Read idege IJobu 5 Bible Online

IJobu 5 - idege bible

IJobu 5

¹“Bekọ yẹ wẹẹ, À ka ye ọngọ wẹng wẹ-ẹ́? Oowo lẹpwụ nya alegu-ẹrụ à tị́ ka dang ụbwọ myị-ị̀?

²Agbama ojuju kaa ju ọmwụ-igu nya oluchi, ijiiji ọyẹyẹ-ẹ̀ nwụ ọlẹjị.

³M̀ yẹ oluchi kọ kpụ ụdụ yẹẹyẹẹ. La ọ-bịrị ụkụ ka, m̀ gọlọ gu ẹpwa nyamwụ cheji.

⁴Anyị nyamwụ-ụ́ ka ye ẹga ọkpịbaa ka. Ị yáàya ẹ-ẹga oleje la o-ye ọngọ ka leje haa ka.

⁵Angịlẹ ká imyi nwụ ka go ang-ẹrụ nyamwụ ri tụ ịlẹ kị ji ẹpwụ nya ejwo.[4] Alẹbyahị ka charịnyà nyọka go ang-ụdụ nyamwụ kpa rụ.

⁶Akama-á bwu bwu ịpyị lala okoji ka, ang ọjụjụ-ụ́ụ̀ bwu rịrị ị-ịpyị ka.

⁷Ma, ịị ma ọngịnyị ka tọ akama jaabwọ ká ila-à wuru dayi lachụ ọdada ka.

⁸“Ó-ri am ahụ, m̀ ka bịlẹ Ohe Oluhye. Ọwa m̄ ka kpa ẹla nyam kaka tọ lẹ.

⁹Ọọ họ ang ịtụka ịlẹ kahị ka jẹ-ẹ̀ jẹ ọdawụlẹ nyaa kpá ka. Ọ họ ụkụrwọ ẹbyẹbyị ju iru kịla ọwawa kịla.

¹⁰Ọọ do enyi ju ọpyị, ọọ do enyi ju ẹrụ ịnyịnyị.

¹¹Ọọ hu angị la dụmwọ hụ ẹ-ẹga ogede, Ọọ ya ọkẹkẹnị ha angị juwa bida.

¹²Ọọ pyị obyi omeme nya alijẹẹhị kiroko du ká ụkụrwọ nyaa-á ka kịlahị ka.

¹³Ọọ kpa ijẹẹhị nya alijẹẹhị da ụnya waa, du ká obyi omeme nya alijẹẹhị-ị̀ ri ododu.

¹⁴Ukpowu-ù chaa lẹpwụ-ẹnụ, lẹnụ ọrịrị ẹ-ẹpwayịrẹtẹ, ịị mà kpòkpookpo lala alodu.

¹⁵Ohe Oluhye tị kaa gba alẹbyahị kpehe bwu ẹpwụ nya ọnụ oliri nya alọkwọ. Ọọ chaa da bwu ẹpwụtụbwọ nya alabwẹga.

¹⁶Du ká alẹbyahị la ahị ọdahịle. Ọ-họ ri kịrọrọ kpụba gbanggbang.

¹⁷“Ọkẹkẹnị juwa ha ọngọlẹ ká Ohe Oluhye-é nwụ̀rịrị. Ā yehi da alibyi oyaya nyamwụ bwee ka.

¹⁸Ọwa-à chị ọngịnyị ẹbẹ lẹ, ọwa-ọwa-à tịị myị̀ ẹbẹ ọọwa lẹ. Ọọ họ ọngịnyị ang ọjụjụ, Ọwa-à tịị họ ọngọọwa uda lẹ.

¹⁹Akama ohu kụrụ iwo ka wẹ ẹga nyang myị, ọ tị ka gbang kpehe. Ọ-gụ ọwẹ gụ, ịngịngịhyẹ-ẹ́ ka họng ka.

²⁰Lụka nya uhi, ọ ka kpang hị̀, Lụka nya ẹwụ, ọ ka kpang bé.

²¹Ọ ka keng hi ala ị-mwọ ya ba, ká ka ju uhi ụka ká ayịreji-í pwụ eji ka.

²²Ayịreji bala ūhī ka lang lala ụbwọ nya ọjị, á ka ju uhi nya iyo ịnyẹẹgẹga ka.

²³Ịpyị nya ẹrụ nyang-ńg ka ju ajwọ ka, iyo ịnyẹẹgẹga-á ka họng ịngịngịhyẹ ka.

²⁴Ọọwa, ā ka kụ ẹpwa nyang lokpunyi lẹlẹ. Á wụla ịkpịlọ nyang yẹ wuu, ọhẹ-lọhẹ-ẹ́ ka byi ka.

²⁵À ka ma anyị ju iru, anyị ịtụma nyang ka ju iru lala amẹ.

²⁶À ka ri ehe chị okwirichi kụnyẹ̀-kụnyẹ ene ká ka yẹ igu ẹ-ẹhị, jaabwọ ká ang-ẹrụ-ụ̀ ga yẹẹyẹẹ ene kịị kpaa ka ẹga o-ru ajẹ nya ang-ẹrụ.

²⁷“IJobu ee, ẹla kahị jẹ lịlọhị à wẹ lẹ. Ị ri nya ịlẹhị, Aa wo, ká kpa họ ụkụrwọ ha ịlọng mẹ.”