Read idege IJobu 42 Bible Online

IJobu 42 - idege bible

IJobu 42

¹Ọọwa lẹ, iJobu à wẹ Amkpaa ẹla yẹẹkẹẹ,

²“Amkpaa ee, m̀ jẹ ká ka họ ang myị ang myị, ọngọngọhẹ-ẹ́ ka jẹ-ẹ̀ chogbilo tang myị ka.

³Ọngịrị oyina a tị la k tọ ẹla ọjẹjẹ. Ohe a tọm ịtọ yẹkẹẹ, Ọngịrị oyina ahụ iJobu a tị la ka ka tọ wo nya ụgbẹyị kam kaa bwu họ ang? IJobu, ọngịrị oyina a tị la ká ka tọm ịtọ nya ụgbẹyị ọlẹ kam kaa kpa ẹla ọjẹjẹ nya họ ụkụrwọ? Ụka kam tị jẹ ịngịhyẹ kpong-kpong ka ịlẹhị. M ya ẹla rụ ang ịlẹ kam jẹ ịngịngịhyẹ chajị nyaa kpa pyịnyẹng ka. M ya ẹla rụ ang ịlẹ kị lam ahịbwuu kpoye nya ẹla ọjẹjẹ nyam.

⁴Wo mẹ m̀ ka ya ẹla lẹ: M̀ ka tọng ịtọ. Aa wẹm mẹ.

⁵Ene-ene m kaa wo ẹla nyang la ụrụ-ụrụ kem, Ma, lẹẹlẹẹ, m̀ yẹng lugbẹhị nya ịlọm lẹ.

⁶Lẹẹlẹ, m̀ tịrẹkpẹ hi ala ịlẹ wuu kam ya ene-ene lẹ, m yẹ irya da, m hụhụ ẹ-ẹpwụ nya agbụ bala ẹpwụ nya ekuruwa.”

⁷Ụka ká Amkpaa ya ẹla ta iJobu kpa lẹ, ọọwa Amkpaa a byi Elifasị ọlẹng nya al ịTẹman yẹkẹẹ, “Ikẹjẹ awụrụ nyam wuru tụng ahụ bala aligu nyang angị imiiye pyịpyị lala ẹlẹlẹ ila lẹ, chajị anụ bala aligu nya iBilidadị bala iSofa ya ẹla nya ịlẹhị chajị nyam jaabwọ ka iJobu ọnchẹ nyam ya ka.

⁸Chajị nya ọọwa wẹẹ, anụ kele kanụ kpa ágba nya ẹna irwiye, kanụ kpa kele kịla iJobu ọnchẹ nyam, kanụ kịla iya ọ-rụ ila chajị nya ịlọnụ mẹ. Aalẹ, iJobu ọnchẹ nyam ka raabwọ chajị nyanụ, abwọ ọrịrị nyamwụ m ka wo chajị kam ka yẹnụ akama jaabwọ kanụ họ ang uchi ka ba ka lẹ. Chajị anụ myị ya ẹla nya ịlẹhị rụm jaabwọ ka iJobu ọnchẹ nyam kaa ya ka.”

⁹Ọọwa lẹ, Elifasị ọla ịTẹman bala iBilidadị olepweji nya iSofa ọla ịNaamatị a rụ kele ka họ jaabwọ ká Amkpaa byaa nyị họ lẹlẹ. Ọọwa, Amkpaa a wẹ abwọ ọrịrị nya iJobu lẹlẹ.

¹⁰Ụka ká iJobu raabwọ chajị nya aligu nyamwụ angị ịta ịịwa kpa, Amkpaa tịrị ụdụ ọkpụkpụ nyamwụ ẹkpẹ họọ mwụ aba ba ugbabwọ imiiye myịmyị jaabwọ kọ la ene.

¹¹Ọọwa lẹ, anyịnịna nya iJobu alẹng bala anyị namwụ anyang bala aligu nyamwụ inyogo ịlẹ kị jọọ tata a kele ka yẹ iJobu lẹ, ọ họ ang oriri haa, ị juwa ri ang juwa ya ụya ọtụka-ọtụka ẹ-ẹpwa nya iJobu lẹlẹ. I ya dodehe jaabwọ ká iJobu la ahyẹẹrwẹrwa ka ba lẹ, ị juwa kpoo ẹjẹ chajị nya ang inyibyi ịlẹ ká Amkpaa hi iwe da kị wẹ uhye nya iJobu. Ọng myị ọng nya angị warị ka wụla iJobu yẹ ịwẹ gba iku nya okpoko ịhyẹ bala okpoko ịgọm ọlẹ ká anyang bala alẹng kaa ya pịlẹ okwinyi bala ụrụ nya ịnyangga.

¹²Amkpaa wahị kụrụ ụpa nya ọhịhị ọlụka ohyẹẹkpẹ nya iJobu gụ ụka nya ọmwụ ọdada nyamwụ. Ịkpịlọ nyamwụ kem la ụnọ iwo kụrụ ine (14,000). Anyịrẹ ịkamẹlụ nyamwụ ụnọ ịrwọnyẹ (6,000). Ịna nyamwụ la ụnọ imiiye (2,000). Ibyiyó nyamwụ la ụnọ ookpokpo.

¹³IJobu ma anyị alẹng irwiye. Ọ ma anyị anyang angị ịta ịnyịnyị.

¹⁴IJobu wụrụ ẹnyị nya anyị anyang angị ịta ịlẹ kọ ma ịịlẹ: Ẹnyị nya ọnyị nya ọgbanyẹ ri iJimayịma. Ẹnyị nya ọnyị oheeye ri iKesiya. Ẹnyị nya ọngọ ọhata ri ịKẹrẹn-ịhapuku.

¹⁵Anyị anyang nya iJobu angị ịta ịịwa à há ụhị gụ anyang ilodehe ọlẹ wuu ụka ọọwa lẹlẹ. IJobu ga anyị nyamwụ ang-ugu jaabwọ kọ ga anyị alẹng.

¹⁶Ụka ká ang ịlẹ họ kpá wuu, iJobu ri ehe tata myịmyị ẹka ohu ookpokpo da ẹka iwo ine (140). Ọ yẹ anyị ịtụma nya anyị nyamwụ alẹng bala anyang gbee ju ka oyi ohene nya anyị ịkịla ịlẹ kị ma ẹ-ẹpwa nyamwụ.

¹⁷IJobu ri ehe tata nya ịlẹhị kpá kụnyẹ-kụnyẹ ene kọọ gbu.