kaa nya kpehe taa da, ekpinegu nyamwụ la ịngịrị lala ọgọdọ nya ojooje.

¹⁹Inyi-enyi ọwẹ ri ịngịhyẹ nya ọgbanyẹ ọlẹ kọ ri olegbeju bala ọ lụmẹ iwe-ahụrụ gụ ang ịkịla wuu ẹpwụ nya Ohe Oluhye lẹlẹ. Ohe Oluhye ọngọlẹ kọ họọ ụbwọọmwụ a ka nwọọ myị lẹlẹ.

²⁰Ang iriri da-ida myụụwa u-uhye nya ịgbọdọ họọ ịlẹ kọ juwa ri, ụka ká iyo ịlẹpwamẹ ịnyịgịrị ịkịla juwa kọ ayịlọ.

²¹Ọ kaa rụ kele ka mwụ ịnyọ e-ekpeleji nya ekeji ilẹjwo, ọ kaa kpụ ịlọmwụ ịbaa ẹ-ẹpwarịrị nya ègo ị-jụ ịcha iluhye gbọnggbọng ịlụwa ẹga ká enyi ju ịwa.

²²Amẹ ilejwo bala abegu ịlọnụ ogo kaa kpụ ụrụrụ họọ.

²³Jaabwọ myị abwọ ká enyi á myị ị-ịba ka ba, ọ kaa ju uhi ka, Ọ dọmwụ riri ka enyi myị á juwa mwụ kpá chị pwẹ jwọọ ka okwinyi, ọ kaa ju ugbodu nụwa kpọ.

²⁴Ọngọngọhẹ á ka lọngịrị da okụja wu ịnyị-enyi myị lee yẹ ẹngịrị nya ụnya olejwo gwoo okwinyi myị kpong-kpong kaka.