Read idege IJobu 41 Bible Online

IJobu 41 - idege bible

IJobu 41

¹IJobu ee, à ka jẹ-ẹ̀ kpa ọkụja wu ẹchụ kpa kpehe bwu ẹpwụ nya enyi myị-ị̄ị́? À ka jẹ-ẹ̀ jwoo ori ẹ-ẹlẹlẹ bwọ eji myị-ị̄ị́?

²À ka jẹ-ẹ̀ jwoo ori o-okwinyi lee ọ-ya ọkụja bwurwọọ abaa iwa kpehe myị-ị̄ị́?

³Ọ ka bịlẹng ká ka tụụbwọ hyoo-ọ́? Ọ kị bịlẹng ahụ nyị yẹ ahyẹẹrwẹrwa nyọwa-á?

⁴Ọ ka nwa iro bala ahụ, myị ọnụ nyọka myịng ẹrụ pyịyọọ-ọ́?

⁵À ka jẹ-ẹ̀ ya daa ẹ-ẹpwa lala ụgẹrụ nya ang-ayịlọ ọ-kpa yẹ nya anchẹ anyang nyang-ńg?

⁶Alọhị ka wẹ kaka yinya jwoo, kị ka kpa kaka wọ rụ u-ube nya ihi nyaa-á?

⁷À ka da ọkpachị ọlụrwa kaka gwoo bwurwọọ ugba myị-ị̄ị́? À ka jụ ụwangga ọ-kpa da urwenyi da kaka gwoo e-egbeju pyịị myị-ị̄ị́?

⁸Ya ụbwọ gwoo gu ká yẹ ịlọng wẹẹ, uya kọ tịtị ka mang bẹẹ! Á ka myịmyị-ị̀ mọọ yẹ ẹnẹnẹhẹ kaka.

⁹Ọ-dọmwụ ya ẹhị tọ ugbiriyo ọwẹ kpoo kem du ká ọngịrị-ị̀ myị hi ọngịnyị dọọ mịla eji gụraja.

¹⁰Ọngọhẹ-ẹ́ẹ̀ myị̀ ịlọmwụ gẹdẹ kaka jwoo jwẹẹ myị ka, ee lẹ, oowo tị́ bá ẹla tam am Ohe Oluhye myị-ị̀?

¹¹Ọngọhẹ ya ang kpịlam ẹnẹhẹ kpụ m̄ ka nwọọ uri-í? Ang myị ang ilodehe wuu ri ịnyam.

¹²“M̄ chabwọ nya ata nya ẹchụ ya jeng, jaabwọ kọ la ọngịrị bala ọ-kpụ ẹhị kaka ba mẹ.

¹³Oowo tị́ ka dọọ ugo olodehe kpụ kọ ka wu ugba ọlẹpwụ ọ-chụ ụka lala ọkụmada ọyị myị?

¹⁴Oowo tị́ ka dọọ ọnụ kpoo kpụ myị? Angịrị ị-la uhi-uhi à myị̀ ẹpwụ ọnụ nyamwụ lẹ.

¹⁵Ego ịlabẹkpẹ nyamwụ ji ọgba lala akụmada, ị da wu awụlẹ gbile awụlẹ eteteete.

¹⁶Ego ịịwa ju awụlẹ chwẹẹ gbee ká ọhụ-ụ́ dọmwụ ka jẹ-ẹ da pwụ apewa nyaa ka.

¹⁷Ugo ọnyọnyọọnyị bwu hịla ọkịla, ị da wu awụlẹ giri-giri, ị́ ka jẹ-ẹ̀ hụlaa hi awụlẹ ka.

¹⁸Ayịbwọọ ọchịchị nyamwụ kaa chị ila manya-manya, egbahị nyamwụ cha pwuuu lala ahịgboo nya ewu-ụtụrụ.

¹⁹Ẹlẹlẹ nya ila kaa kpehe bwu ọnụ nyamwụ, ila kaa dachụ pwụrụ-pwụrụ bwu ụwa kpehe ịnyịnyị.

²⁰Ịmwụ-ụ̀ kpehe bwu okwinyi nyamwụ lala ịmwụ o-bwu ẹpwụ nya ẹchụ ọlẹ kị kpa ekinggo tụ ila ju ọ-ọmwụ.

²¹Ịhụ ọ-chị pwuu nyamwụ kaa rụ ang ila, ẹlẹlẹ nya ila kaa kpehe bwu ọnụ nyamwụ.

²²Igbiido nyamwụ à la ọngịrị la wẹẹ lẹ, ọọ chị uhi ju eji ẹ-ẹga myị ẹga.

²³Ẹgẹgẹhẹ nya ugba nya ịnyịrọ nyamwụ-ụ́ la mịlẹ-mịlẹ ka, Ọ chị ache lala oje, ị́ ka jẹ-ẹ̀ pyọọ hii myị ka.

²⁴Ọkịlẹtụ nyamwụ la kpọọọ lala ẹjwọ, ọ la ọngịrị kpá lala igo ọ-kpa go ang.

²⁵Ọ́ wuleji kpị̀raka, angị ri ogirima ri kaa ju uhi, ọ́ du chụrwa, ịị rụ gwẹẹgwẹẹ tịrẹkpẹ.

²⁶Oge-éè pyọọ ịhyọọ ka, ọkpachị lee ụwangga lee ọyị á ri ẹlẹhẹ nyamwụ ka.

²⁷Oje lọọ mịlẹ-mịlẹ lala ukunggo, oje ọnyọọmịla lọọ mwụyẹ-mwụyẹ lala okoji o-ri ịmwụrụkpẹ.

²⁸Ịcha ka kwoo rụ myị ka, ẹjwọ ọ-da mịlọọ lọọ lala ahụ nya amẹ.

²⁹Á mịlọọ okoji, ọ lọọ lala ukunggo, ị́ dọọ ọkpachị, ọ hụlọọ ẹhụ.

³⁰Egbapwụ nyamwụ liri lala egbiniidiyo, ịị gu ọpyị jaajaa ụka kọ juwa jẹdịyẹ.

³¹Ọọ gu ihu ágbụ lala enyi à juwa wụ, ọọ yi ihu yi lala ọta nya ida ọlẹ kọ juwa wụ́.

³²Ọgụ nya ẹga kọọ jẹ bwu dụwa hụrwatataata, họ la ihu chị awụụ chụchụụchụ.

³³Iyo ọhẹ-ẹ́ jam odehe nyọka chụ moo ka, ugbiriyo o-ju uhi ka ọ ri lẹ.

³⁴Iyo myị iyo i-hi ọbọọchẹ wuu lọọ tẹbẹlẹ, ọwa-à ri adịrahụ nya iyo ịnyẹẹgẹga wuu lẹ.”